Sepna Mun A Toupa Theihpihna

Nasepte 1:8 ah Toupa Jesu’n a nungzuite kianga ka theihpihte” na hi ding uh chi in thupiak Ana pia hi. Tuni a ei, A nungzuite a ding inle hiai thupiak piak I hi hi. I nasepna munte ah bangchi’n I semkhe thei di’a chih kikum ni.

1. Nnasep ding piak a I om leh i sepna mun ding mite tungtawn a sehsak a i omlai in I biak Pathian in thei ahi, Ama’ lemsak ahi, sem ding a ahon deih thil khat om ahi, huai nna I sep kawm a hon sinsak nop thil leng om ahi chi a i lak ding uh ahi.
   Govt leh missions organizations nuai ah kum 30 val ka sep sung in mun tuamtuam ah posting in ka na om kha sek hi. Huaite ka nung et chiang in huai lai a TOUPA’N hon sinsaknop tampi na om ahi chih ka chian thakthak hi. Rom 8:28 mah dik gige ana hi.
2. I seppih, midangte laka ‘little Jesus’, Jesu mel a muhna uh omsun na kihi ahi chih I mangngilh ngei louh ding ahi. I kampau, I khohei, I melpuak in Jesu nungzuite I hihna a latsak ding ahi.  Hiai hi a haksa pen khat ahi hi.
   Hiai bang I hih theihna ding in niteng a ‘Quiet Time (QT)’ - Bible sim a thumna hun - mimal devotion ni teng a neih gige poimoh hi. QT in i khalam leh salam hinkhua hon sukha in hon bawl mahmah hi.
3. I nnasep, I mohpuakna I sepna ah I office in a lamet, I pilna leh siamna tengteng toh I sepkhiak ding ahi. A hoihthei pen a sem ding a pilna leh siamna hon pe thei I TOUPA kianga I nget gige ding ahi. 
   I sepna leh mohpuakna toh kisai laisim tam, lawmte toh genkhawm tam, I tunga mite kikuppih tam, I theihlouhte kidottuah ngam chihte phatuam mahmah hi.
4. Trials (haksatna) leh temptations (ze-etna) tuamtuamte I tuak ding chih theihsa ahi. Huaite lakah leng TOUPA muang in Amah bel le lamdang takin A muanhuaina I mu ding hi.
   Hichibang hun a hon panpih ding Bible thutak muh ding tam mahmah hi. Sam 121 bang, Sam 18 bang kei adi’a ka ‘claim’ gige Bible changte ahi uhi.
5. Tangthupha midangte laka share ding awlmohna I neih hun om sek hi. Mi kianga tangthupha na share ma in amaute adi’n thumsak masa in chi’n kigen sek hi. Gen ding hun hoih ahong tun chiangin Pathian Khasiangthou in lampi hon hong in, gen ding thute le hon pe sek hi. 
   Thumsakna hi mi tengteng phial in poimoh sek ua; innkuante damlouhna, naupangte exam di hun bangin thumsakna kingaina mahmah chiat hi. Huai hun a I thumpihna manpha mahmah hi. Khenkhatte, biakinn hong kai ut a hon zui ut bang om sek uhi. Tuate kilawpna muthei leh theipha I hih ding poimoh hi.
   NDPN Seminar I zat uh toh kiton in, sepna mun a Toupa theihpihtu muanhuai khat hi di’a hanchiam in, TAK-HEH chi chiat lai ni. Simtute, TOUPA’N hon vualzawl hen!