Hun hong pai zel in October kha damtak a mu in “Tuailaite’ hun leh ni kipahhuai, aw tu in tuang i tung nawnta,” chih la sak zel lainite tuang hong tung na hi nawn a, lunglenhuai mahmah hi. Kum 30 khawng paita etkik in Pathian adia tualai hun a kizatkhaknate manpha ahihdan phawk semsem in om hi. Tuailai hun i chih ei saptuam’ kum khendan in kum poimoh mahmah, tha-le-zung hatlai, lungsim hatlai leh ngaplouh kichi omlouh hun zong ahi. Hiai kum hun sung (age group) tuh khovel dapsuak a minthanna leh lohchinna ngahte telna kum zong na hi tangpi hi. Gendan dang in hiai age group a tuh mi ahihna diing tantan uh tung tangpi uh ahi.
Hiai tuailai hih hun sung tuh hun poimoh petmah, zatdik theih in zong zatkhelh theih hi. Pathian in mihingte’n i hinkho zat diingdan (principles) Laisiangthou ah a na luikhia a, tuate zuih leh zuihlouh mihing khut ah koih hi. Mihingte Pathian lim-le-meel suun a bawl i hih man in hinkhua a thupukna bawl diing poimoh omte tuh, mimal khut ah Pathian in hamphatna hon pia hi. Hiai thupukna mihing in a bawk/laak tungtawn a Pathian’ vaihawm mimal’ tung a hong om diing hi. Huchi ahihman in tuailai hun a thupukna bawlnate ah pilvan ngai mahmah hi. I hinkhua a thiltungte leh I sep, i bawlte bangmah kilakik theilou a, i gamtat hoih leh gamtatkhelhkhaknate, a bei thei nawnlou, zong a kinulmang thei nawnlou thil ahi. Niteng-hunteng a i thupuknate, i mimal hinkhua hon makaih gigete ahihman in Pathian’ deihdan leh hoihsakdan a thupuk hiam khensat touhtouh tuh poimoh diak hi.
Tuailai hun poimoh lua, huan ah, hiai hun a i thupukna laakte poimoh zosemlai ahi chih i gen a, huaite toh paikhawm gige diing a poimoh mahmah tuh i thupi “Pathian Limsak Tuailai” chih ahi. A ziak bel, thupukna khatpeuh i laak chiang in thu nih om thei; huai tuh “Pathian’ deihdan leh Pathian’ deihlouhdan” ahi. Tua ahihman in thupukna i laak chiang in, i thupukna in ‘Pathian miitna’ i chih limsak thei diing hia hilou chih enkawm a laak diing ahi. Sepna diing toh kisai, zi-le-pasal neihna diing toh kisai, nek-le-dawn diing toh kisai, pumpi kichei diingdan toh kisai, khohei-gamtat diingdan toh kisai leh adang tampi zong omlai diingte a thupukna i bawlsa leh i bawltouh zel diingte Pathian’ deihdan a i bawl gige; i hinkhua a poimoh petmah hong hi ahi.
I tuailai hun miteng in i poimohngaih, naupangte’n nungak-tangval kaal ngaklah, a khanghaamte’n zong a nungak-tangval ni uh ngai un, gengen mai uh hi. Tuni a nang aa hilai ahihleh bangchi’n na zang a? Na thupuknate’n koilam hon manohsak hi in na thei a? Pathian’ deihdan leh amah hon naihsak hi in na thei hia? Hon gamlatsak semsem? Pathian in bel Laisiangthou a i muh bang in, Amah itpen a neih diing, ngaihpen diing leh lunggulhpen dia eite hon chial leh sinsak ahi. Tua chialna leh sinsakna zui in Pathian Limsak Tuailai hinkhua zang ni.
