Ni 26 sung hospital ah hun zangzou innlam manoh in ka pai ua, inn ah lupna tung ah I honglum zaw anuam khop mai. Ni tampi siik tutna tunga hun zanga asun-azan a kitu ahihna ah, lupna a I honglup leh I nungzang guh bang in, “Ka damhuai huai” chi zou hial leh kilawm a kale.
Nenem ahihleh ‘hoih lawta’ chi a hon pawtsak uh himahleh akhuh beitheilou in a khuhkhuhna atawl-in-atawl thei hi. Banah niteng in nak haksa hongsa deuhdeuh a hospital alou theilou in lut ngai nawn hi. Hospital pawt zoh kha khat phalou in a windpipe block ziak in operation neih ngai teitei ahihna ah hospital ka lutnawn uhi.
Aban a ka thiltuah uh, amah kammal/ agelh hiai ah k’on koih ding.
EBCC Bangalore 10th Anniversary (Feb 2017) Souvenir Zingsol adi’a agelh ahi.
Pathian' Muanhuaina Ka Thei Semsem
- Evan. Chiinlalnem Buansing
Tuni a Toupa' muanhuaina keimah in ka na chette hiai a suahkhe thei di’a ka om man in ka kipak a Pathian min ka phat ahi.
Mitampite'n Pathian muanhuaidan i thei chiat ding ua, ami i tuam dungzui un ei a hong kilatdan leng tuam ding ahihman in tuni in kei a A muanhuaidan k'on taklang ding hi.
Kei mimaltak a et in, kei ah etlahhuaina ding, mel-le-puam, siamna-pilna mite bang in ka nei hetkei chih ka kithei a, himahleh Pathian in amah nna sem di’a ching honsa ahi ding a, 2012 in Toupa'n a gam nna sem ding in a hon sam a, nialvual hi a ka theihlouh ziak un ka nupa un 2012 in Indian Evangelical Mission (IEM) tungtawn in sem di'n ka kipiakhia uh hi.
Pathian nasem di’a kipiakhia himahle ung, kisit petmah in, mi' kiang a gen ding natawm ka zum maimah hi. Thugen siamlou banah siamna neilou in ka kipum suanlah hi. Huchi in Bangalore ah bangtan hiam Church Ministry a ka om zoh un field ah hon sawl ua, tuazoh OTI (training centre) ah training di'n hon sam uhi. Tua hun in naupai ka hi a, training lai mah in Bangalore ah nau k'on nei a, a ni 10 (sawm) chin ni in OTI ka lut nawn uhi. Hun bangtanhiam zoh in naungek toh class la zou zel himahleng December 27 ni in khosik avangkim in ka nei zel hi. Huchi in Dec. 29, 2014 ni in class nih laman, ka khosik in hon phak ziak in adang omlaite lalou di’a kingen in room ah ka nau toh ka na pai a, sun annek hun in leng an va ne zoulou in sung-nim leh khosik in ka om hi. Nitak hun in study class tel zoulou room ah kei toh naungek kia ka na om ua, lawmte teng laisim in class room ah paivek uh hi. Huai kal in khosik sangtak leh luak ka thuahden a, mobile phone lah kuamah zat phal ahihlouh ziak in a ki-submit vek hi. Kuamah sap ding ka kiang nai ah omlou hi. Kei lah paikhia zoulou in nitak dak 10 PM tan ka om a, ka lawmte a hong pai un a bahgawp ka hita. Avangkim in ka lawden a, ka Pasal (ka Unang Donang Buansing) in luakkhaamna hon pezel mahleh nengchik leng phatuam lou abang hi. Huchi in dak 2:00 AM in khophawklou in ka puksia a, ka khanloh nawn leh ka Unang in mangbatchitak a hon sam somsom ka mu hi. Ka tanu kha khat valzek leng lupna tung ah adon man omlou in kipek siangsiang a, ka ngaihtuah a, Oho! Toupa'n ka kha hon pekik nawn eive, Toupa si hileng hiai naungek bangchi ding a, kua’n don ding chi'n ka thum hi. Ka halh nawn tak in ka Unang le kintak a taipawt in room kiangate avaphawng a huchi'n gari in Hosur ah hospital khat ah hon pua uh hi. OTI ka nutsiat dek in Toupa'n ka lungsim ah "tu in ka muanhuaidan na thei ding" chia hon houpih in ka thei a, hiai thu kiakia ka lungsim ah agingdenta hi.
Hosur a hospital ka tun un ka soute (pulse) niam lua, ICU ah om ngai hon chi ua ICU ah hon koih ua, huai nitak apan ka nau toh ka giak kha nawnkei hi. Huai zan khat sung in ka sum neih sunsun uh a bei ngal a, a zingchiang in Bangalore a St. John Hospital ah hon refer ua, khutvuak in Bangalore ka hon zuan uh hi. Tu in zaw Toupa muanhuaina akinaak lat mahmah mai hi. St. John Hospital k'ong tung ua, ICU ah om a ngai nawn a, ICU a om man lah nikhat a Rs.25,000/- khawng ahi a, khutvuak a hong tung ka hi zawmah uh hi. Himahleh Toupa'n akul leh poimoh ding teng a na koih khin dimdiam ahihlam tu'n ka thei semsem hi.
Naungek dontu ding bang ana koih a, puansilh khat leng keng lou, kisakhol manlou a hong tai himahleh ung, puansilh-niikteen a honna tuamtu ding bang Pathian in ana koihkhol a, naungek leh apa leng silh kitasam hetlou in Toupa'n a muanhuaidan a mite tungtawn in hon musak hi.
