Toupa'n Hon Sinsak Ut Ahi Zaw

• Khovel a mihingte, adiak in Khristian kichi a, hotdam kichite'n i hinkhua ah haksatna I tuak vek ding hi.
• I tuahdan uh kibangkeimahleh i tuah tek uah haksa sakna kinei chiat ding hi.
• Hiaipen a lamdang hilou a mihing i hihna ah i hinkhua a alou-theilou a i tuah ding him ahi.
• Haksatna taktak i tuahchiang in khat veivei theisiamlou in pom haksa kisa hi.
• Israelte bang a haksatna i tuahte'n i mit mialsak a, Pathian i lampial san chiang un, Pathian i tung ah hel a, a khawk zaw kithuak sek hi.
• Tua in i hinkhua mahmah ah leng haksatna apan haksatna dang hon guan a lam diklou ah honpi a, huai in lungkim theihlouhna hon tun in Pathian apan vualzawlna i tan dingte leh ei tungtawn a a sepnopte sem kha sak theilou in i koih khanak hi.
• Genesis 37 ah Joseph tangthu i muh uleh i theihsa uh leng ahi.
• Joseph in a hinkhua a haksatna a tuahte ettontak tamtak om a, tuate lak ah haksatnate a pomdan leh lungkimtak a aom theihna enleng i chi ahi.
• Mi tampite'n Joseph enhuai a sakna uh a genchiang un Pharoah nuaichet a vaihawmtu ahihna dinmun ahi.
• Hitamahleh huai a tunna ding a ahinkhua leh nundan paizia pen kuama’n eng mawkmawk lou ding uhi.
• Bangziak in.. Joseph hinkhua i chih kilawpna ding himhim omlou hinkhua ahi.

1. A pianpih sanggamte mahmah in a nuaisiah uh,
2. Kaw-khuk a a khiak uh,
3. Egypt gam a zuak mang a om,
4. Suak-le-sal a pi-a om.
5. Diklou tak a ngoh a om a, suangkul a luut.

• Mihingdan ah, hiaibang teng tuak om le-hang, bang i chi ding ua? Heh-a thangpaihna toh phuba ladi’a mansa a om theih ahi.
• Tua kia hilou in Pathian mahmah leng mohsa a, nungngatsan theihna khop dinmun ahi.
• Himahleh Joseph i etleh, a hinkhua ah a hel a, Pathian a gensia chih kimu lou himhim hi.
• Joseph in a tung a thiltungte a pom in, thuakzoutak leh dohzoutak in paw ngitnget hi.
• Hiai bang a i tung tektek a haksatna hong tunchiang in, bangziak a kei sese chi in kingaihsiatna kinei kha thei hi.
  Himahleh huai haksatna pen Pathian in Aphal ahi chih i theihchiang in pom theihna kinei hi.
• Joseph ngeileng Potiphar innsung hi in, a Ute' bawldan hitaleh, na utlou a, pomlou a ana kiphin hitaleh Pathian in amah ading in tuabang in kong dang honglou khathei a, a hinkhua in siatlam manoh zaw thei hi.
• Himahleh a tung a thiltungte pom a, theihsiamna a neihchiang in Pathian' thiltup bang a a paina ding kong honsak in om a, amah tungtawn in Pathian in a thupina puangzak thei hi.
• I hinkhua uh ki-enthak le, haksatna i tuahte, nupa kal, tate toh kal, lawmte toh kal leh khotang ah hitaleh...
• Nelhsiah leh bawl gentheih a i omkhakna te mihing i hihna ziak in hoih i sakdan in (eimah hoihsak dan in i tal pan hun om khanak hi) ki sialpi pan teek hi.
• Tua hunchiang in Pathian donglou in ei-le-ei i kidong sek a, Pathian in bang gen ahia chih ngaihtuah manlou in (ei-le-ei I kikhut dot khasek uhi) i kisakhe pahpah sek uhi.
• Huaiziak mah a Pathian in ei tungtawn a sepnop A neihte natawm semkhe theilou a, a vualzawlna dong kha theilou i de-aw chih in om hi.
• Lungkimlouhna ngen toh kidim a, zi leh pasal kineihna deih khoplou, tate' phakna tan a lungkimlou, mel leh puam hihna tan a lungkimlou, sepna a lungkimlou, neih leh lam a lungkimlou,,,, lungkimlouhna ngen toh ki dimtheih luat ahi.
• Ngaihtuah ding a i deihbel, tua haksatna leh lungkimlouhna i neihte i zatsiam a, i haksatnate' tungtawn a Pathian in hon sinsak nop om ngei ding ahi chih pom a Pathian' sapna aw ahi chih phawk ding ahi.
• Haksatna i chih Pathian in, "Kei honnaih in, Kei lam hon nga in…" A chihna hizaw a, tua tungtawn a sinsak ding poimohte hon sinsak a, hon zat utna athupi ziak a huai ding a kisakkholhna hon neisak ut hizaw hi.
• Ahihleh, bangchidan a i tung a haksatnate Joseph bang a pomtheihna kinei ding ahia chih i lungsim a om ding in gintakhuai hi.
• Kuahiam in, k’on etchetna ahi, na mualsuah leh vaihawmtu lianpen in k’on bawlding hon chileh, huai thei kawmkawm in haksatna tuak mahleng i puk kei ding uhi.
• Huai i theihlouh ziak mah ua a masalou ding pen a masa a koih a, i et ding pen i etkhaklouh chiang in, tua haksatna pen ei adi’a hunpha kipattheihna ahihlai a, i siatna ding a zatkhak theih ahi hi.
• Huaiziak in, Joseph hinkhua apan haksatna khel ah et ding bang om hiam chih tamlou en in, huaite mah vom gige in i hinkhua zang leng i chi ahi.
• I haksatna tuahte' tungtawn a sinding leh ngaihtuah ding:

