Thumasa: Tu July kha i saptuam thupi "Pathian thutak kemtu muanhuai" chih toh kisai tamlou i taklang nuam hi.
Kemtu: Kemtu chih pen neitu chi le’ng dikzaw maithei hi, aziak tuh I neih pen apoimoh banga I zat di ahi. Sum kuah tektuk in apoimoh nek-le-tak leh damdawi leina khawng in zang ngamkei mawk le’ng I kep in omzia neilou ding hi. Huaiziakin Laisiangthou, Pathian thutak I sim a I kep kia hilou a apoimoh bang a I zat ding ahi. Laisiangthou thutak, a kemtu lel na hihia, kem a zangkhetu… chih eimah minal chiat kiveel ni.
Laisiangthou Bu Mah: Tulai in technology a khantouhna hong om toh kiton in kikhopna khawng a Bible tawilouh i thangsakta hi. Mobile app khong i download a portable taka I tawi theih hamphathuai hi. Rev. Ginnei Thang thugen ka ngaihna khat ah mobile I chih thil tampi tuunkhawm, ahoihlou le tampi telkha ahihna ah kikhopna a huai set hoihlou ahi. Laisiangthou, a text book mahmah tawi di ahi, aziak tuh bangmah toh kihellou siangthou ahihmanin poimoh ahi, chi hi.
Neitu Hihna: Pathian thu pen sim tam ding, theih tam ding ahi I chih lai in huai thutak I sim a I theih lel hun lou a, I neih a apoimoh banga I zat ding ahi. Jesu, gamdai a khem a a omlai in Laisiangthou thutak zang in Satan maituah hi (Matt.4:1-10). Bible scholar minthang khat in hichi'n gen hi, "Bible na sim chiangin khatvei nasim ah bangmah na theikei di’a, 5vei bang na simsuah chiang in asunga thugil kiphumgu na mukhe ding. Huai thutak nang na neih kia hilou a huai in nang honneih a, hon thunun chiangin khalam a piching na hi" a chi hi. Bible hizahvei ka simsuakta a ka pichingta chih himawklou ahi chih hon musak mahmah.
Hondaltu: Khatvei Imphal Division seminar a ka telna ah group discussion kinei a, Laisiangthou simna di’a hondaltu hi a theihte kikupna om hi. Group teng in point bangzah hiam a kithohkhomte laka thupideuhte - mit hatlou, hun kineilou, lunglutna tasam, mobile in honsubuai chihte ahi. Nanga bang hi’n na thei a??
Thukhitna: Laisiangthou simgige a mahni hinkhua a kem leh zangkhete hithei chiat le’ng tukha thupi lohching hiding, khalam hinkhua pichingte hidi hihang!! Tua hiding in Toupa’n hon vualzawl hen!!
….
*Thugelh hon petu, EBCC Delhi a i/c Papi Lapawl hihna len lel, laa leh thugelh lam a kiva ahi. Lungdam lua hang.
