Mihingte mun khat kia toh kikhopha thei hilou hihang. Kho khat apan khodang ah, mun khat apan mun dang ah, a zin tuah ving vengte i hi uhi. Khat vei intek apan hun bang om, a mikhual a i pan hun bang leng om zel. Mikhual a i pan chiang a zindoutu, i tunnate sep ding, omdan ding leh kampau ding dan tanpha i lamet uh om. Huai mah bang a zindoutu a i pan chiang a leng i zinte om ding dan deih huai leh nuam i sak dan bang na om nawn. Khual zin zinte, mi inn a tung zel zelten zindou ding dan leh mikhual vaidawn ding dan, houpih ding dan a hun toh kituak a zat ding thei zaw tham uhi.
ZIN DOU SIAM: Zin dou siamte inn a zintun kimaingal pah, ki-intek pah, ei in a om mah bang in hon koih thei uhi. Hon mikhual bawl lou in amau ate mahmah bang in hon intek bawl pah mai uhi. Ei zinna toh kisai, inkuanvai, sepna leh nektak zonna toh kisai i theih ngeingei ding teng mah toh thu hon patpih uh ahihman in kihamhaih lou pah phot hi. A min bang uh hong kipulak ua, tua kom in a hihna uh, a dinmun uh, inkuan pha zah, numei pasal leh beh leh phung minte hon genna uapan, mikhualte a ding in zong kipulak thanop huai tuan se ding hi. Tuabang a kimeltheihna in hon sumaingal in hon kichimat sak pah hi. Buh leh meh, nek leh dawnte a limchi pente leh a lim pente ahi kei zong in nuam kisa in kitek tang mahmah pah hi. Zindou siamten hon limsak leh ngaihven mahmah ahihman un nuam kisa se hi. Mihing hihna ah mi limsak leh ngaihven mah nuam pen hi.
NEK LEH DAWN TOH KISAI: I zin pa/nu in singpi bang chi bang dawn, akhum maw, khum lou, bawngnoi puang dawn maw a san vuak dawn chihte dong pah thei uhi. An gum duh maw, a nawi banah, mehkan, malta, sathu, ngathu, leh sa nek louh bang khong nei chihte theih tuak om bangbang zinte kiang ah dong pah thei uhi. Nek leh dawn ah zinte a ding khual siamte mah zindou siam hipah mai uhi. Dam theihna toh kisai a nek theihlouh, dawn theihlouh chihte bang om neuhneuh ahihman in pilvan huai tam hi. Annek ma a damdawi nek neite bang zin a na neih khak leh “Annek hun ding hita damdawi nek na neih leh ne ta in” chih hilh thei zel leng nu kizen leh nu fel kihimai ding hi. Zinte khawng zahtak a houpih ngamlou chih khawng a neih louh ding, “Kou inn bang a na hong tun khak kipak lua ung, hampha lua ung, nuam kei leh zong na taam sung intek tak in om in aw” chi a na houpihna in amah khamuang sak in a lungnuam lua ahi chih mangngilh ngei ken aw.
ZINTUN SIAM: Mi inn a va tung, pau ngel lou a na va om leh intekten hon neel lou ding uhi. Nang mah in thu va pan inla, na min, na nu leh pa min, na beh leh phung min, na hohna san, a poimoh lai leh nasep leh nekzonna chih tanpha kipulak lechin, na behte hiam, na sungte lam hiam, na pute lam hiam, na nuphal pa/nu hiam, na mounu behte hiam, na kholam ua na invengte tanaute hiam na hikha maithei uhi. Hoih tak a nong kitheih tuah chiang un meltheih kibehlap, tanau theih beh, lawm hoih neih beh bang hikha thei ding na hi. Mikhual a i pan chiang a ka tunnate nuam kei lua uh chih baihlam mah bang in, a mau zong ka zinpa uh kua a diam a chi a kitheituah ngellou a kikhen khak theih ahi. Zan ihmut kal a zong tuahsia tuak a va sih leulou theih ahi, na tunnate kiang ah na tanchin mi theih dia poilou chiang gen leh hilh ding thasial het ken. Nang kasiam tak in va kipulak lechin amau zong hong kipulak ding ua zite ziak bang, tate ziak bang, moute ziak bang a kitanau pih hoih tak bang hikha thei ding uhi. Intekte hong kipah peuh leh akpi tuilai bang zong hon goh mai ding uhi. Ka tuna nuamlou chi pahlou in ei a zintungtu in leng i tunnate toh kichimat din kizopna hoih bawl siam leng amau leng nuamsa ding, en leng nuamsa ding hihang.
Zindou siam, zin tunsiam i chih mi hausa leh mipilte zong siam pen khol tuan lou uhi. Khopi khong ah guest house kitunsak baihlam mah mah hi. Himahleh saptuam vai ah bel upate in khawng, saptuam heutute in khong mah a tung a, kithuahkhawm mah manpha zaw hi. Hoih tak a i hong kitheih tuah chiang a kiitna, kingaihna hong piang, a nuam leh nuamlou kikum ngam, haksatna leh kipahnate kitheihpih chiang a kingaihnatna hong lian semsem a, huai ah Pathian mel kilawmna pen hong kilang thei hi. Zindou siam ding i tup chiat kawm un, zintun siam ding zong tup in nei ni, tuabang tupna leh lunggulhte tangtun zou ngei ding in simtu teng Toupan hon ompih chiat hen.
