Chin Lamthang Buansing te’ Innkuan Missionary Nasepna Tangthu Tomkim
Kei Chin Lamthang Buansing pen, ka nu Hau Khaw Don leh ka pa Khaikam Buansing te’ tapa kahi a, ka suahna leh khanliatna bel Lamka Manipur India hi a, ka omna pawlpi bel Evangelical Baptist Convention ahi. Gupkhiatna Tangthupha phuang a missionary nna kasep zoh kum 25 cing zo ta a, tu in ka zi Gou Siamching tawh ka nupa un mission nasepna thak (Lok-Ki-Seva) tungtawn in Guwahati khuapi, Assam state India pan in mission nasepna sunzom hi ungh. Pasian thupha ahi ta-nih ka nei uh a, amaute Kam Suanthang leh Betty Ning Hoihkim te ahi uh hi.
Kum 1996 May kha in kei, ka lawmnu Chiching, leh ka tapa uh Suanthang te in missionary nna sem a Tangthupha phuang ding in Lamka, Manipur nusia in Bengaluru a om Indian Evangelical Mission nasepna pawlpi na zom hi ungh. IEM pawlpi tawh kum 17 sung vingveng mission nna semkhawm hi ung. West Bengal state ah kum 10 leh Assam state India ah kum 7 kasep zawh uh ciang in 31st December 2013 in IEM pan in voluntary retirement la in, amau tawh nasepna ka khawlsanta uh hi.
West Bengal State ah mission nna ka sepsung un Pasian’ huhna tawh Adivasi minamte mi 50 Jesu kiang ah tun in, leh Biakna Pawlpi khat Lothabari khua ah na pankhia hi ung. Ka sepna uh minamte’ sungpan in Pastor khat leh Woman Evangelist khat kana sekkhia (bawl) uh hi. Pawlpite amau in vai kihawm thei, sum leh pai in kikemthei leh Pasian’ thu kihilh sawn thei dingin sinsakna kapia uh hi.
Missionary nasem dinga ka kuankhiak ciil un, ka Innkuanpih te un hong lungdampih pah lo uh a, sum leh pai tawh ong huh zolo uh hi. Tua bek hilo in ka Pawlpi te uh natawm in ko te huhna ding in bangmah neilo uh hi. Tangkhat leh tasam mahmah kisa mahmah kawm in Pasian’ hong sapna zui dingin, ka it-leh-ngaihte uh, leh ka khua-ka-tui te uh, nusia in kazi leh ka tapa uh tawh Lamka, Manipur nusia in Outreach Training Institute, IEM, Arutpani Nagar, Dharmapuri District, Tamil Nadu State, South India zuan in ka kipan khia uh hi.
Tuabang a lampi ah khualzin a ka pai zel lai un, Chennai khuapi ka tun uh ciang in ka tapa uh cisa leh khawsik (viral fever) nei in ong gim mahmah a, hihtheih bangbang in ka kikem uh hi. Ka sum neih khempeuh uh ong bei siangpah in, ann-nek ding natawm nei nawn lo in ka om uh a, missionary training na mun-leh-mual tunzoh na dingin sum ka nei nawn kei uh hi. Tua bang hun a gimthuak leh gilkial-tasam tak a ka om lai un, ka buaina uh leh ka haksatna te uh Topa’ kiang ah tun in, ama’ huhna ka ngen uh hi. Hehpihna tawh kidim Topa Pasian in ka buainate uh hong zohpih ahihman in, lamdang pi in Outreach Training Institute ka tung thei khong khong ta uh a, cidam tak in kha 5 sung Cross-Cultural missionary training hun neithei in, lungdam tak in ka zo khia thei uh hi. Pasian in agam nasepna ah, it-leh-ngaih innkuante nutsiatna, sum-leh-pai taksapna, leh gilkial-dang-keuna zong om thei ahihna kote hong sinsak hi.
Mission Field ka tun zawh uh kum nihna hiven, ka lawmnu Chiching in Womb Cancer (Nau bu Cancer) natna hong nei ahihman in lungsim tawltak leh buaitak in ka om uh hi. Tuabang hun in thungetna tawh hibang in Pasian ka hopih uhi: ‘Topa aw, nangmah nasem dingin nong sapna ka zui uh a, sep-leh-bawl bangmah neiman nailo in, tu in ka lawmnu in Cancer thuakna hang in buaina ka thuak uh hi. Hibang a thuakna ka neih uh hang in, nong sapna Gospel nasep ding pen lungkim takin kasem veve ding uh hi,’ ka ci hi. Tua zawh, ni sawtlo in, lamdang takin Topa in cancer natna pan in ka lawmnu hong damsak kikta hi. Pasian in, agam nasepna ah natna thuak ding om ahihna hong sinsak hi.
Missionary nasepna ka sep ciil un, Pasian’ hehpihna tawh ka sepna minamte uh’ pau leh ngeinate sinsiam theipah ka hihman un, ka sepna minamte’ un kote hong ngaina in hong lawmbawl pah uh hi. Tuabang a mite’ ngaihnatna ka tan uh ciang in, amaute’ kiangah lungdamna thu (Gospel) kasiam bangbang un ka hilh theipah uh hi.
