Ni 5 (nga) paita a thiltung, Khristiante ading in ni poimoh mahmah hi ding hi. May 19, 2020 in Khristian ginna gumtu (apologist) Ravi Zacharias in a damlouhna apan damsuah zoulou in leitung a anasep khawlsan in Pathian kianga tangtawna om ding in leitung haksatnate nusia hi. Social Media simna apan in, mi tamtakte patauhna, Khristiante ading a mipoimoh (RZ) a sihnung in amah bang midang a om diam? chih dotna ahi. Khrist a ding a mihangsan tampi in hon paisanta ua, himahleh, Pathian in Amah gumtu ding mimuanhuai akhang-akhang in tatsatlou in mi nei hi.
Jawlnei Elijah in kumpinu Jezebel lau a ataimanglai in Juniper sing nuai ah tu in Pathian kiang ah sih a ngen hi (1 Kum. 19:4). Huai kia leng hilou in lungke mahmah a om in jawlnei teng kumpinu’n that khinta hidan in Pathian kiang ah report bawl hi (1 Kum 19:10, 14). Himahleh, Pathian in, “Baal ma a khukdin ngeilou leh amah tawp ngeilou [h.t. Baal ma a kukdin ngeilou] mi sang sagih kei adi’n ka siit hi” (1 Kum. 19:18) chi in dawng hi. Pathian in Amah ading a mi hangsan, khang tenga nei ahihdan hiai in hon musak hi.
Jesu Khrist nungzuite’n Jesu’ sinsakna hum leh gum uh a, a hinna uh leng itlou in Khrist ading in martyr uhi. Saptuam masa, Jesu sinsakna leh ginna gumtu masa hia theih Justin Martyr (100-165 AD) in First Apology (155-157 AD) a gelh pansan in tuni tan hiai thumal zang in Khristiante ginna gupna tawh kisai in Apologetics kichi thumal kizang den hi. Justin Martyr in a laibu ah Rom Kumpi kiang ah Jesu sinsakna zuihtak ahihdan ethical & philosophical argument zang in gelh a, Khristiante soisakna tawpsan ding in ngen hi.
Khristian apologetics dan a theih hikei mahleh Martin Luther (November 10, 1483 – February 18, 1546) in Jesu Khrist sinsakna gum a, Lai Siangthou suut in hilhchetna bawl hi. AD 1517 in “95 Thesis” chi a I theih uh tungtawn in Khritian sinsakna laigil – sola fide, sola gratia, leh sola scriptura – ah Saptuamte bulphuh kik in om hi. Amah leh midang Khrist ading a mi hangsan tampi gen senglouh ding Pathian in tungding a, tuni tan in amin uh mangmoh hi.
Tunai lamdeuh ah lutta le’ng, Evangelical te ading a khuam poimoh mahmah, apologetics chi a theih hi kei himahleh thugen minthang Evangelist Billy Graham (November 7, 1918 – February 21, 2018) ahi. Tunitan amah bang a thugen siam leh minthang omlou phial ding khop a kigen ahi. A sih nung in atapa in a sulnung zui in Pathian tanchin hoih gen in Pathian ading in theihpihtu muanhuai leh Khristian ginna gum in kalsuan zel hi.
Evangelical scholar UBS Pune, India a leng Bible Teacher a hongpai ngei John Robert Walmsley Stott (John RW Stott chia I theih uh | April 27, 1921 – July 27, 2011) ahi. Amah Anglican saptuam ading a ordained priest ahi. I theihna ding un Bible Commentary leh Theological laibu tampi a gelhte gen louh in a laibu gelh minthang mahmah “Issues Facing Christians Today” 1984 a kisuahkhiak apan tuni tan in reprint& enlarge in omtou den lai hi. Amah makaihna nuai ah Ph.D scholarship petou ngitnget ua, a chawmte uh Langham Scholar kichi in kisaktheihuaitham in tuni tan amin mangmoh lai hi. Pathian kianga a kipiakna in ji neilou ding in thupukna la hi.
