Toupa’n, “Martha, Martha, thil tampi na ngaihtuah a, buai nei ve; thil khat kia a kul ahi; Mari in tanhoih a tel a, huai laksak ding ahi kei,” chi in, a dawng hi. (Luka 10:41,42)
Amasa in DEW simtute chibai. Hun haksatak i maituah lai in Pathian’ hoihna in hon ompih in March kha Pathianni thumna bang i muh theih thil lamdang ahi a, Pathian’ min i phat hi. Luka 10:41-42na thu a hiai thuvual ‘THIL KHAT KIA A KUL HI’ chih in tutung ka simkhak in hon dawtzot hi in ka thei hi. Nidang-hundang in ka simkha tham; himahleh tutung a ka simkhak a, a hon khoihdan tuam hi in ka thei. Hiai kammalte tuh Toupa Jesu’n Martha nek bawl, buai mahmah in, a naunu Mary in huh teileh chih ut in, Toupa’n a nau sawl dia a ngetna, a dawnna ahi. Hiai a “thil khat” a chih Toupa’n bang a genna hi ding hiam? chih ahi hon dawtzot hi a ka theih.
Hiai mun a ‘THIL KHAT KIA A KUL HI’ Toupa’n a chih hi dia gintakhuai penpen tuh, ama’ khebul a tut a, Amah Master Teacher apan ngaihkhiak ahi. Thil dang tengteng sang a poimohzaw tuh Toupa khebul a tut, a thu ngaihkhiat hi ahi. Tua mah tuh Mary in thei in, poimoh zong sa in, a innsung ua Toupa a lut apan a khebul a tu in a thugente ngai in hun zang hi. Tua mah tuh Toupa’n hoihsa in kipahpih hi.
Tulai khovel ah buaipih ding tam petmah hi. Tuma kum 20 paita in bel hiai zah lawmlawm buaipih ding om nailou hi. Social media platform tuamtuam hong kipan thakte’n hong subuai zou mahmah hi. Adiak in eimite a ding in innlam buaina in hong behlap zomah lai, tua in hon nak sukkhak diak in social media hitaleh, thilteng phial ah huailam kia kimitsuan maita bang hi. I salam buaina in hon zel zou lua ahihman in khalam leng nakpitak a hon sukha hi. Huai kia hilou in India gam sahkho kulmutte gamtatnate in zong hon lunghimohsak in hon patausak mahmah hi. Hiai i dinmun leh i thiltuahte pumpelh zoulou leh pumpelh theilou in i buai petmah chiat uhi. I buaipih ding mah zong ahi. A ziak bel i dinmun patauhhuai hi. I dinmun tua bang a i buaipih lailai a i gen ut bel, bangkim tung a thunei Pa i phawkkha hiam? Amah i buaipihkha hiam? I buaipih louhkhak ding lauhuai petmah hi. Hiai bang hun ah Pathian’ pina poimoh sem i hih man in, amah a kipan lamlahna i ngahna’ng in a khebul a i tut a, amah apan a thu i ngaih ding uh poimoh diak hi.
Hun haksatak mai a ding i hihlam haihvual hilou hi. Hon veng in Toupa’n i thuumnate hon taksuahsakleh chih i lunggulh hi. Sahkho zalenna i deih, i gam hong thovengleh i ut, tua ding in theihtawp i suah, himahleh ei theihtawp suah in bangmah koloksak zoulou bang hi. Tua bang ahihman in “THIL KHAT KIA A KUL HI” Toupa Jesu khebul a tut a, ama’ sinsaknate ngaihkhiak poimoh hi. Toupa’n ei adia hiohpen thei hi. Ei sang in ama’n hon theichiangzaw hi. Hun haksa a ding himah hang; himahleh Pathian bangkim tung a thunei ahihlam mangngilh kei ni. “THIL KHAT KIA A KUL HI.”