Ka sepna uh mite’ maipha leh ngaihnatna lamdang tak a ngahthei pah ka hih uh hangin, Dawimangpa in, ka sepkhawmpihte uh tungtawn in hazatna leh langbawlna hong omsak in, ka nasepna mun uh pan in ko innkuan hawlkhiak ding thuthak hong piang hi. Cihna ding bangmah thei lo in cimawh takin ka om uh hi. Tuabang hun in ka buaina uh Topa’ tungah ka tut uh ciang in Pasian in ka buaina uh hong zohpih in nawngkaina omlo in ka missions nasepna uh lungnuam takin hong sunzom sak kik hi. Pasian in, ama’ gam nna ka seppihte uh tungtawn in bawlsiatna omthei hi cih kote hong sinsak hi.
Tangthupha theihpihna-nna sem a mission field masa pen ah ka om sung un, Dawimangpa in nakpitak in hong nawngkai sak hi. Khatvei leh ka Inn-kongkhak uh hong sungkalh in, Innsung ah tumpak theilo in kong pua ah hongkoih hun a om hi; khatvei leh luzang pan in tui tawh hong pumbuak-ek in tui-kawt pikpiak in hong koihthei hi; khatvei leh ann-nek hun ciangin ka kiangah hong ombang a thei ka hihmanin, agim namsia kasa mahmah hi. Dawite bel, mihing mel pua in, ka mumang ciangin hong ki-hil theizel uh a, ka nasepna uh mission field nusia dingin vauna hongpia den uh hi. Ken bel, Pasian tungah ka upna nga in, lauhna bangmah nei hetlo in mission nasepna ka sunzom zel hi. Vanglian Pasian in zohna tawh hong ompih ahihmanin, Dawite in bangmah hong lawh zolo uh hi. Tua ciangin, Topa thupha tawh Adivasi minamte’ sung pan in thu-um mi khatkhat in hong kibehlap toto in, mi 50 bang in gupngahna hong ngah theih uh ciang in, Biakna Pawlpi khat (Adivasi Mandali) ka phuanta uh hi. Pasian in, ama’ gam nasepna ah Dawimangpa’ bawlsiatna kathuak dinguh phal ahihna hong sinsak a, ahihhangin amah mah in gualzawhna tawh ko a tate hong ompih tawntung hi.
Mission Field, a nihna pen ah ka sep uh ciang in bel, Dawi nasepna ci tuampi khat na om leuleu mawk hi. Ka Innsung uh ah, hong ten-cilh a, khatvei leh tuibuk (wash-room) sungah om in naupang awng bangin awng thei zel a; khatvei leh ka tate uh khenuai peuh khuat sak a, khatvei leh ann-huan-inn sung a kikoih, hai-leh kuangte khiin in leng sak thei hi; Tua bang bek hilo in, zankim hun ciangin thawm ging lianpipi zong omsak thei zel hi.
Khat veivei ciangin, ka mumang lam in, Dawi pen gulpi lian mahmah bang in, ong kihil a hibangin vau na thu hongpia hi: “Na Inn-luahna uh nusia in paikhia un, hun sawtpi pek pan a ka omna sa hi in, hihlai mun ah nong om pen uh nawngkai sa mahmah hi ing,” hong ci hi. Ken bel hibangin ka dawng kik hi, ‘Pasian leh a itna thu, gen ding a hongpai ka hi uh a, kote hong buaisak kei in, buaina nong tut peuh mah leh hong thatlum ding ka hi’ ci in ka leh vau hi. Tuabang a ka cih hangin, Dawi gilo in kha guk sung, sun-leh-zan tawlnga hetlo in hong nawngkai sak den hi. Tuabang a Dawi in hong bawlsiatna hun sawtpi sung ka thuak uh ciangin, Topa’ tungah ka upna uh khang semsem in, zong hat semsem hi. Ka thungetna hibang ahi: ‘Topa aw, Satan leh Dawi in bangzah takin hong do zong in, nang bek mah kong muang uh a, muanhuaitak in nangmah’ Gospel nna ka sem veve ding uh hi,’ ka ci hi. Pasian zong, ka thungetna tungah lungkim hi ding hiven, kha 6 abei zawh ciangin ka Innsung uh a Dawi nasepnate khempeuh hong beisiang sakta hi. Ka nuntakna ah, Pasian nna kasep sungin, amah in, Dawi akipan’ bawlsiatna ka thuak ding phal mawk hi, ahihhangin ka upna hong hatsak sem sem in zohna tawh hong ompih tawntung hi. Pasian’ min phatin om tawntung ta hen aw!
