“Huchi'n, Toupa'n, ka Kha in mi khantawn in a sual nilouhlouh kei ding...” Genesis 6:3
I chi-nat in doctor kiang ah I pai ua, I natna toh kituaka damdawi nekding honna ngoh/ gelhsakte leh ei theihdan akituahkeileh damdawi khat-le-nih va suggest theitan a theihna neite I hi mawk uhi. Tuabangmah in khalamthu sinsaktute’ thugen khenkhat bang le’ng tuadan geih in I na hihzel uhi. Atung a kigen damdawi hi in Pathian thu hitaleh, ei damna ding a kigente lah zuithei leh zuinuam hilou, genbeh ding leh a kawizawng a ngaihdan sunveu ding ana nei, chihte I paidan khat uh suak mawkta hi.
COVID-19 in khovel a zelhlai in, ei lakah hong lutpahlou vanglak hi. Pathian in zaw hazat-huai ding khopa honna itlaw tuam gige eive! Mundang gamte’n buaina tuuktui a tuahlai un, eite’n I na gaalzak phot ua, I lak hongtun taktak ma in natna doudal dingdan khenkhat I na thei uhi. Tuni’n I lak a hong tun hang in vuithei I hikei, kiginkhawlna ding hunsaupi piak in I om uh.
Khanih val paita in COVID-19 a kipan kiven ding dan - mimal kikepsiangthouna I gen-uang mahmah uhi. Khat-le-khat kigamlat ding, mahni inn a kikhumbichilh ding, ahihkeileh maituam, khuttuam buh a poimoh dan bang, leh khutsilsiang gige ding, chihte. Tuchiang in, natna I lak hongtun toh kiton in, dou ding dan gen behlap hong omnawn leuleu. Huaite tuh – eimah sapum a om natna doutu hatsak ding, vitamin om lamlam nek piibawl ding, taksa tawldamsak ding – a tam theilam ihmut ding. Banah, tuivot sang a tuilum dawnding, theigah chi tuamtuam nekding chihte ahi. Thamlou in, mawk patauh louh ding, chih hilai.
Maban hun hong paizel leh kiven ding dan leh doudal ding dan thupiak thak hong ombeh zel lai ding hi. Zuih teitei a mahni kikepbit luat ding himah tham e. Ahihhang in, mi bangzahte’n thupiakmasate I nazui detdet mah di uh aw? chih dotna liantak lungsim ah gingging hi. Bangteng hileh, huailai a I lak ua natna honglut hinai samlou ahih chia’h poimoh ngaih kha khollou kihimaithei. Thupiak thakte le’ng huchibang mah in I ngaikhawk tuankei lai uhia? Kikeptuamna munte a zuih ding dan kipete I bitna ding khopin I zui in I enzui zou hia? Hihzou leh zuizou I hih intuh bitding I hi ua, lungdamhuai mahmah hi.
Kidottuak mahmah dangkhat tuh, taksa damna ding kichiantak om nailouh lai nasan a kivenna ding gintakthu kigente I ngaih poimoh bang un, tangtawn daih ding Khalam damdawi Toupa Jesu Khrist I ngaihkhawk mahmah ding uh poimoh zaw-thamlai ahi. A gingta tengteng adi’a tangtawn damna I Toupa’n Kros a honna koihsaksa zonmuh teitei tup in neichiat ni. COVID-19 akipan damna kia lel in zaw sawt daihlou di’a, Jesu Khrist hon piak damna inbel tangtawn daih ahi. Salam damna damna bukim ahikei, Khalam damna in bel salam damna leng tuntheilai hi. COVID-19 natna lau mahmah a veilouh theihna ahih khakleh chi a, hihtheih-hihmohteng hih a I kikepsiangthou bang un, Pathian deihdan zui in A deihlouhte paikhia in Khalam ah kikemsiangthou ngap hile’ng bangzahta’n Pathian a kipaklou dia! Natna veikhak nung a pumpi a om natna doutu (immune system) hatsak I poimoh ngaih bang un, khalam immune system hatsak in khelhnate douzou di’n kizangbei ngap le’ng bangzahta’n Pathian akipaklou dia! Natna hik kaailouhna di’a taksatuamna tuamtuam I zat bang un, khelhna thu genlouding in Pathian thu toh I mukte tuam in, PPE di’n zang le’ng, bangzahta’n Pathian akipaklou dia!