Damdawi-inn a bill gen louh damdawi man, naungek an ding toh nikhat a ka sum zatkhiak uh tuh atam petmah hi. Himahleh Toupa'n kitatsat lou in a poimoh bangbang in hon pia in naungek bang leng ka damlouh sung in ana khang hoih mahmah mai a, OTI ka nutsiat dek a Toupa'n, "Ka muanhuaidan na thei ding" hon chih tuh adik in a thupi petmah mai hi.
January 25, 2015 ni in damdawi-inn nusia thei di'n Toupa'n damna honpia hi. Ka gawl ventilator kal khat val thuah ahihziak in ka wind pipe hong block nawn a, huchin March 7 ni in ka gawl (throat) operation bawl in nakna ding pipe hon thuahsak uh hi. Hiai operation hun in na ka sa petmah a, ka gawl a pipe ahon thunsuk un na lua ahihman in ka kikoukhia a atawp in khophawklou in ka om hial hi. Ka damsunga ana ka thuaklahpen hilai in ka thei hi. Himahleh Toupa'n hon taisan lou in thuakzou di'n hatna hon pia a, operation zou tuh ka "aw" ka kam ah a pawt nawn kei himhim hi. Kha 9 sung pauthei lou in ka om a, himahleh hiai hunsung tuh khalam a vualzawlna ka tan hun pen hi in ka thei hi. Kha 3 zoh in a pipe khek angai a, akituak plastic a om louh man in steel hon thuahsak ua, hong nasia a, analaw petmah hi, anai khawng om in zan ale ihmu theilou a omsek in ka kingaisia petmah mai hi. Laisiangthou ka sim chiang in leng hon khamuan zoulou abang hial hi. Huchi’a ka om zel lai in nitak khat Isai 49:16 tungtawn in hon houpih a, Pathian in hon mangngilh leh miteng in hon phawkpha nawn lou ding bang a ka kingaihtuahlai in Pathian in, "Ka khutpek sung kuak a hon gelh a, na kulhbangte ka ma ah om gige ahi" hon chi zaw lungmuang in Pathian in hiai zahtaka a muanhuaina hon lah nung a leng muang taktak zoulou ka na hihdan ka kithei a, huai ni apan in zaw lungmuangtak in ka om a, ka kipak petmah hi.
Toupa'n, paukhiak theih khawng vualzawlna thupi leh manpha ahihdante hiai kha 9 sung ka pautheihlouh hun in honna zilsak ana hiden hi. Atawp in Nov 21 in ka gawl operation nei nawn in a block na teng hon atkhiaksak nawn ua, huai hun in leng tawlhuai leh gimhuai, ningtelhuai petmah ding bang mahleh Toupa'n Isai 49:16 a hon houpihnate' ziak in ka thuakzou hamham hi. Ka khabe toh awmsa khuikhawm a ni 16 sung haksa sapipi in ka om hi. IEM a heutu hong vehte hon kahpih hial leng om uhi. Himahleh Toupa'n hatna hon pia zel a, ni 16 zoh in a khuina hong lakhia ua, himahleh ka dak thei kei zel hi. A tawlhuai lawzel hi. Exercise (Physio Therapy) te tungtawn in ka ngawngte awl in hong hoih a tu'n Toupa muanhuaidan, a thupidan ka mu hi. Ama’n leng atam a, hun haksapen ah leng Toupa zaw muanhuai petmah ana hi e chih hiai teng ka tuak nung in ka theisiam panpan lel hi.
Atung a ka testimony simtu unaute, naktak a i thuak ma in Toupa muanhuai ahi, muanhuai petmah ahi, bangkim a bangkim ah muanhuai ahi chih i theihsa himahleh thei thakthak ni. Toupa'n a nasem di’a hon sapna peuh ah amah muang in kalsuan ni. Kisit luatna tuh Toupa i muangzou kei chih i latsakna khat ahi hi. Kiletsak ding bel ahi kei, himahleh ei septheih ding hun a hon piakte kilawptak in amah muang in sem lehang Toupa muanhuaina hong kilang ding.
Simtute tengteng Toupa'n hon vualzawl hen!
Thukhitna: The Longest Hour chih topic zang a kon gelh 1,2 & 3 te I hon nunget kik aleh a tung in minute 5 sung khuaphawklouh hunsung sawt ka sa mahmah hi, huai ban dakkal khat gari taina hun sawt petmah, kha khat phadek phial hospital a om ahong sawt nawn sawnsawn a, huaizawh kha 9 sung a pautheihlouh (tracheostomy case) a hong om nawnsawn lai hi hiai teng ka ngakzohna uh Ama’n ahon chiam, "Be still and know that I Am God" ziak in ka ngaakzou ua, atung lam in theihsiamlouh ka hau mahmah uh. Hiai Bible tang i en ding:
√Sawina himhim thuaklai in kipahhuai in a langkei a, khasiathuai in a lang hi, thuak nung in huchi a sawizawt a omte ding in gah khamuanhuaitak leh diktatnatak a suahsak zel hi. HEBRUTE 12:11.
√Tuin khemna chiteng ziak in hun sawtlou lungkham tadih mahle uchin, huai ah nakpitak in na kipak uhi. Na ginna uh ze-etna, dangkaeng mei a ze-et nung nangawn a mangthang zel sang a manpha zaw, Jesu Khrist kilak chiang in phatna leh pahtawina leh thupina ding a hong hihtheihna ding in. 1 PETER 1:6-7.
Tu inzaw dam in innkuan nui khawm thei, kikum khawm thei in ka omta uh hi. A honpidan theisiam kei mah le ung, A honpipa ka theichian uh hi.
Toupa, ka kipak
Hallelujah!
