Amasa in DEW simtute tengteng, kumthak meel hon musak i biak Pathian min in itna chibai
ka honbuk hi.
Hun leh nite hongpai zel in, heutute tungtawna transfer and posting hongsuak dungzui in, Delhi pastor ding mawhpuakna piakin ka om hi. Huchin, January 4, 2023 in ka omna lui uh Mimbung khua nusia in, Lamka ah ni 12 sung, poimawh tuam tuamte saifel ding in ka hong om uhi. Nisim 16 January 2023 in Lamka nusia in Delhi ka hon zuan ua, nitak dak 7:30 vel in Delhi ka hongtung uhi. Kilamet phak hetlouh in, Vanlengphual ah Upate leh Dorcate tampi in pakkhi tawh honna dawn ua, huaimai hilou in, quarters ah zong tampi mahmah ana omlai ua, thupi leh lamdang sa lua in Pathian min ka phat uhi.
Delhi banga thupi leh mi tamna khua-a innkuan a om kha ngeilou ka hihman un, thil tuamtuam tampi ka ngaihtuah khak chiang in, ka nervous mahmah mawk hi. Himahleh Pathian, bangkim hihtheipa nna sem ding kihi nave’n chi in, sawltak Paul thugen: “A hon hihhatpa Khrist ah thil tengteng ka hihthei hi,” (Phil. 4:13) a chihte khawng meilet sukmai; tua in hon khamuan tuan mahmah hi. Huan ah, Pathian in tu huntaka Delhi a pastor di’a hon muanga hiai mun a hon koih hi ding ahi, chihpeuh in zong hong khamuan mahmah hi (1 Tim.1:12).
Ka hong kipatna uh leh tua, ka hong omna khua un, kibatlouhna tampitak, a nuam leh a haksa lam ah nei tham ding hi. Khaw-ta leh khawpi hindan leh gamtat khawheizia tampitak kilamdang hi. Huaiziakin, thil tampi ka kibawllem touh uh hongngai ding a, huan thil tampi zong ka theilouh uh hong om ding ahihmanin, saptuam mi-le-sate’n na hon theihsiam ua, akhen chiang banga na hon makaih leh hilh zel uh kisam mahmah ding hi ung. Pathian in Delhi a Saptuamte kem ding a heutute tungtawn a honkoih ahihtak manin, Delhi a ka om sung ding ua a geel bangbang, Amah kia Thupina di’a hat leh hangsantaka ka hong septouh theihna ding un, Saptuamte’n honna thumpih zeel un chi’n ka honngen uhi.
Pathian Saptuamte tung ua na hoihnate uh ziaka kipahthu a thaka hon gen kawm in leh, Pathian limsakna hinkhua a thak a hing thei chiat dingin, i biak Pathian in hon vualzawl chiat hen aw. Amen!