COVID-19 in salam sihna tan hontunthei tham hi. Ahihhang in, I kha adi’n huaitan ah zoh ahi naikei lai, Hotdamna thu a hunlai a I sannop kei in zaw kikhel ni omd ing hi, huai tuh Thukhen Ni a tangtawn sihna. Toupa’ thukhenna ni pumpelh thei kuamah I omkei ua, kimaituah vek ding ahi. Huaiziakin, hiai thukhenna ni a tangtawn hinna nangah theihna di’n na Kha Hotdam ahita hiam, unau?
Kikhelni om ngeingei ding :
Lungsim ah, Noa hunlai-a khovel segawpta siansuahna di’a Pathian in tuichiim a tunsak ding thu Noa a theihsak toh tulai dinmun tehhuai mahmah sak in om. Pathian in Noa longsui di’a thu a piak a kipan longsui zoh leh vuahzuk kipattan hun bangtan kivei hiam? Hun saupi ahi. Kisakkhawlna ding hunsaupi piak in a omvek uhi. Bible,Matt24: 38 & 39 leh Luka 17:27 & 28 ah hichi’n kimu hi:Noa long a a lut a tui ahong let tan in, a ne un a dawn ua.... bangmah a theikei uh, chih hitel dan ahi. Lapuaktu’n, “...mihingte kia loungal hilhngai omlou...” ana chih in tuunkim vek himailou hia, hon chisak hi.
Kimohsak kampau a gen ahi kei, hampha I hihna uh I mangngilh un ei-le-ei bang, khat-le-khat bang kimohsa in I omkha zenhouh ding uh, thamlou in Pathian’ tung tanpha ah I vui in I khase khavial mahmah ding uh chih lau I hi. Vuitheivual I hikei ua, vuina ding san le’ng bangmah I neikei uh. Theihkhawllouh a hon bingphut hileh panlak dingdan leh ngatna ding zawsam theilou leh hamhaihtak a om theilai, theihkhawl leh zakkhawl sak in I om ua, hihtheihbang chiat suahin I pang ua khat-le-khat kisumdawltuah in pan I lavek uhi. Mihingte kikoihsang khadeknak mahle’ng, bangmah hihtheih I neihlouhdan hon muchian’ sak mahmah hi.
Hiai natpi (COVID-19) in lamtampi ah sinlai honpethakthak hi.
1. Kibulpatthakna (Back to basic): Khalam thil hi in khovel thil ah hitaleh, mihingte’n I phaat aomding mangngilha - lian kisa leh hithei kisa a mahni angmasialna hong lianlawta batna om hi. “Bangteng Toupa’ kiang’h thumna’n…” I chih uh agingvuak hita a, atakgama hinpih khanawnlou I himaimah uhi. I Khristian hihna uh kibulphuhna kiplou, phetlou in, I pianpih sahkhua ana hihkhak ziaklela amin a Khristian chihtan I deihkhop khak ziak uh ahi. Atamzawthamte I piankhiak akipan I hansuang tanlel Khristian I na hikha ua, huaitan hun ding I sakha lai uhi. I khohei leh khosakna a Khristian hihna latsaktheih ding I neikei phing uhi. Huaiziakin, kibulphuhna kip leh detdou a kipanthak thei di’a hun piak I hilailai uhi. A hon itna leh dohzohna kiningching hinalawmlawm e aw...!
