Kuapeuh tawmchik tung a ginom lou, tampi tung ah leng a ginom kei uhi (Lk. 16:10)
Nidang in sum tawm mahmah in, a nei tam lou ahihman in, mi thil neih bang bang i deih leh huai thil neitute poimoh leh deihlam toh a van mah a khek ngai hi. Sum zang lou a van leh van kikhek tuah hun ‘kibelkhek’ a neitute lungkimna ahihnak leh khat lian khat neu chih toh kisai lou in kikhek lel mai uhi. Himahleh tuchiang in (sum), mi tengteng neih hong hita, a zawngpente’n leng i van neih tengteng lak ua a tam pen hita ding hi. A lamdang mahmah tuh Naupang neute bangin leng deihpah mai ua, nidanglai mi laitheiloute’n zong sum note, sum sik a phazah na thei mawk uhi. Vanzat tangzang pen, mi chih zat theih di’a bawl, munteng ah, chiklaipeuh a zat theih, lei theih louh nei lou, asia-apha lei thei vek.
Sum-Le-Pai Zon Ngai Ahi: Sum nak zon mahmahte’n tampi mu in, tampi mah nei in, van manpha tampi lei zou, inn hoih pipi bawl zou in, a duhlam uh, a limlim ne zou, a deihte uh nei zou zel mah le uh hunta, tawpta ning chi tuanlou, hahpan semsem uhi. Azu-aham thuak hun, a lungkiathuai mahmah lai tak a lunglel mai lou kuhkal tak leh taima tak a zongte’n a tawp chiangin a gah hon lou zel uhi. Sum-le-pai zon angaih mah bang in a zon dan zong chi tampi mah na om hi. Tua sum muh theihna tuamtuamte toh kisai ei toh kituak, ei hih di’a kilawm leh kilawm loute ah ei gingtu, Jesu Khrist nungzuite pilvang ni. Ei ziaka Toupa Jesu Khrist suk minsiat leh suk zahlak ahihlouhna ding in. I tung uah Toupa lungkim leh sum-le-pai zonna a zong tuahpha leh lamzang zaw ding i hi.
Leibat Neih Hun In: Kuamah ei kia a kiding gige thei lou, sum-le-pai, banah van khatpeuh phimzang leh nawtkuang tanpha kizatsak chih om kha thei gige hi. Sum-le-pai hita leh vanzat khat peuhpeuh piak nawn ding a mi a i laakte tuh, i lemtang masa ah awlmoh tak in pekik pahpah thei le’ng deihhuai, a hong sawt chiang bang a mangngilh kha, I laknate’n bel na thei gige, na mangngilh khol lou di ahihman un. Tawmchik, neuchikte mah hong kigawmgawm chiang a tampi leh lianpi hongsuak ahi. Huaiziakin tawmchik ahihlai, neuchik ahihlai mah a, a dit nawn leng nuam, baihlam zaw ahi.
Sum Zatna Leh Zeekna: Sum zatsiam mahmah mite mah khovel a mite zahtak leh tunung chiang a Pathian vaihawm ni leh kipahman hawm ni chiang a kipahman tampi tang dingte hong hi ding hi. Sum mulou hilou napi zang siam lou, zeek siam loute bel mite simmoh leh Pathian vaihawm ni leh kipahman hawm ni chiang a zahlak ding, mualphou ding, Setan leh a lawite adi’a kibawlna mun lam a sawl khawm khak dingte hi ding hi. Lei theih teng lei louh, neih theih teng neih louh leh deihhuai teng deih louh kisin in, ei toh kituak, hon vualzawltupa lungkimna bang ahi hiam chih kiveng siam le’ng; tulai mi tampite’n kintak a hauhsak utna kinei lian lua in, summuh theihna ding peuh sep tuak leh tuak lou khen man lou, ei ading lou tanpha na-ngawn suhsak sawmna kinei hi. Huai toh kizui a lei theih teng lei a, neih theih teng neih khawm liapluap sawm, mulkimna leh zumna mel thei lou; huchi theite thupisa, eng, amau hihdan a hih utna, amau neihzah neih sawmna in hon kaise gawp, Pathian toh hon kikhensak, melma tampi hon neisak, innkuan chidam louhna hontun, tawpsan vengveng ni.
Thukhitna: Toupa’n i hih theih ding dan toh kituak a hon kepsak sum-le-paite, hon petu, hon kemsaktu phawk lou zen a i zat a, kiphatsakna bang, kithupisakna bang, ki-otsakna bang a i zat leh Toupa’n hon pakta lou ding ahi chih thei ni. Kemtu muanhuai in tuh a tawm leh tam thu, bangmah phun selou in piak leh kepsak a om zahzah apung toh a pu kiang ah a lak hi. A pu’n a kiang ah, “Sikha hoih leh muanhuai na hih hoih e, tawmchik tung ah na muanhuai a, tampi tung ah ka hon om sak ding, na pu kipahna ah lut in” a chi hi. Kuapeuh tawmchik tung a ginom lou, tampi tung ah leng a ginom kei uhi. Hauh man, neih man a muan a om a hi tuankei, tawmchik tunga muanhuaite mah ahi mite muan. Diktatna toh tawmchik a hoih zaw, diklouhna toh sum muhna thupi sang in (Pau. 16:8).
Sum-le-pai kemtu muanhuai hiding in simtute, Toupa'n hon vualzawl chiat hen!