Christian Apologetics kichi laibu 1976 a suahkhiak, a gelhtu Norman Leo Geisler (July 21, 1932 – July 1, 2019) ahi. Amah ahihleh Ravi toh hun tampi ana zangkhawm laisiam khat ahi. Amah systematic theologian leh philosopher ahi a, alaibu tamzaw apologetics lamdeuh ahi. 2004 in “I Don’t Have Enough Faith to Be an Atheist” chih suahkhia a, tua apan in Atheist te toh kibeihpina ah amakai leh tanglang mahmah khat hong hi hi. Nikum in leitung hon nusiat santa hi.
Ravi Zacharias (March 26, 1946 – May 19, 2020) ahihleh India mi, Canada a piang American a khanglian ahi. South Asia Institute of Advance Christian Studies (SAIACS), Bengaluru a “Ravi Zacharias Chair of Christian Apologetics” kichi akipat ding in Bible student ka hihlai ahi a, amah tawh hun zang khawm, MoU ah suahkaihna hun poimoh mahmah a telkhak hamphathuai mahmah hi. Tu in hiai Chair pen hoihtak in paitou thei zel a Dr. Varughese John in (hiai chair) makaih lel hi. Khristian ginna gumtu ithuai leh amin mang nawnlou ding Ravi Zacharias ahi.
Huchih lai in hon dampih lai William Lane Craig (August 23, 1949 a piang) ahihleh philosopher, theologian, historian, leh apologist ahi. Huailou in New Testament scholar Craig Alan Evans (January 21, 1952 a piang) inleng tuni tan hon dampih lai hi. Hiai gel min Apologetics akigen chiang in maihkhak hilou uhi. Lee Patrick Strobel’ laibute ah hiai gel bang in mun laigil luah uhi. Lee Patrick Strobel ahih leh theologian hikei mahleh Khristian ginna gum in Ravi lawm hoih mahmahte lak ah tel hi. Alaibu gelhte: The Case for Christ (1998), The Case for Faith (2000), The Case for Creator (2004) teng mithang diak ua; huailou “Case for” chih series a nei in Case for Easter, Case for Christmas, Case for Grace, Case for Miracles, Case for Real Christ (Historical Jesus), Case for Christianity chihte leh adangdang gelh hi.
Naupang mahmah, Medical Doctor leng hi, Muslim kulmut mahmah innkuan apan khangkhia Khrist ginna ziak a innkuanpihte hawlkhiak a om Nabeel Qureshi (April 13, 1983 – September 16, 2017) in Khrist ading in ahun tam zang mankei mahleh a min kigen mangmoh ding ahi. A Testimony gelhna laibu “Seeking Allah, Finding Jesus: A Devout Muslim Encounters Christianity”, 2014 a suahkhiakin om hi. Tua nung in, Ravi Zacharias toh kithuah thei mahmah uh, nasem khawm a aomlai uh 2017 kum in cancer natna thuak in leitung ana nuseta hi.
Tuni a bangziak a hiai teng gelh suk doudou I hia? Hinkhua kichi bang in manpha sak hiam chih I gen nopna a hiai teng gensuk nilou hizaw I hi. Laisiangthou ah a mi damsawt pen Mathusel ahi a, kum 969 dam hi (Gen. 5:27). Huchihlai in huai hun lai a ding a sawt dam hetlou himahleh ahinkhua a Pathian tawh tonkhawm a hunzang khat om, amah ahihleh Enok ahi. Enok, kum 365 aphak in Pathian in ahing in latou hi. Laisiangthou in hiai bang in gen hi: “Enok in kum sawmguk leh nga a hih in, tapa Methusel a nei hi. Methusel a neih nung in Enok kum zathum sung Pathian toh a tonkhawm ua, tanu leh tapate a neilai hi. Enok damsung tengteng kum zathumleh sawmguk-le-nga ahi. Pathian toh Enok a tonkhawm ua, amah a omta kei a; Pathian in a lata hi” (Gen. 5:21-24). Kum tampi dam kei mah leh a hinkhua Pathian toh zangkhawm a, leitung a mi damsawtpen suangtu in pang hi. Tuni a I gennop a hihleh leitung a damsawtna in hinkhua manpha sak ahi kei a, tuhun I zat dan in I hinkhua manpha sak zaw hi. Tuni hun bang chi’n na zang a, hiai in na tangtawn hinkhua ding geelpha ahihdan phawkthak in. Leitung hinkhua manphatak a zang thei chiat ding in, simtute, Pathian in hon ompih chiatta hen!