Khovel khosakna ah enle, nek-le-tak kaihkhawmna ah apiangsaktute hinawnlou in anebeitute I hongsuakzawta uhi. Toupa’n A’ vualzawlna, gamhoih leh leihoih hon tutphahsaka, I pupa ua kipan nek-le-taka mahni kitoudelhzoute I na hi uh. Ahi a, gamkhantouh dungzui in nidangdan hinawnlou in lounasepa kinga pumlum hiallou inle’ng nekmuhna ding piakbehlap in I om uh. Ahihhangin, ngaihtuah detdet thakle loubawl khekkhezou ding nekzonna muvek I hituan kei ua, ahihhangin I nekmuhnasa uh loubawllam I taisan chiat simta mawk uhi. Sepgimlouha abaihsam lamlam nekmuh sawmna I lakah lianlawta ahi diam? Mihing masa Adam leh Evi te’n Pathian thupiak zuilou a setan’ khemzoha aom un, Pathian in Eden huan akipanin khovela leileta nekzong dingin ana sawlkhia hi. “Leitunga na kiknawn masiah namai-a kho-ul luang puappuapin an na neta ding....”(Gen 3:19) ana chi hi. Natna hiipi honglenga, mahni innchiatah I kikhum ua, ataktak hunah I niteng poimoh uh (basic essential needs) anatawmlaw phing chih honmusak hi. Akan-avala, alimzaw leh uangkhengval nek utna uang hitah chih hon mubehlap sak hi. Mahni huanhai leh innkiim-innkianga niteng nekding poimoh piansaktheih ahihlai in, huaite I ngainep khadeuh ua mahni seplouha midang sepsate kia nektheih I sa zawta uhi. Gamsunga zuak leh lei theihlouh hun ahongtuninzaw mahni innkim-innkiang mah I mai uh angai hi. I mangngilh khak(dek) uh, hihna leh dinmun diktaka honpikik ahita, huai dinmun I mansuahlouh ding uh hon theihkiksakna ahimai. Vuithei I hikei, lamlaktu ding I neilai, kipahluat ding ahizaw.
2. Mosi, David leh Jonate : Amaute apan sinlai lakding tampi om hi. A hinkhua ua muhtheih khat tuh Pathian in khelhna a ngaidama himahleh khelhna man/ guun om ahi chih hon musak hi.
Mosi : Pathian mitel leh A’mite piitu Mosi, Kanaan gamah pilutlou hilhial hi. Diut 32:51 & 52 ah Pathian in Mosi kiangah, Zin gamdai a Kadesa Meriba tui a Israel suante laka Ka tunga na khelh ziakin leh Israel suante laka na hon pahtawilouh ziakin. Tua gam navagalmuh dinga; himahleh Israel suante Ka piak gamah nalutkei ding, chi hi. Mosi toh tehvualte I hikei uh, ahihhangin Pathian in A Van Kanaan gouluahpih dingin nang leh kei honchial hi. Khelhna leh gitlouhna hih kawmkawma Pathian Thuzuih in Van Kanaan hon tunlou ding ahi. A itna sunga hehpihna hun hon piaklai man in, kihei in Amah kiang zuan chiatni hang.
David : “David, Ka lungsim bang pu,” ana chih hial himahleh, Toupa inn (Temple) lamtu a zat ahikei. 2 Sam 7:1-11 & 1 Kron 28: 3 ah Pathian in, Nang zaw kidoumi sisan suah mi na hih ziak in Ka min adi'n inn na lam kei ding,A chi hi. Eimaha puakzohlouh ding khelhna neichiat I hi uh. Huaite tengteng Jesu Khrist in Kros ah honna puaksakta ahi. David banga eite Pathian lungsim bang puzou leh A mittunna I hihetkei uh, himahleh Pathian tenna pumpi hihtheihna eimah thupukna ah aom hi. Ama’ tenna taak leng I hihnawnlouh lai na-ngawnin, i sungah teng ut in Pathian honkun hi. Toupa’ tenna inn kha leh sapum hi ding in I bangkim Amah I peding uh. A Tapa Jesu Khrist sisan vangin pomtakloute pomtakin hon seplai hamham hi. Pathian adi’a mun-awnloulailai ding I diam?
