Pulakna: India phualpi a tulel a vaihawm pawl in, vaihawmna a let ma pek ua pan a gen leh phuut det uh thil thum om hi. Huaite tuh (1) India daanbupi in Article 370 nuai a Jammu & Kashmir kivaihawmna tuam a piak lakkhiak diing, (2) a pathian uh Ram pianna mun Ayodhya mun a Ram temple lamkhiak diing leh (3) India khua-le-tui pumpi huam a Uniform Civil Code neih diing chihte ahi. Amasapen zoh hita a, a nihna nasep pailel in zou pahta diing ua, a thumna pen hih hehu di’n a kisakna pailel hi a theih ahi.
Uttarakhand sorkar in amau state aa diing in Expert committee a na bawl uh a, tua committee a chairman Justice Ranjana Prakash Desai, Supreme Court a judge lui khat in, a report uh manta a, sorkar ah pelut pah ta diing uh chi a gen ahihdan Indian Express (IE) tanchinbu July 1, 2023 ah kisuah hi. IE in a gensauna ah, hiai draft report enton in India pumpi aa diing bawlzui pah ahi diing chih behlap hi.
July 6, 2023 in The Times of India ah hong tung diing Parliament session, July 20 a kipan diing ah luikhiak diing a muanmoh thu kigen a, himahleh sorkar in a thu a zuak phot (consultation), hahtak a bawl masalai diing a gintak thu toh genkhawm hi.
Civil Code bang ahia? Amawl theipen a gen in Civil Code kichi tuh mimal gamtat-khohei hon hetkha gou-le-gam kiluahsawndan, kiteendan, innkuan vai leh adangdangte omze nei a gelhkhiak chihna ahi. Omze neitak a lepkhawm a gelhkhiak (codified) hi diing ahih ziak in, a kigelhkha loute pen ‘daan hilou’ chihna suak pah diing hi.
Uniform Civil Code bang ahia? Tomchik a gen in, mimal gamtat-khohei hon hetkha gou-le-gam vai, kiteendan, innkuan vai leh adangdangte a kibang zat diing chihna ahi. Mimal’ sahkhua leh tawndan-ngeina khawng a kibang lou hizahta India gam a om ahihman in India khua-le-tui hihna nei peuhmah in a kibang zuih diing ngimna a omze neitak a gelhkhiak diing chih sawmna ahi.
UCC omleh bangbang hon hetkha dia? Bangteng tuunsakkhak a om diing hiam chih theih hikei mahleh UCC deihte’n a deihna ziak uh a gen ua pan in hiaite hetkha teitei diing hi: Kiteenna, nupa kikhenna, mahni ta dia laakna (adoption), gou-le-gam kiluahsawnna, chihkhawng hetkha diing hi. Sahkhua leh tawndan tuam dungzui a hihdan tuam zuisa himah lehang a kibang zuih kulta diing hi. Nam niamte’ khankhiakna diing a constitution in a phalsak hamphat bikna tuamtuam leh siamsinna vai a deihsakna kibawlte khawng leng hetkha thei diing a gen leng om uhi.
Bangziak a UCC deih ahi ua? UCC kizangleh sahkhua dungzui a hihdan tuam zuih kichi bei diing a, miteng in a kibang zui diing hi. Gouluah thu ah tanu leh tapa kikal a kideidanna bei diing a, tanute’n leng tapate tan bang tang thei diing uhi.
UCC in India daan a kalh hia? India daanbupi article 44 sung ah, sorkar in hiai UCC neih theihna dia pan a laak diing ahi chi in kigelh a, Supreme court in leng pompih toutou hi.
Eilawi leh UCC: Sahkhua ah hitaleh, minam hihna ah hitaleh, vaite toh kibang lou hang a, i gindan leh tawndan leng kibang lou lua hi. Tua man in Babylon lam a pimang a om Danial leh a lawmte’ maituah thilte eilawi maa ah lui a hong om diing bang hi. Amau bang in i ginom diing uam? Tua diing in Toupa khut ah kikemsak ni.