1. Pathian' maipha zon gige ding ahihdan hon sinsak hi.
2. Gah manpha i suang theihna ding etkhiakna ahihdan phawk ding.
3. Lungsim siangthouna etchetna ahi chih theih ding.
4. Midangte adi’a panpihtu muanhuai hihtheihna di’a hon kisakholsaktu ahi chih mangngilh louh ding.
5. A Unaute a kisiik bang ua, midangte' lamdik a pitu hihtheihna ding a kalbi ahihdan theih ding.
6. Thuakzohna, dohzohna leh kingaihniamna etkhiakna ahi chih vom gige ding.
7. Pathian in a thuchiam leh a tupte a tangtun theihna ding a vanzat ginom hiding a etchetna leh thuakna ahi chih theih ding.
8. Ngaihdam theihna in thil ahihtheihdan lahna leh huai in hun haksa natawm a lungkimna hon tunthei ahihdan theih ding.
9. Ginomna leh thumanna toh hinkhua zat ding ahihdan theih ding.
10. Kialna apan a midang tampi hotkhiak ahihna ding leh midangte adi’a phatuam i hihtheihna ding ahi chih chiamteh ding.
11. Pathian apan vualzawlna a luut theihna ding a kong honna ahi chih haihlouh ding.
12. Pharaoh in Pathian thilhihtheihna a muhloh bang a, midangte'n Pathian thilhihtheihna a muh sem theihna ding uh ahi.
13. A tawppen leh poimohpen ah, Pathian' hihna phoulakna leh hinpihna, vaak tansak theihna ding a hun manpha ahi chih theih ding ahi.

• Huaiziak in, haksatna i chihte deihteel thu a tuah ahikei a, vangsiatna ziak leng hivek tuanlou hi.
• Haksatna khen a vualzawlna pai helhel ahihlai in, haksatna i tuahte ah a haksatna pen enlou in, Pathian in a gennop leh deihlam bang ahia chih en peuhle, Ama’n bangkim hon zousak zel ding a, a thilhihtheihna in honpi galkai zel ding hi.
• Huchilou a, lohching gige ding, hausa ding, lamzang ding; hileh lungkimna kinei ding i chihleh bel, zuauman ahi. I tan bangbang pomdan siam a, Pathian in phal ahi, deih nei ahi, huai bang hiding ahia.. chi a a deihlam i zon peuhleh lungkimna ei a om himai ahi.
• Gamchiam tunma a i phut ding him uh ahi a, huai theikawm in panla thakni, haksatnate pen a tawpna hilou a, gamchiam tunna ding a i kalsuan na'ng kalbi hi zaw ahi.

*Thugelhtu hon petu (Tg Muan Tawmbing), Elim Veng, New Lamka a om hi. DEW/ GAMCHIAM simtu tamzawte theihsiam di’n, Dorcas Hall Mini-Auditorium, Lamka apan online sermon hong kikhahkhe sekte, sim theih di’a na gelhkhe fitfit a, a nung sawtlou a social media tuamtuam a hon koihkhe zel, valnou suanhuai khat ahi. A tung ah lungdam lua hang.