THUPATNA: Eimah I kikhutdot thei a, hoih I sak bang in thupukna i kilak chiat thei hi. Hanapi in, TOUPA DONG MASA IN chih thulu a nei in, ngaihtuahna saudeuh pe le’ng ka ut hi. TOUPA’N, nang leh kei ading in thil hoih, thil pha hon gelsak a, himahleh a I dot masak louh chiang in, hon gelsak lampi apan pialkhiak leh zuih khak louh baihlam mahmah hi.
Joshua leh a vaihawmpih upate’n TOUPA a dot masaklouh uh poi mahmah hi. TOUPA’ Gamchiam (Kanan), Israel te’n a luah chiang un, a teng mite hawlkhiak ding, a lak ua a tengsak ua leh amaute adi’a thang (trap) suak ding ahi uh chi in vauhilh hi. Eks. 23:32-33: “Amau toh, hiam a pathiante uh toh hiam leng thukhun na bawl ding ahi kei hi. Na gamsung ah a teng ding uh ahi kei, nang ka tung ah a hon khialsak kha ding uh: amaute pathiante nna sep leh, nang a ding a thang a hih mahmah ding ziak in.”
Huchi’n Israelte’n gam honla pan ua Jericho la zou in, Ai khua leng la zou uhi. Huchi a gam kek tou zel ding a a kisak lai un, Gibeon-te’n pil chalak takin Isrealte toh kilemna thu hon khung uhi (Joshua 9). Huchih lai in, bung 9:14 ah, “TOUPA DONG IN THU A KAN MASA KEI UHI” chih i mu hi. TOUPA dong le uh bel Gibeon te toh lemna bawl ding pha sakpih lou hial ding hi. Aziak bel Isrealte kiang ah Kanan gammite toh kilemna bawl ding TOUPA deihdan hilou hi. TOUPA a dotlouh ziak un, Gibeonte toh lemna thu khung ua, amau lak ah leng buaina hongpiang a, mipite heutute tungah lungkim lou uh ahihdan kimu hi (9: 18). Joshua in Gibeonte toh a kal uh bawllem in, TOUPA’ temple ah sing leh tui tawi a, a Isrealte sikha di’a a pang den ding uh chi in hamsiat hi (9:23). Himahleh, Exodus ah TOUPA’N amaute thang (trap) ahi ding uh A chih bang in Gibeon te tuh Isrealte ading in thang suak uhi. 2 Samuel 21:1-6 ah, Kumpi Saul in Israel suante leh Judate a ding in phatuam a ngaih ziakin, Gibeonte that hi. Himaleh Gibeonte thah ziakin Jerusalem ah kum thum sung kial tung hi. TOUPA nam teel Isrealte’n a thukhun uh lah bawhse thei nawnlou, bohsia le uh lah amau thuakna ding ahihman in thang suak petmah uhi.
Vanglian TOUPA’N ei adi’a hon gelsak lampi zuih kan a hamphathuai omlou hi. Tua ding in bangkim ah TOUPA dot tuak hi. Joshua bung 1-8 sung ah, Joshua’ in TOUPA thuzak ngitnget ahihdan I mu. Hinapi in bung 9 ah Joshua leh vaihawmtute’n dong khalou chitchiat uhi. TOUPA a dot louh ziak un amau sung ah buaina hong piang a, thukhun bawl lamdang thei nawnlou ahihman un, Joshua in bawllem thoh hi. Pathian bawllem louh mihing bawllem zaw lemzou taktak theilou hi.
THUKHITNA: Tuni in TOUPA dot masak mah poimohpen ahi hon chisak hi. Tukhang ah, I nam-le-gam makaite un TOUPA dong lou uhi. I pi-le-pute un zu-bel khentam in TOUPA na zui ua, en bel zu-bel tungkhia in TOUPA min I lou uhi. Saptuam ah leng TOUPA dot sang in, khawvel paidan zuih baihlam I sa zaw-ta uhi. Mimal ah leng TOUPA dot masak sangin, eimah I kikhutdot zaw uhi. Jawlnei Jeremia in Kahlate 3:40 ah, “I lampite zong in enchian ni, TOUPA lam ah kiknawn ni” a chih bang in, I lampite chiat uh enchian a, TOUPA dot masak pen a nei ding in I kichial uhi. TOUPA’N simtute hon vualzawl chiat hen!
