EBCC, Delhi Dorcas Silver Jubilee leh Dorcas’ Day lopna program bang bawl theia, Pathian hoihna leh honpina atak a I muhtheih man in Amin phat in thupina, pahtawina te Amah I pia ahi. Hiai tawh kiton in, hun paisa a chinlou sasa a Dorcas Pawl a ka na kizatkhakna tamloute ziak a deihsakna tang a, taksa a tel theilou di ka hihlai a hiai hun adi’a “thupuak” saulou gelh thei di’a ka omman in kipahhuai kasa a, Pathian leh seppihte tung ah kipahthu ka gen hi. Hun paisa leh tuni tan in makaitu di muanhuai taktak Pathian in honpia a, Amin I phat ahi. Tuni a I makaitute bang le taksa lam ah, pilna leh siamna lam ah, khalam ah hita leh piching uh kasa a, lungmuanhuai in mipite hampha mahmah hihang kachi hi. Hiai hunlemtang a la in, I Laisiangthou pansan in “Dorcas” manphatna tamlou sut khawm zualle chi I hi.
Bangchibang a EBC saptuam a numeite kipawlkhawmna “Dorcas” chi a ana kiminlawh kha ahi di’a? I theihna tan ah Nasepna 9:36-41 sung a kigen “Thilpiak leh Nasep hoih” chih bulphuh a nei in Dorca pawl chi’n I makai masate’n ei numeite kipawlkhawmna min ana phuak uhi. Ahihleh, Dorcas bang genna ahia le? Laisiangthou suutte gendan in Dorcas min khiakna “sazuk”/”sakhi” (Gazelle) chihna chi uhi. Ahihleh, “sazuk” or “sakhi” in bang ensak hi ding? Hiai min khiakna in a etsak theih a kigente ahihleh – kilawmna (beauty), kin-gang/manlaang (swift), kilawmtakna/kizopna (relationship) leh mit-hah kilawm (radiant eyes) ahi. Taksa lam a le etlawm, gamtat khohei a le ettontaak banah midangte adi’a ngaihnathuai/lawm bawlsiam chihna lam ahi peuhmah ding. Nasepte 9:36-41 ah Jesu Khrist nungzui numei khat a kigen a, tua pen Tabitha, ahihkeileh, Dorcas ahi. Tabitha pen Aramaic min ahi a, Dorcas pen a Greek min ahi a, a min neitu khat,mi kibang genna ahi. Thukhunthak Laibu sung a numei Khrist nungzui a minlawh khak omsun tuh Dorcas ahi. Gingtu masate’n a ginna uh ziak in bawlsiatna leh gelgawtna (persecution) nasatak ana thuak uh ahi chih Nasepte 7 apan khawng in kigen hi. Bawlsiatna uang tou zel in gingtu muanhuai Stephen suang a denlup in hong om a, tua hun chiang in gingtute leng hinna humbit ut in Jerusalem nusia in akiim-akiang gam teng ah kithehdalh uhi. Tuabang a akithehdalhna un tanchinhoih khangsak seem ahi chih I Laisiangthou hon hilhdan ahi. Tuabang in, akithehdalh gingtu lawikhat in Joppa khua ah theihpihna nna sem in saptuam phuhkhiak in hong om hi. Hiai a saptuam I chih pen gingtu kipawlkhawmte genna ahi.
