Tu khang in chikmah a I tuah ngeilouh uh, tuak di’a le ngaihtuahna/manglam a le I mat ngeilouh hiai natna hileng Covid-19 in I leitung honnuai a, tu in I gam (Manipur) leng hon pellou in hong lutta hi. Hiai hun haksatak lai a vaihawmna len a, fel leh kizentaka a douna, kikepna a vaisai kha a pan ding tuh amhaihhuai leh haksa mahmah ding in ka gingta hi. Kuapeuh adi’a hichidan hun I tuah patna, experience neisa omlou I hihna uah a hoihpen ding ngaihtuahkhiak a, huaipen kichuptak a zuih chetchet ding chih bang tuh challenging law ding in ka koih hi.
A biktak in ei Lamka, CCpur District bang en le, hiai natna hik douna toh kisai a I District Administration te chitlahna, fellouhna lam a kigenna ka mu kha zeuhzeuh hi. A nna uh sah lawtel di ahihchi’a, I thiltuah uh lah nasa zaw-mah, fel bukim zoh di tuh haksa mahmah ding in ka koih hi. Mipil, misiam, a gen thei, sa thei, phun thei kidaihna Lamka a sitna (lungtunhuailou sakna) omlou a vaihawm ding tuh van a gah tuk in ka koih hi. Huchi kawmkal lak ah a hih hoihna/sep hoihna lam uh leng om mahmah ding in ka gingta hi. A chitlahna uh I muhte I genkawm kawm in a sep hoih khakte uh leng zong in huaite ah phat (genkhia) in tha guanle, amaule kipak in, tha ngah in, hong fel zaw seem ding un ka koih hi.
Tutan tan a I District Administration te hon paipih dante uh amau amun mahmah a om hi unchin, ei district mipite omdan/lungput/mizia bangle theipen di ahihna uah ei toh kituak ding a vai hon hawm uh hikha di ahi. Hon etkoldante uh ah haksa omtham mah inteh, haksa lehle I thuakkhawm a, I ngolh kei hamham nakleh chi a pan a, heutute hon makaih dandan a thumangtak a om pen tu-le-tu adi’n hoihpen mailou di hia ka chi hi.
Bangteng hileh Lamka te majority Christian, Jesu Khrist nungzuite I hi a, phunchiak, genhak, thumanglou a omlou in, tuhun adi’a eite tung a vaihawm di’a Pathian in hon piakte thuthu a om in, thumang peuhmah phot le akua-akua adi’a I damna ding uh leh a hoihpen ding hi ahi.
…
*Thugelh honpetu (Pa GTL), Ber Salai Area Prayer Cell a Convenor, Mission’s Committee a Asst. Secretry dinmun lenlel le ahi.