Jona : A tangthu I theihsa uh ahi. Atomlama genin, Pathian’ sawlna mangnuamlou in ama’ lemgelna toh Tarsis kholam zuanin taimang tum hi. Jona in Pathian mai a thil ahihkhelh theigige napi’n kisel tum teitei hi. Jona 1:12 na ah, Jona in longa midangte’ kiangah tuipi ah hon lawnkhia un, huchi’n tuipi nou adingin akihawtnawn kei ding.... chih kathei ngala, chi hi. Atung ua thiltung ama’ziak ahi, chih Jona kia in anathei gige hi. Buaina khawktak atuah unleng long sungnungpen ah ana ki-ihmutbawl lai hi. Tampite’n,“Keimah ziak ahi, I gamsunga hichizahta a khelhna leh khalam keuna hongtun…” I chihtheihma uh I gamsung buaina tuihual kihawt akhawlmawk kei dinga, l gamsung longa tuangmite’ hinna tanpha lauhthawnghuai dinmun ah I dingsak hi. Long akipan paihkhiak ding tanlel a khelhna kiphawkna in Jona ahumbit tuankeilai hi. Ahihkhelh akiphawka, ahihhangin Pathian’ lam nga a khelhkisika thupha atawi chih kimutuan nailoulai hi. Huaiziakin, tuipi kihawt vonvon laka paihlut in aom a, ahinna beithei dinmun ahi. Ahihhangin, Pathian’ thupina kilatsemnadingin ngapi gilsungah pilut in aom. Buaina tawpkhawk ah Pathian hon sama, dawn in aom. Sheol tanpha chepsakin aom ahi ding, Jona 1: 2b ah kimu. Lungkham mangbatna I tuahte eimah kibawl ahi naknak hi. Huai hun I tunma in Pathian lam nga in Amah samle’ng, Amahei hondawng dingin mansa in om gige hi. Jona sanga hamphazawte hihang, ama’sanga khialzaw leh gilouzawte I hivek uh, ahihhangin nunnemna toh ngaakzoutakin Pathianin honna ngakden hi. Ahihkeileh, Jona bangin I hamphakei kha ding, Pathian lam zotna ding hun suantou-suantoua Amah toh kituahding mumanlou I hihkhak inzaw, eimah lemgel leh lampi bawlte’n sheol hon tun ngeingei ding ahi. Vuithei I hikei, hunpiaklouh I hihlouh ziakin.
3. Isai 1:18 ah Toupa'n, Hongpai un, ngaihtuahkhawm dih ve ni! Na khelhnate uh san-au bang in a om mahleh, vuk bang in a ngou ding; sandup bang in san khin mahleh belammul bang in a om ding, ana chi hi. Ei mimal chih liangkouah mohpuakna I sepkhiak ding kinga om hi. Tapa taimang kisiika apa kianglam azotna in ngaihdamna leh amansuahsa apa’ gouluahtu di’a simtel ahihnawnna musak hi. Chiklaipeuha honna poma a inna honlalut dia mansa gige I Pathian kiang tunna ding in, mimalin mahni a kalsuankhiaka Ama’lam zot poimoh hi. Zottheihna lampi theinapi a, I omna mun taisanlou leh kalsuankhelou a I omleh Ama’ kiang I tungthei ngeikei ding. Vuithei I hikei, eimah kalsuan noplouh ziak ahong hizaw ding.
COVID-19 ziakin khovel mabangtakin ommahleh eite’n Pathian toh kituahna a I nazat leh mihampha I hi ding. Natna I gamsung honglut ma in, I patauh hangin I lungsimtak toh patauhna neilou in ngeina bang in I omtou uhi. Tuni’n, eilak mahmah hongtun chiangin, Pathian’ sapna Aw zaklouhvual ahinawnkei. Jona banga long sunggil a I ki-ihmut khembawl lailai in zaw, hiai natna tungtawna hamphatna mukhate’ laka telkhalou ding hi hang. Natna damna ding damdawi kimukhe nailou lailai hi. Ahihhangin, na kha ading damdawi Jesu Khrist in Kros ah honna zohsak khinta a, nang sa’n ding in kisamlel ahi.
Paunaakte 3:5-7 Na lungtang tengteng toh Toupa ah muang inla, nangmah theihsiamna ah kingake'n.Na lampite tengteng ah Amah thei inla, huan Ama'n na lampite apitang ding hi. Nangmahmitah pil ke'n la; Toupa kihta inla, gilou taisan in. Na lai adi'n damna ahi dinga, naguhte adi'n guhngek.
Taksa damna sa’nga khalam damna ngaipoimoha, huai damna ding zong teiteite hitheichiat ding in, Pathianin simtute A’ Kha muanhuai in honpi in hon musakchiatta hen aw...!
