Na lungtang tengteng toh Toupa ah muang inla, nangmah theihsiamna ah kinga ken:Na lampi teng teng ah amah thei in huan aman na lampite a pi tang ding hi (Pau.3:5 & 6)
Natna hipi huaisetak hon pal pih Toupan Natna satna, lungkham mang batna, sihna manna leh dahna kahna i thuaklai leh tuah lai nangawn a zong hon taisan ngei lou i Toupa min manpha toh na vek un khathak Chiabai.Leitung khosakna ah nek leh dawn tasam lou, silh leh ten tasam lou, lawm hoih ittu leh deihsaktu tasam lou a om laitak khawng in zaw “Toupa hoih hi” chih a nuam ding. Tuahphat ni leh lohchinni khawng in leng a nuam lai mai thei. Kha lam tuitak leh thathou tak a om hun in leng a nuam diak lai ding. Biakin sung ah biakna leh phatna hun zang a, Pathian mai a lung sim teng teng sung bua a salam thil a puakgik tuam tuam i neihte mangngilh zen a Toupa kiang a i ki-tuklut lai khawng in “Toupa hoih hi” chih tuh a thunon ahi pen mai hi. Hichi bang hunte tuh michih in a chih theih hun uh ahimah ahi. Himahleh huaite khen lam a leng Toupa hoihna muh ding na om lai lai ahi. Toupa hoihna tampite lak apan khenkhat sau lou in tuni in tak lang leng, hiai a nuai a bang in:
HON KEMPA AHI: Ei leh ei kikem ding chi leng i ihmut hun ding om thei lou ding hi. A tapa Absolom a kipan a taimang lai a David thumna “Khamuangtakin ka lum ding a, ih leng ka ihmu ding: Toupa nang mah mah na hi kei kia a leng bittak a hon omsak gige”(Sam 4:8) Toupa kepna tuh leitung mite security sang in a muanhuai zaw a bit leng a bit zaw tham hi. Kumpinu Jezebel in a thah ding lau a Elijah a tai lai in gim mah mah in Juniper sing nuai ah a lum a, a ihmuta hi. Ngaiin Angel in a hong khoih a, a kiang ah “Thou inla ne in” a chi hi. A man a en vial vial a, ngai in a lu chin ah tanghou pei, suangsa a hai minsa leh tuithawl a na om hi(1Kum.19:5,6). Jawlnei Elijah gimmah mah ahihman in tawldam ding in a ihmusak a, agilkial hun in tanghou minsa leh dawn ding tui pia in kem hi. Kumpinu Jezebel in thah tum ahihman in lau a khamuan ngai mah mah zong ahi hi. Toupa khamuanna aw tuh hiai ahi “Israel gam ah Baal ma a khukdin ngei lou mi sang sagih kei a din ka sit hi” a chi a hiai thu in Pathian in a jawlnei Elija lau leh thomhau, bei dong, lunglel, lungkia a om tuh a khamuan ta chih i mu hi.
HON AWLMOH LEH HON KHOTUAHTU AHI: Toupa hon awlmoh dan tuh sut a sut seng ding leng a hikei. I Laisiangthou BSI sutlaita ah hichiin na kigelh hi, Haksa i tuah chiang in, kuhkal tak a dai dide a tu in i ngak dia; Kipumpiak in i kun ding ahi,lametna omlai mai thei ahihjiak in. Vuak leh salh in om mahleng i pom siam vek ding ahi. Toupa mi hehpih thei ahi a, hon nial paisuak kei ding hi. Hon lungkham sak kha mahleh, a itna a muanhuai in a kip tawn tung hi. Dahna leh natna hon thuaksak chiang a amah leng kipak tuanlou ahi. Suangkul sung a lungkham tak a i omlai Toupa’n a thei a; I tan ding ua hon piak pen a i omlouh lai leh vaihawmna pisa a, thudik leh tang a vai a kihawm louh lai a thei hi. Pathian deih dan mah ahi sepkhiak a om tawntung. Toupa a ut kei leh kuaman bang mah hih thei lou ahi. A hoih leh hoih lou a thupiak a tung ahi lel uhi(Kahla 3:28-38) Laphuaktu khat in hichi in na phuak hi: Lungkham mang bang a ka om lai in, Jesun kei hon awlmoh hiam ? Puakgik a ka lung a jin lai tak in, Ka lampi sau a tawl huai in. Hon awlmoh hon khotuah ka thei, Ka dahna hon thuak pih hi; Jan khomial leh lam haksa ah, Ka hondampan kei hon khotuah hi (Biaknala No.235). Jesu kiang ah ka bit ding a angsung nuam tak ah, Ka kha a khawl sam ding a,A man hon liahkhuh ding. Jesu kiang ah ka bit ding ka buaina beita ding. Halleluijah Toupa ang sung mah ah..
HON GUMPA AHI: Bah leh chau, vuallel kisak laitak a hon gumtu leh hon pauhualtu tuh thathak hon guantu ahi a vualzohna hon tang saktu leng ahi. I siatna ding zong in melmapa setan in theihtawp suah in niteng in hon sual sek hi. I khelhnate zang in Pathian kiang ah hon hek sek hi, himahleh gingtu piangthakte a ding a gensaktu Jesu Khrist tuh Pathian taklam a tu in Pathian mai a ka sisan a ka tatsa piangthak gingtu muanhuai khat ahi chi a hon gum a, hon pauhual chiang in, Jesu Khrist a it mah mah a tapa jiakin ngaihdam in i om sek uh ahi.Huai tuh ahi gingtute bitna leh khamuanna, eite thilhih hoih jiak hizaw lou in, hon tantu, hon gumtu leh hon gesaktu hondampa Jesu Khris ziak ahi.
Toupa hoih hi vualzoh chiang in, Toupa hoih hi lohchin chiang in, Toupa hoih hi chidam chiang in, Toupa hoih hi lamzan chiang in, Toupa hoih hi khamuan chiang in, Toupa hoih hi kiningchin hun in chih chiang kia hilou in “TOUPA HOIH HI CHIKLAI PEUH IN” chi thei chiat ding in Toupa Pathian toh ki meltheihna, kichimatna, kizopna hoih tak nei chiat ding in Toupan hon vualzawl hen.