Tua mun (Joppa) a gingtu kipawlkhawm (saptuam) te lak ah Dorcas I chih ngei zong tel in, Jesu Khrist tawh kituahna ana nei hidi’a gintak ahi. Toupa tawh mimal a kituahna ana nei a, saptuam/gingtute kipawlkhawmna a hongtel chiang in, a ginna pen a niteng hinkhua a mite muhtheih di’a lakkhe ding in Kha Siangthou’ huauna za hi. Ama’ hihtheihna dandan a sep ding honzong in, tagah leh meithai panpih ngai akiim-akiang a omte hon phawksuah in, amaute lak ah itna leh hehpihna nasep honpan hi. Khutsiamna (puankhui siamna, etc) a neihte bang Pathian’ piak ahi chih hon phawkkhia in, Ama’ min a zat ding lunggulhna honnei in, meithai leh tagahte ading puan-ak leh puan-aktual te khui in a taksa lam ua taksapte honhuh banah, tua tawh kizom in a khalam ua a taksapnate uh ngei leng Pathian’ thu tawh huh in, tuabang nasepna tungtawn in tagah leh meithai tampite’n Pathian tawh kituahna nei uhi. A tenna khua Joppa ngei leng tuahun lai ading in mun poimawh mahmah khat (strategic) ahihkawm kawm in meithai leh tagah tamna mahmah khua khat a gen ahi.Longkhawlna mun ahih banah sumdawng mite kikawmtuahna mun (commercial & Business centre) poimawh khat ahi.Egypt, Africa leh Asia gambup apan sumsinmite kituahkhawmna mun poimawh ahi. Huaiziak mah in, long tuahsiatna bang tam a, khohun hoihlouh ziak a sihna leh manna tuahsia tuak, abiik in, ngabeng mite lak ah tam pipi om uhi.Tuipi’n a hinna uh a laksak, inn tungkik nawnlou pasal tampi tak om uhi.Tuate ziak khawng in tagah leh meithai bang tam in, khosakna a haksa mahmah mi tampi om uhi. Tuabang a haksatna tuak mite lak ah ahihtheih bangbang in kilawptak in Dorcas in nasep hon pan in, anasepna ziak mah in tagah leh meithaite lak biik ah theih in hong om hi. Tuabang a michimawh leh mangbang, panpih ngaite lak a panpihna leh itna nasep hon pat chiang in mite’ it leh ngaihnat in hong om hi.
Dorcas ana ngaina leh ana it mahmahte pen mihau leh mi liante hizaw lou in, dai kilkal a om, mite’ phawklouh tagah leh meithaite khawng ana hi zaw uhi. Matthai 25:36 a Jesu’n, “Vuaktang a ka om in puansilh ding n’on pia…” ana chih pen Dorcas in ataktak in ana seemkhia hi.Tagah leh meithai panpihtu ding neiloute kiang a nasep hoih a sep pen Jesu adi’a seem ana hiden ahi. Jesu Khrist kilawmna lungsim leh gamtat a ana taklat chiang in mite’n mu in, alungsim uh zou mahmah hi. Tuni a Silver Jubilee lawm a I om lai un, I mintapnu uh Dorcas hinkhua leh a nasepte phawkthak le uthuai sa mahmah in hiai tungtang honkum kahi ahi. Dorcas in in midangte (mi genthei leh zawngkhalte) huchi zahta a a hehpih a a itna pen, Pathian a it mahmah ziak ahi. Gingtu ahih ma hinkhua akigen kha kei a, I theikei. Himahleh, Pathian ahon neih apan ahinna leh lunggulhte kikhek in, a thil etdante hongtuam a, thupi a sakte hongtuam in, Pathian lungkimna ding in a hinkhua honzang hi. Tuabang nasepna ziak in I Laisiangthou in “Nasep hoih leh thilpiak a hausa” chi’n Dorcas hinkhua ana hilhchian hi.EBCC Dorcas Pawl khangthu (history) akisuut chiang in bangchibang in akigen de aw? A bang pen akigen mun pendi’a? Tuni a Dorcas pawl chih min a zaak chiang un a lungsim uah bang a om masa pen di’a? I pawlpi min hilhchetna pen “na hoih sep leh thilpiak a hausa” ahithei lai diam? Dorcas mah bang in Toupa’n mun poimawh mahmah (strategic location), Delhi khopi ah hon koih a, huaitawh kiton in septheih ding tampi mahmah ikiim-ikiang ah om hi. I septheihlouh lamte kia I mitsuan khak ziak a I septheih dingte tampi omte seemkha lou I hih khak ding lauhuai hi. Pathian