Kum 2 sung phial Nipi kikhopkhawmna om theihlouh nungin tuni November 14, 2021 in EBC Church Delhi Sunday Service kipan theinawna, kipahhuai mahmah hi.
Angeina bangin jing dak 9am in thumna kikhop(devotion) hun masa zat ahia. Tua zohin Upa bial 12 te sehthumsuah seh khat(1/3) kigawmin Nipini Biakna hun masa sunn 11 am in neih ahi. Hun sawttak mel kimu tuahlou leh kithuah khawmna omlouh nunga kimukhawm akihih manin mipi hongpaikhawmte maitai leh kipak chiat uh ahihdan amel uah haih vuallouhin kilang hi. Pathianin ihihna dinga honsehsak(designed) “gingtute kithuah khawm ding(fellowship) leh khat le khat ki hanthawn tuah ding” chih zaw kuapeuhin lunggulha kinei chiat ahihdan kilang mahmah hi.
Sr Pastor in mipite vaidawnna saulou aneih zohin Pathian lianga kipah thugenna leh thumna neiin biakna hunseh pat ahi. Wrship team makaihin phatna leh biak piakna kineia, lungsim kihong tak leh zalen taka ‘lungsim leh aw toh Toupa phat’ anuamin amanpha petmah hi.
Hiai zoh in Mimbung Pastor (Dr G Suankhanhau) in short sharing hon nei hi. Aman “kuapeuh a kros pua a honzuilou tuh ka mi hitak ahi kei (Mathai 10:38) pansan in sharing hon neia manpha mahmah hi. Pahianin hin khua nuam leh thovengtak ahonchiam keia, niteng haksatna toh amah zui dinga hon sinsak ahihdan Pastor in hon gen hi. Hiai sharing in lungsim hon sukha mahmaha, ngaikhetu kuapeuhin manpha kisa chiat hi.
Hiai sharing apanin, Jesu nungzuitaak(worthy disciple) kuate ahi ding ua? Hiai bible changa “niteng kros” kichi bang genna ahi de aw, chih khawng lungsim ah hong lang mahmah hi. Atangpi a igen chiangin, bang hiam mimala haksatna leh puakgik ineih chiangin ‘ kros’ toh kitehkak in ‘niteng kros’ chih khawngin kigen khasek hi. Ahihleh, haksatna leh buaina ituah chiang chauha kros pua ihidiam, Jesu’n lah “niteng kros” achi jela? Hiaithu Jesu thugen athaka ngaihtuah poimoh mahmah ahihdan phawkin om hi. Kros chih pen hinkhua/niteng khosakna a haksatna iphutkhak te mai genna ahi diam? Ahih kei leh, mikhial leh dikna himhim neilou si dinga moh paih mihing khat ihihna (identity) genna ahi zaw diam chih khawng lungsim suangtuahna ah hong lang thak mahmah hi.
Hiai khial leh mohpaihsa ihihna theichian lehang, midangte chitlahna khawng gengena, ei kidiksak hinkhua zat ngam ding bang lou hi. Jesu sisan ziak lela “dik leh siamtansak” ihih dan nitenga kiphawk gige kawma Amah(Jesu) zuih ding ahihdan genna ahizaw diam, ngun takin ngaihtuah tuak mahmah ahihdan hong lang hi. Aban simtute ngaihtuah zom ding in koih ni hang.
Sharing zohin, Pastor Thuaminlian makaihna in upaten Annkuang Siangthou saina hon nei ua, gingtu paikhwmte, hunsawttak nungin, hiai Pathian thupiak ‘theih gigena annkuang’ sawk khawm kihihmanin, kiphur chiata, ka tang kei khading chi hileh kilawmtakin, ki thalawpna toh ann kuang kisawk khawm siausiau amanpha mahmah hi.
Toupa min phatin om hen. Mailam hunah Laisingthou hon sinsakna banga gingtute kithuahkhawmna hunmanpha neizomjel theih lametna toh hiai etkikna report izou ding uh. Kakipak
