DEW simtu Toupa Saptuamte’ na vek un kha-thak mel hong mu sak i Toupa Jesu min in itna nou ngiingei toh chibai aw.
Pathian makaihna ziakin tu kum sung thupi ‘Kipumkhatna’ chih i saptuam pumpi in i sual lai in tu September kha a dingin ‘veng-leh-pam toh kipumkhatna’ chih ahi a, thupi poimoh mahmah ahi hi. Hiai thupi poimoh tak mai tuh, heutute’n Lai Siangthou tang bangzah hiam a koihte uh laka Romte 13:9na a thugual “ nang na ki-it bangin na vengte na it ding ahi” chih zang in en ni.
Hiai thugual ahihleh, I Toupa Jesu in thupiak thupipen leh lianpen a chihte laka a nihna ahi. Huai tuh gingtu hinkhua a aloutheilou a zuih ding sinlai ahi. Toupa Jesu’n mihingte I hihna uh hong thei hoih mahmah ahihmanin angmasailna toh kidim mite I hih louh a, midangte khual ding leh, it hamtang dia hong deih ana hi hi. Toupa Jesu’n a pukse’ sa mihingte hihna thei lua ahihmanin midangte it ding, khual ding, deihsak ding, huai leng eimah tunga midang in hong hih leh chi a I deih bang a hih ding chihna ahi; huaiziakin, hiai tang a thumal kizangte’n a gen ut hiai dan ahi: -
Itna - hiai itna in a kawk tuh a taktak (genuine) a midangte khualna, huai tuh a kipahna ding uh leh amau hoihna dingin chih ahi. Midangte it in, huai leng, a it-tute phattuamna ding hilou in, it a omte khualna in, chihna ahi.
Na innvengte - Hiai in a gen ut tuh midang kuapeuh mah na ki sukkhakpihte, innveng a tengte, siamsinna mun a classmate-te, seppihte, lawmte, innkuante leh midang khatpeuh huapkha hi.
Nang na ki-it bangin - Hiai in a gen ut tuh, nang’ midangte na bawl ding dan tuh midang in nang ahon bawl ding dan ua na lamet bang a hih ding ahi. Huai tuh itna ah, migitna ah, zahtakna ah chih ahi; en’ ei midangte hoih taka hong bawl ding un, en’ midang ngaihsak lou leh khual vetlou ding chih hi theilou hi.
Hiai a Toupa Jesu hong sinsakna dan zui a hinkhua I zat leh midangte toh I kikal kichimatna hoih zaw leh hat zaw ding a, Community hoih zaw leh ki-it zaw leh, kipumkhat zaw hong piang ding hi. Huaiziakin, hiai I Toupa hon sinsakte ginom taka lenkip leh zui dingin Toupa min in I kingen a, tua dingin Toupa mah in hon vualzawl chiat ta hen.