in I sep theihlouh dingte seem ding hilou in, thil tengteng hih ding leng hilou in, I septheihte Ama’ min thupina di’a seem ding in hondeih hilel hi. I septheih, I bawl theih chiang a muanhuai ding tuh I mawhpuakna ahi. I ngaihtuah thak ding a deihhuai bel- tuni a Pathian hon koihna I nasepna (jobs/employment) te Jesu Khrist’ itna leh hehpihna I latsak theihna mun leh hunlem ahi. Tua I sepna mun a I sepsung I seppihte lak a Pathian hehpihna leh itna theihpihtu ding kuamah dang hilou in Pathian in ei mah honsen nana hi. Ei sanga hunlem nei zaw dang omlou ahihman in. Dorcas mah bang in ei numeite’n leng Pathian I it peuhleh tua Pathian I itna in midangte it leh hehpih ding a honsawl ding ahi. Pathian I itna apan midangte itna leh hehpihna hong luangkhe ding ahi. Tua ahihlouh chiang in “ginna tuh nasep tellou in a si ahi” chi in James in ana gen (James 2:14-26). I khut a Laisiangthou (Bible) zang in midangte khalam damna mun ah I pi thei. Eimah a siamna leh hihtheihna Pathian in honpiak talent tuamtuamte zang in midangte adi’n khamuanna, taksa leh lungsim damna, kipahna leh khamuanna tuntu I hithei gige. I kampau & lungput (words & attitudes)te tungtawn in Pathian hehpihna I langsak thei gige. Toupa’n I khut a hihtheihna honpiakte a zat dingdan a thei mahmah. Tuabang a zat ding in ei I kiphal hiam chih poimawh lua hi.Pathian in Mosi Israel te Egypt a saltanna ua apat a pikhetu ding a a saplai in Mosi in paulap tampi nei a, dang-awk ahihdan bang gen. Pathian in Mosi kiang ah, “Na khut ah bang a om a?” chi a A dotlai in Mosi’n, “Chiang” (a rod) chi’n dawng hi. Tua chiang khat lel zang in Pathian in thillamdang tampi mahmah seemkhia hi. Tuading in Mosi in Pathian’ thu aman kuul. “Chiang” (Chiangkhun) khat lel zang in Israelte suahtakpih hi. Dorcas in phim leh khau zang a Pathian’ hehpihna leh itna midangte lak a taklang. Pathian in thil thupi leh lian mahmahte hon ngiatlou ahi. I hihtheih bangbang, I neih bangbang hon ngiat. Phaltak a I piakkhiak nakleh Ama’n leitung thil haihuaite zang a thil thupi leh lamdang pipi langsak zel. Tuni in mite’n, “na hoih sem” leh “thilpiak a hausa” pawl/mimal in hon theilai di uam? Dorcas I mintapnu uh a mel et a leng kilawm(beautiful) mahmah, a sung a teng Jesu in kilawm sak sem lai. Khut nasep a kin-gang mahmah (swift), midangte taksapna huh pahpah di’a mansa a om, midangte itna ziak a kilawm tatna (relationships) bawl pahpah thei leh, mit-hah a leng mite ngaihnat theih a om (radiant eyes), tuate tengteng Jesu a itna toh A’ na ahonsep chiang in tagah leh meithaite nu, ithuai hong hi. Ei Dorca Pawlte leng ginglou mite’n hon et chiang un Jesu kilawmna I mel uah a mu ding uam? Nahoih sem ding a kin-gang mahmah in mite poimoh salam/khalam hileh huh pahpah thei di’n I om diam? Jesu itna ziak a midang itna nei a, amaute toh kilawmbawl, Pathian thute kikuppih thei in I om hiam? Mite’n I mit hahte a hon-et chiang in honneel in ngaihnathuai honsa in, I kiang a om nuamsa in a atawldam ding uam?
Silver Jubilee a zang manpha leh Toupa ading a “na hoih seem” leh “thilpiak a hausa” hi gige thei ding in mimal chihte Pathian’ Khasiangthou in hon thuam in hon ompih den hen aw!
..
Note: Hiaithu, TBDF Delhi in silver jubilee program May 11-12, 2019 zat lai a heutunu (Mrs. Pastor Khamkhanchin Ngaihte) in saptuamte message honkhak, a thu manpha sak ziaka hong kisuahkhia ahi. https://ebccdelhi.org/resources/1/video/1954-jubilee-thupuak-by-nu-chhungi-1st-president-tbdf-on-tbdf-silver-jubilee-11-12-may-2019.html
