2014 Khristmas hunte zangzou in classte k’on pan nawnta uhi, huai hunlai IEM training Centre, OTI (Address: Arutpani Nagar, Attur Road, Mugalapally Gate, Thummanapally , Hosur, Tamil Nadu 635105) ah omlel kahi ua, ka lawinu Chiinlalnem leng nau nei khin phet, class le a lazel hi.
December 26,2014 nitak lam apat khawsik in apha pan a damdawi tang khat khawng a nek chiang in phazel hi. Himahleh apha mun deuhdeuh a,nisim 29/12 in classte a la kuitung zoulou in a kimkhat la in ka pindan uah tawldam ding in sun lai in ana pai hi. Annekna buuk a sun-an in le hong pusuak ngapkei a, ka laksak hi. Nitaklam hunte zangzou in nitak-an le ne ngaplou in pindan ah anek ding katawi hi, himahleh, huai leng a ne ngap nawn kholkei a, luak toh hon thuahzel zomah lai hi.
Nitak in laisim hun in leng kei kia in Library lam ah kapai a, ka sungte anuta un pindan ah ana om uh hi. Ka lawinu ana tawl mahmahta zaw ahidi’a nitak dak 10 lak in pindan ka lutleh ana lua a, huaite hahsiang mengmeng in lum di’n kong kisa ua, himahleh luptheih ding vual ahikei…! Ke’n leng medical in-charge te kasam a, damdawi luakkhamna atang (tablet) kia omziakin, huai pezel, anekchi’a lah law khezel… adan hong om zawkdeuh tak in hon ihmut san a, huai zoh in zingkal chi’a damdawi-inn a pai ding chi in (medical in-charge in) hon paisan phot hi.
Kou innkuan teng buaisim kawmkawm in ka om ua, zinglam dak 2 gindek in "ka gilkial lua an ka duh" hon chi a, nek ding ka piak deklai tak in,“Ka dailen suak” hon chinawn a, a chih toh kiton in kho phawklou in ahong puk hi! Akinthei bang pen in ka phong a, amailak tui a theh in minit 5 sung khawng ka phon nung in khua a honphawk theinawn hi. Khua a hon phawk tak in kei leng taikhe zok in ka pindan kiang uate ka vaphawng zokzok a, amau ka heutute uh ahon sapsak ua, kisakkhawlna hun omlou in Hospital lam kadelh pah uh hi. Ka omna ua pat Hosur (TN) a hospital hoihdeuh pen km 21 a gamla ahi. Kei leh Nenem gari nunglam ah katu ua dakkal khat phalou taina himahleh hiai hospital katun kal uh ka ngaklah petmah, kei ding in hiai dakkal sung a sawtpen hun (The Longest Hour) ahih ding ka gingta hi. Huai hun sung in thumvei hon ihmut san dekzel a, ka phong thithe mai hi.
Ka pianthak tung 2001 in Pathian in honna houpihna Bible tang hiai ahi – “Hiai thil mahmah gingta ing: Amah nou a nasep hoih panpa’n, Jesu ni tanpha in a zoukim vek ding”(Phil 1:6). Hiai haksa katuah hun a Pathian kiang a ka claim gige Laisiangthou tang ahi, ka thumna gige ahihziak mah in tua gari sung ah leng khua ahon phawk hun chiangin Pathian kiang ah, "Kou nupa ah thilhoih hon patpih chin a, Na thuchiam tangtung sak zoulou ding na hi hia, Toupa??" chi in Pathian ka chouzel hi.
Khua a hon phawk kei dekzel a, ka phawng zel hi. A hong halh chiang in ka thumzel, thu tampi leng kagen theikei, huai hun in thum dingdan natan buaizou phial in a tung a ka thumna teng mah ka ngen zel mai hi. Thumvei khua phawklou dek in a om a, atawptawp in damdawi-inn katung khongkhong uh hi. Nenem, ICU ah akoih ngal ua kou akuan teng damdawi-inn ah ka tu khawvak uhi.. Huai hun sung teng ke’n ka tanu uh, Np. Lunlun (khakhat leh ni 20 vel pha pan) ka pomchip den hi.
Zingkal in sisan a liamna (blood infection) nei ahihdan hon gen ua, huai liamna asanluat ziak in alungtang lam effect hikha ding ahi chih hon lauhpih ziak un Bangalore lam ah honsawl uhi.
(Sutzop di)
…..
*Unaupa Donang Buansing (Pa B Suanzakap’ tapa), B Kaljang khawsuak, tua CYA Road, New Lamka a khawsa ahi uh. A pianthak tung sim, Class 12 exam pemanlou in Bible zil di’n kuankhia-a,B.Th., Kerala apan in zou hi. Tua zawh Bangalore a M.Th zil di’a a kisak lai in sum-e-pai haksatziak in sunzom theilou in a om, Bangalore ah private sector a kum 6 phial a sep kawm in EBCC Bangalore ah kizattheihnana ah kizang hi. Tuesday Worship Service phutkhetute lak ah tel; Missions Committee ah Chairman, leh, tu in TBSUC ah committee memberkhat in... Indian Evangelical Mission(IEM) pawpi tawh 2013 apan seemkhawm,missionary, damlouhna guhtak a tuah uh 2014 apan Bangalore base in heutute’n semsak ua;a thiltuahgelhkhiak, DEW a suah di’a honpiak I lungdam lua. TOUPA’N thupina tang hen!
