I Samuel 17:47 “Hiai a kikhawm tengteng in TOUPA’N namsau leh tei in a hondam kei chih a thei ding uh. Kidouna lah Toupa kidouna ahi ngal a, Ama’n ka khut uah noute a honpe ding” a chi hi.
TOUPA’N a hoihna hon musak in, Tuailai Day zang thei nawn ding a hamphatna hon piak ziakin A tung ah kipahthu ka gen hi. Na vek un, Tualai Day chibai!
Khristian hinkhua tuh galphual a om toh kibang gige hi. A chang chiang in vuallel tak a om toh i kibang uhi. A chang chiang in ei hatlouhna muchian lua in, melma hatdan kia ngaihtuahna in hon vuallel sak zel hi. Tuni in TOUPA hatna muang kawma galdou di’a kisa tuailai hinkhua saulou chik in enkhawm le’ng uthuai ka sa hi.
I Samuel 17na, I sim chiang in David leh Goliath kidouna i mu hi. Hiai tangthu in khalam galdou na hon ensak hi. Philistiate mi lian leh hat, Goliath in Israelte hong tou/chou chiang in ling dupdup ua, a kumpi uh Saul leh a sepaih hatte, melma sual a dingkhe ngam omlou uhi. Tua bang ahihlai in tuailai David tuh dingkhia ding in kisa hi. Ahitak in David tuh hiai melma dou dinga, a chin pen leh a suanhuai pen hilou hial hi. Galdou kha nailou leh chil leng hilou lai hi. Goliath dou ding a, a chin pen tuh kumpi Saul ahi (I Sam. 10:23 - “Huchi in a tai ua, a va pikhia uh. Mipi lak a adin leh mi lak ah a sangpen a, kuamah a liang zaang khengzou a omkei uhi”). Kumpipa Saul zom a kuan ding tuh David sanggam Eliab ahi (I Samuel 16:7 - “Huchi ahi a, a hongpai un Eliab a na en a, ‘ Toupa sathau nilhpa a ma a ompa ahi mahmah ve’ a chi hi). Aban i et leh TOUPA’N, Samuel kiangah a mel in hiam, a sandan in hiam en ke’n, chi zui ngal hi. Saul leh Eliab te salam et a, chin mahmahte ahi uhi. Hinapi in amaute melma (Goliath) mai ah zulgawp khin uhi. Kuamah a dingkhia ding a-om louh lai in, David tuh TOUPA hatna toh dingkhia hi. Saul leh a sepaihte’n amau hatlouhna leh Goliath hatna mu ua, lau in ling uhi. David in bel amah kimu lou in, Goliath hatdan leng ngaihtuah samlou in, TOUPA hatdan mu zaw uhi. TOUPA’N, A hatna leh a thilhihtheihna muanga galdou tuh zohpih ahi. Teipi, teita, namsau te zang theikei mahleh, David siamna zatsak veve hi. Tuailai, TOUPA’N hon zatsak ding siamna nang ah leng om ngei ding in ka um hi.
Tuni in melma/ khelhna hatdan kia mu a, vuallel tak a om Tuailai i hi kha ding uh e. TOUPA’ hatna masuan a, eimah a om khelhna, hon dou gige maituah dinga kisa Tuailai I hih ding a poimoh hi. Zu gu, khamtheih gu, numei-pasal kal paktatna gu, zuau gu, kisaktheina gu leh gu hat tuamtuamte sangin TOUPA thilhihtheihna a thupi zaw thamtham hi. Huaiziak mah in khelhna kolbutna apan mi tampi suakta ua, nang leng hon suakta sak ut ahi.
TOUPA’N tuailai David a zat nop bang in, ei Tuailaite leng hon zangnuam mahmah hi. Himahleh i maithuah ding Goliath kinei chiat a, TOUPA hatna toh i zoh ding poimoh mahmah hi. Nang Goliath bang ahia? Na ngaihtuahna hoihlou hithei hi, na gamtat hoihloute leng hi thei hi; Pathian deihdan toh kikalh himahleh na genlem sawm teitei thil/ thu te leng hi thei hi. Na maituah a, na zoh angai hi. Saul leh a sepaihte banga taisia sia, tuailai na hi hiam? A vuallel hinkhua toh kia kisikhop na hi hiam? Na Goliath na zoh nop leh, nang hatna masuan hilou in TOUPA hatna masuan in, tuailai dingkhia in. TOUPA’N hon zang nuam ahi chih manghilh ke’n. TOUPA hatna toh eimah in, I sikkhop Goliath te maituah ni. TOUPA’N hon zawhpih ding hi. TUAILAI, TOUPA ADING IN DINGKHIA IN.
