"Ngaiin, hiai mi honnawk zelpa Pathian misiangthou ahi chih ka thei. Kisa dih, inn pindan neu i bawlsak dia, lupna, dohkan, tutphah leh khawnvak koihna i koihsak ding, huchi'n I kianga ahong chiangin a lut zel ding" a chi hi (2 Kumpipate 4:9-10)
Shunem khua a numei hausa khatin Jawlnei Elisha tunga a nasep ahi chih t. 4:9 apan I simleh I muthei hi. Elisha a khualzinna ah Shunem khua tawn zel a, huai a a min le kigenlou hileh le Elisha tunga siamna (hospitality) ana suahsek ahi chih I mu hi. I tangteel a kigen bangin a pasal kiangah, "Hiai honnawk zelpa Pathian misiangthou ahi chih ka thei" chi a proposal kichiantak apiak tuh a pasal inle pompih ngal ahihdan I mu hi.
Aban I simsuk leh Elisha in hichi banga deihsakna angah mawk banghiam deih nei hikha ding ahi chiin ni khat dong hi. Kumpipa hiam sepaih heutu kiang tanpha a gensak ding ahihdan hilh hi. Hiai a Shunam numeinu dawnna pen thupi mahmah hi. A siamna suahpen banghiam deihna ziak (conditional) hilou ahihdan, "Ka chipihte lak mah a teeng ka hi" (t. 4:13b), a chih ah kimuthei hi. Ka chipihhte lak mah a teng ka hi, achih in poimoh aneihte a chipihte apan ngah ahihdan muhtheih hi. Eite bang hileng bang I ngen deh aw! hamphatna khatbek chuh ngen di’n kilamethuai hi.
Aban I simsuksuk leh a sikhapa Gehaji tungtawnin ta neilou ahihdan honthei in hiai a zinnu vasamsak a, kumnawn huai hun a tapa nei di ahihdan hilh hi. Gingtakei mahleh honnei hi. Himahleh ni khat damlou gimtakin om a, hiai numeinu’n Elisha kianga hongpaiin, "Tapa k’on ngen ahia, honkhem k’en ka chi hilou maw" vachi hi. Toupa hinna lou in ka gen hi, k’on khah hetkei ding” chi hi. Huchi'n Elisha in zui in, naupang sikhin mahleh kaithou hi.
Hiai apan I muhtheih tuh, mihausatak himahleh Elisha Pathian misiangthou ahi chih a theih ziakin a tungah hoihna sulang hi. A deih ngen di’a hun piaka a om in tapa neilou ngetsak thei ahi chih thei hinapi in ka chipihte laka om ka hi chihsan hi. Shunam numeinu'n lungput dik nei a nahoih asep ziakin vualzawl in om a, haksatna atuah hunin Pathian in A misiangthou tungtawnin hunkhia/ dawnzaang zel hi. I hinkhua a honnawk zel bang hi in I thei a, bang I chi handle a? Toupa’n simtute hon vualzawl hen!
