“Hon zahtak peuhmah ka zahtak dia, hon musit peuhmah ka musit ding; a chi hi” (I Sam. 2:30b).
Thupatna: Hiai i tangtel 1 & 2 Samuel laibu adia a tangvom (key verse) chih ding ahi. Samuel laibu i sim chiang in, Toupa zahtakloute kia niam ua, Toupa pahtawite dopsangna thu ahi. Huchi ahihman in, Toupa’ khutsung ah ki omchiat a, a dopsang theih hinkhua zang i hi hiam, ahihlouh leh a kaihniam a omlel lel i hi hiam chih kivel chiat leng ut huai kasa hi.
1. Penninah leh Hannah: Elkanah in zi nih nei a, khat Penninah hi a, khat Hannah ahi. Penninah in tate nei a, Hannah in ta neilou hi. Penninah in a moupihnu Hannah ta neilou ahihman in simmoh a, lungkham sak hi. A ta neih suang in, Hannah tawng kapzel hi. Penninah hinkhua tam kigelh hetlou na pi, a moupihnu a suk lungkhamna thu leh a mahmah a puksiatna thu kigelh hi. “Ta tampi nei nu bahta hi” (I Sam. 2:5b).
Hannah in bel a melma Penninah in lungkham sak mah leh, a lungkhamna Toupa kiang tun hi. Toupa kiang ah thum a, a lungkimlouhna leh a lungkhamna gen hi. Huchi’n Toupa’n a nget tangtun sak in tapa Samuel pia hi. Samuel banah tate piak behlap lai hi. “A chiing nu’n ta sagih neita a” (I Sam.2:5b) a chih banah “Toupa’n a zawngsak a, a hausak a, a hihniam a, ahihsang hi” (I Sam. 2:7) chi in Toupa kianga a thumna ah gentel hi.
Vualzou leh hat kisa mahmah nu vuallel in puksia a, vuallel tak a om napi a Pathian mitsuan nu tuh vualzou in hong dingkhia hi.
2. Eli leh Samuel: Eli tuh Siampu ahi a, dinmun sangtak leh poimohtak nei ahi. Tapa nih Hophni leh Phinehas te nei hi. A tapa tegel in Toupa zahtaklou in Toupa mai ah khelhna liantak hih uhi. Hiai bang hun in Eli in a Tapate lau/ zahtak in, Toupa thu bang a thunun ngamlou hikha ding hi. “Bangziak in ahia ka tenna a na lat ding ua ka thupiak ka kiang a kithoih leh kei a tuam dia thillat pen lei toh sikden a, kei sanga na tate na zahtak zawk a, nou mau na kisukthauna dia ka mi Isrealte kithoihna hoih pente na zat uh?” (I Sam. 2:29) chi in Toupa’n Eli kiangah gen hi. Toupa’ a tung uah lungkimlou ahihman in nikhat thu in Eli leh a tapa tegel si uhi.
“Naupang Samuel a khang lian deuhdeuh a, Pathian leh Mihing deihsak in a om hi” (I Sam. 2:26). Tua banah Samuel in Toupa thu deih in, hin pih hi. “Samuel a hong khanglian deuhdeuh a, a kiangah Toupa a om a, a thu himhim leitung ah a kesak kei hi. Huchi in Dan apan Beer-sheba tan in Isreal miteng teng in Toupa zawlnei dia Samuel namkip ahi chih a na theita uhi” (3:19). Samuel in Toupa zahtak a, a thu zui ahihman in mite lakah lamsang tou hiaihiai hi.
3. Saul leh David: Toupa’n Samuel tungtawn in Isreal Kumpi masapen ding in Saul thaunilh hi. A hamphatna thei a, Toupa deihdan zuih tettet ding in kilawm hi. Toupa’n Saul Amelekte dou a, that chimit ding in thupia hi. Himahleh Saul in Pathian chih dan hilou in, amah pilna zang in Amelek kumpipa Agag a hing hawi banah belam leh bawngtal a hoihhoih, a thauthau-te that nuamlou hi. Kumpi dinga Sauthau nilh tu Pathian thugen zahtaklou hi. Huaiziak in Samuel in Saul kiangah Toupa’n Isreal gam hon sut a, nang sang a hoihzaw na innveng kiangah ka pia ta chi hi. Huai ban ah Pathian in Saul kumpi ding a’ a bawl kisik chi hial hi.
David ahih leh Jesse tapa belam chingtu ahi. Philistia mihat Goliath in Isreal sepaihte a chou lai va tuak kha hi. Isreal sepaihte’n lau chih gen taklouh, Kumpi Saul mahmah inleng lau in ling souhsouh uhi. Himahleh David in bel Toupa hatna muang in Goliath kihta hetlou hi. David in Toupa min suang in Goliath a dou chiang in, Toupa’n vualzoh na pia hi. Numei lasamite leh lamte’n “Saul in a sang a sang that, David in a sing a sing” chi’n pahtawi uhi. Saul in kiakniam lam a manoh lai in, David tuh Isrealte kumpi ding in a dinmun a det deuhdeuh hi.
Thukitna: Hauhna, siamna, pilna, theihna leh felna nei inla, Pathian zahna na neihkei leh a niamlam manoh nahi lel hi. Himahleh na dinmun niam mah leh, Toupa na lauh a, a mah na zahtak leh, Toupa’n hon phawngkang ngei ding a, masawn lellel, kiamlam man-oh lou a, saan lam manoh nahi hi. Toupa thu “Hon zahtak peuhmah ka zahtak dia, hon musit peuhmah ka musit ding” chih mite hinkhua a diktou tou lai ahi aw, Sanggam!
