Mi tengteng bel hilou in tulai ei singtang mi a tam zawte lungput leh deihte bel a gengen loute na ngawn i gamtat-khohei, i sep-le-bawl, i sumzon dan, nek-le-dawn i duh leh deihte apan kithei thei hi. Leitung a i damsung ding Laisiangthou apan i muh bang un kum 70 bang hi in, hatna ziak in kum 80 zong hithei kichi bel a sim ngei khawl louten leng migen a i zak mun mahmah uh thu tualleng khat ahi. A sawt zaw tangtawn daih leh a beithei nawnlou ding pen sang in leitung damsung tomchik pen thupi sa zaw in huai a ding kikhual zaw ngen i bang uhi. Kinak khual mahmah in, ten pih insak-inkhangte sang in khosa zaw, hauzaw, pilzaw, thahat zaw leh a tungnung zaw in om thei leng chih tupna toh, chin-le-ha suang in zuau-le-tak gen zawng poisa lou in, sum-le-pai muhna ding khat peuh, khentuam lou a zong maite’ i hi uh.
TELCHING A OM MEMBER LEH A TELTUTE: Gam leh leitang, a sung a tengmite, khosakna, pi leh pu tawndan, kikep ki-etkolna hoih zaw leh khangtou zaw, masawn zaw in ka chi, ka nam, ka gam leitang a ding in nna ka sem ding chih sang in, mahni mimal, mahni inkuan lel chiang khong ading sepsawm kitam ta hi. Amau zui mite leh a gum mite in zong a mau mimal leh inkuan hamphatna ding chiang lel mah ngimna toh zui leh gum hilai sawnsawn. India gam, mipi vaihawmna gam a kitelna a bawlkhe masate tupdan leh deihdan bel namte leh gamte apan hong kitel khia mite – MDC, MLA leh MPte in itna leh lainatna toh mite sik leh tang a vaihawmtu a pang in amau bial chiat kem in a enkol ding uh chihna a kitelna kisai zelzel ahi. Telching a om MDC, MLA leh MP ten huaite ki-mangngilh bawl in amau a ding kia a hing in, hamphatna om theiliai teng tagah meithaite tan dingte nangawn duhgoh a pe phallou toh kibang hihang. A teltute leh a gumtute mahmah in zawng, i chi leh nam ading, i gam leh lei ading chi tuanlou i bang uhi. Gam kumpi khenkhat amau hun a bei toh kiton a, a tung thu uh hong kisui chiang a dan toh kituak a suangkulh a khum ngaite omna leitung mah ahi Khristian kichi eite i tenna uh. I Toupa Jesu leitung a hong pai lai a hon thu nutsiat bel “Leichi na hi uh, chih leh Khovel vakna na hi uh” a chihte nungzuite kia hilou in tulai a gingtu Jesu batna nei ding a, a min tam a kiphuak Khristiante kiang a chih zong hi ngeingei ding hi. Pathian taisan zen a kitelna i sai khak ding mahmah mulkim huai penpen hi.
KINTAK A HAUH PAH UT: Sumdawn hoihna leh manphatna thei, a lohching zong tampi tak ki-om ta. A lohchingte eng a tampite kipan sauhsauh, kum khat sung khawng a hauh pa ut, i neih in a chit louh tantan lunggulh. Mihausate sum, a met a chih zahzah uh piak ding peuh a va la, ei sumdawnnaa met sang a i sumpung lak percent hong san zawk leh kibuai ding chih theih sa ahi. Vaite khawng bel nek-le-dawn bang, silh-le-ten bang a kidek in, a pung a muh kei ua leh ngawl ngap zaw a hong kipat ngam man un kum bangzah hiam nung chiang in mahajon hong kai samta uhi. Sum zon siam lou, a kep leh a zeek mahmah zawng kisiam thei mah mahlou ngen i hi uhi. Paunak laibu ah “Kintak a hauhna pen kintak mah in bei nawn pah hi, Sawt daih ding, khantou ding hauhna tuh nikhat thu, kum khat thu hilou in awl-awl a khang, tawm chikchik a kibehlap sakte ahi uhi”. Lam i paichiang in leng hat pailaw leng, kimuktuk a puksiat gawp theih ahihman in a huntawk chiang mah hoih pen ding hi. Pau nak ah “Luita khan” chih zong om man in pilvan tuak lua hi. I zat zel uh paunak hoih mahmah “A ngak zou ten thupha ngah” chih pen na dik gige lai hi.
SEPNA DEIH MAHMAH NAPI SEM PEIHLOU: Mi tamtak-ten sepna deih mahmah in mi sum percent sang tak a dit ding nangawn a la in lei ngap hihang. Sepna i neih chiang ua, sem peih lou, posting na mun mah leng pha peihlou chi peuh a om zelte hihang. Hichi bang mite ta-ta khang hat zawmah, a inn uh hoih pah, gari hoih leh mantamte mah a tai zou pah, insung vante zawng hoih pah, nek-le-dawn ah leng a lim leh mantamte nezou zaw hong bang uhi. I omdan leh gamtat, i nek-le-dawnte, i duh leh i deihte, i ut leh lunggulhte Toupa mit ah a kilawm in a lungkim in, hon thukimpih na diam? MDC, MLA leh MP candidate-te leh a teltute lungput, sum-le-pai zong a hauh i sawmdan leh Sepna deih mahmah napi posting na mun leng tung banlou khawng sep i sawm dante uh kivel a ki-en chian thei chiat ding in Pathian naih in a thu-thu a om sawm chiat ni.
