Guglielmo Marconi (electro-magnetic wave), Hennrich R Hertz (radio wave) leh RA Fessenden (audio message) te khuakpilna tungtawn a Radio hongpiang khia himahleh, G. Marconi tuh Radio mukhetu min piak ahi a. Himahleh, World Radio Day tuh UNESCO in 2011 a hon sehpat ahi chih ke’n le zanzek a ka na theihpat ahi a. Hiai thumapi k’on behlap hi.
Sepna ziaka mun tuamtuam a omkha te bang, singtang lou nasem te leh mi tuamtuam aa dia phatuam mahmah, chimthawi, thuthak hilh-tu leh lawm hoihtak le ana hi, Radio, tuni World Radio Day ahih denzek in facebook a lawmte page ah ka mukha a. Diary piansim in Radio in hon sukkhak saulou k’on gelh mawk.
Walter Kaufmann, Juda tangval, India a hong galtai' music gelh tuuu-rururu-rurururu-rururuuu chi a i zuih ngau2 sek (m r d l r d l s l d l s - akhuang bulh dah ni) tuh khovel a Radio Signature Tune nalh pen ahi phial ding. Tultheilou.
Class VII simlai in AIR Paite program ah ka u Sonpu heu in, (L) Tunzahau, Lia Damhoihching, Lia Thawngkhanching te toh laa ka vakhumkha ua. Huai lai in Imphal Radio Station tulel a Old Secretariat – Manipur Rifles kiang ahihlai ahi. Recording lai a ka lawmpa un a guitar tum hon dakbawl sim a. Ka pa'n abil hong heeksak lai ka mitkha ah a mangthei kei. Huailai khonga kithununna nasa ahi.
Kum bangzah nung in, tulel a Radio station thak ah (L) Pu Lianpu Hangzou, (L) Kesto N. Khampu, (L) Tunkhanthang, (L) David Mungpu, BK Shwanno leh Ka u Son te toh The Twins min in laa tamlou ka vakhumkha nawn uhi. Hiai lai a Pu Lianpu sak:
Muikhua hong zing kuan ta e
Lia-le-tang aw kei khattang zuang ing
Lungzuanna zatam sial ing...
singtang lam khawnga ei vuaka i ngaihkhak chian, lungzuan a khenkha diak hi.
Lamka a TV om ma thu ahi i gen taangpi. Radio innsuan in i na nei phial di uh. Ei aa minutes' 15 ahihlai pek in, Thadou program tuh minutes 30 ana hi daihta a. Pu Jangkholam laa te, ka lawmpa Dr Lalzadal' u, Pu (L) Lalneo Gangte & Party te laa khong a kiteel mun lawi ahi. Thadou program a announcer siamtak khat bang, a awo ana kingaizawng mai ahi.
Paite program minute 20 hong hi a. Kuapeuh I kipak chiat ua. AIR Paite program announcer masa mi hiamtak I na nei zo-mah ua. 'Omnuam leh Mangpha' chih Pu (L) Thangkhanpau Guite in AIR Paite program a hon pat hi in ka thei (theihkhelh ahihleh ngaihsiam). Paite program signature tune Pu Zenhang Valte & Party te’n ana record khak geih uh fuh ka sa petmah. Kou neulai khawnga nitaklam tenga Zu-pi khawng teep a, Jampi & Daak thuah a kipawl gige ahi ua. A thawm uh vengsung a zel zou mahmah, gari nei lah omnai khollou, thawmh dang tamlou ahihbok toh.
1980s in Radio station hoihpipi i hon theisuah pan ua. Guwahati, Aizawl, Rangoon, Falam, VoA, BBC stations. Jolly good show khawng, Countdown khawng buaipih luat hun le ana kinei hiveh-aw.
Sunde skul kailai thu genzek lai le. Doctor zouthak khat in AIR ah program atangkha a. Short Drama nalhdeuh mai hon gelh a. A tapa role hon lensak a. Huai play a ka nu & ka pa te tuh anung sawtlou in hong kiteeng uhi. Radio zaw manpha mah ahi.
ECC saptuam in ETA (Evangelism Through the Air) program, Manila FM station tungtawn in i nei ngei ua. Rev Luaichinthang huaihotna ahi. Ei pao a Pathian thu puanzakna ahi a. Kuapeuh in lamdang bang sa in, a kipakta chiat hi. A kipat tung in (tulel a Hebron EBC Biakinn mun hi in ka thei) Pi Biakkim Shoute, Pi Niangboi Valte leh huai lai a laasiam tuamtuamte hon kaikhawm ua. Laa record (na) akinei a. Huai ah guitar ka va tumsak kha thethup uhi.
Hun hong pai zel in, Om Maimai Pawl (OMMP), Zenhang Lamka khut ah ETA hongtu a. Pu Mervin Doumuanthang (BYF logo design tu) in bangkim feltak a sai in, ETA van neihsun, Double cassette player 5 band Radio zang in recorded program Manila, Philippines ah registered post in ana khaak zel hi. Tawlkhat a thugen di hong vaangsim ahi di a. Rev Paukhanmang Guite in Bible College ah sermon hon draft a. Pu Mervin Doumuanthang in kou lawi, Er Ngilkhanpau, Upa G Luaikhothong, V. Sialchin te sermon hon kisimtehsiak sak hi. Hiai khawng ziak mah in, Ommp member, Pu V. Hangkhanlian in le Link language di awlmoh in theihtawp ana suah mah hi.
Paite Link Language dia order suah nitak a, Delhi a Pu Chinzakhup inn a Pu Suakzathang, YPA President makaih a Paite program host/ announcer kidemna ananeih uh hihhoih lua ua; huai hun a prize Pu V. Hangkhanlian in a sponsored ana hih bang le k’on gelhdawk hi.
Put your radio on - Listen to the music in the air.