Missions nasepna ah kum bangzah hiam sung, Inn ah ciah theilo ka hihman un ciah ding in phalna kanget leh ka Siapa un zong phalna hongpia pah hinapi in, asawt lo in hih bang in lai hong khak hi: “Na nasepna leh na dinmun pan a na khawl mawk pen lamdang hongsa lua hi ing, thuthak a om kikma dong na dinmun, leh na nasepna kei tungah kinga ding hi,” hong ci hi. Tua hun lai in, kei pen Northeast India IEM nasepna ah Regional Secretary for field ministries dinmun ka let laitak ahi hi. Ken zong, ‘Topa aw, ka Sia pa’ bawlsiatna ka thuak ding zong hong phal na hihman in, lungdam ing, ahita zongin, Nangmah in hong zohpih kik in ci in,’ thu ka ngen hi. Tua ciangin ka Siapa uh’ maisakna kapiak ding thu ka lungsim ah hong om a, ka maisak zoh ciangin lungnopna in ka kidim kik thei hi. Pasian in ka seppih leh katunga ka Siapa’ hong bawlsiatna tungtawn in sin ding hongpia a, tua bel maisakna ah gualzohna leh lungnopna om ahi cih ahi hi.
Kum 4 (2009 akipan 2012) sung ka Innkuan un, nakpitak in ka cina uh a khat-khit-khat in Zato-Inn ah ka lum den uh hi. Kei pen, khatvei thu in gil-peeng aat ding, leh sinkha a suang om aat khia ding in Zato-Inn ka lum masa hi; Tua ciangin, ka lawmnu Chiching zong, a naubu ah tumor om, leh gil-peeng ki aat ding mah in Zato-Inn ah thumvei tak, alum zihzeh hi. Tua teng bek hilo in, ka tapa uh Suanthang in sisan-cancer nei lailai zomah ahihman in, Zato-Inn mun nih tak, Down Town Hospital Guwahati, Assam, leh Velore Hospital Tamil Nadu, India te ah lum in, hun sawtpitak sung ka kikem uh hi. Tua bangzah a, natna ci tuam tuam te ka vei uh ciangin sum leh pai zat ding kicing zolo in ka buai mahmah uh hi. Ka sepna uh mission pawlpi in lah medical fund hong piak theih sun teng zong kicing zolo ahihman in, thuak cihtak in ka thuak uh hi.
Satan in, pumpi natnate tungtawn a hong thuaksak hi in ka ngaihsun hi; ahizongin thuaknate bang zahta in lian in, ahaksa zongin Topa’ tung bekmah ah muanzohna nga veve ding cih, leh amah deihna nasep bekmah sep tentan ding cih ka hanciamna ahi. Topa’ tungah ki aapna nei in huhna zong ka ngen a, Pasian’ hunciam hongtun ciangin ka vekpi un, khat khat in dam siangna ka ngah kikta uh hi. Pasian pen, natna khempeuhte akipan, hong damkik sakpa ahihna kiteltakin ka phawk thak uh hi. Pasian’ nasepna sungah, natna tampi thuak ding om a, damna zong om ahihdan kiteltak ko Innkuan hong sinsak hi.
Ka mission nasepna uh pawlpi IEM pan a voluntary retirement ka lakzoh uh ciangin, tangzai zaw sem a Pasian nasepna ah kakihel theihna ding uh cih ngaihsutna tawh in, Master of Theology in Missiology, SAIACS Bengaluru ah ka va sin hi. Ka Laisiangtho sin sung in kei khatvei, leh ka lawmnu Chiching khatvei mah Zato-Inn ah cina in kava lum kha uh hi. Upna tawh kalsuanna ah bel, sinding, thuak ding, leh theihding tampi na om toto hi. Pasian’ muanhuaina, leh avaang liatna, kiteltak a muh theih nadingin, thuakna haksa pipi maituah masak kul gige nahi cih ka sinkhia hi.
Laisiangtho sinding a ka kipat ciil in, ka laisinna ding tawh kisai in, hong vakding neilo ka hihmanin, haksatna tuamtuam hong ompah hi. Ahih hangin Topa in deihna hong nei ahi cih theitel ka hihmanin huhna hongpia ding a, hong zohpih ding cih ka muang mah mah hi. Amah a muang mite’ tungah amuanhuaina apia-tawntung Pasian in, ka kisapna khempeuh ah hong huh takpi ahihmanin ka laisinna tawh kisai hoihtak in ka zo siangthei hi. Kei laisinna bek hilo in, ka lawmnu in zong Theological Certificate Course in Librarianship sin zo a, ka tate un zong amau laisinna tuak hoihtak in hong zo theilai uh hi. Topa hoih hi! Pasian in, bangmah neilo kahih hangin, amah tungah upna ka neih zahzah in zohna hongpia cih hong sinsak hi.
Pasian’ hong piak vision thak bel, Northeast India a om Assam State, leh Southeast Asia gam tuamtuam 10 te ah Gupkhiatna Tangthupha tangko ding cih ah hi. 2016 kum a, ka Laisiangtho Sang kahna ka zawh ciangin, tua missions vision semkhia thei dingin Topa’ kiangah ka ngen hi; Kum 3 ka ngak zawh uh ciangin, Pasian hongpiak ahi, mission nasepna pawl thak likleh khat, ‘Lok-Ki-Seva,’ akhiatna bel ‘mite’ ading a nasem’ cih, Topa in hong patkhiat pih hi.
Lungdam, Topa thupha!
Lamthang leh Chiching
