Himahleh nang zaw na zilsa leh kiptak a na gintaksa thutak ah om gige in, kua akipan na zil hiam chih thei gige in. Huan Khrist Jesu ginna ziak a hotdamna mu ding a nang hon hilh pil thei Laisiangthoute naupang nou akipan thei khin na hi chih thei gige in. Laisiangthou peuhmah Pathian hatkhum a piak ahi a; huaiziak in thuhilhna ding, taihilhna ding,bawlhoihna ding, diktatna lam a kichilna ding in a phatuam hi. Huchi a Pathian mi na hoih chiteng sem ding a kimtak a kivan a, a kim theihna ding in (2Tim. 3:14-17).
Tulai in Laisiangthou simsuak kitamta, khut mah mah a gelh suak bang leng hun khop ki om ta, a banah a school leh college a zil a Ph.D. tan zou bang zong kibehlap tou zel a i om theih tak man un kipah huai lua hi. Tua igensate lak a tel phaban lou ten leng Laisiangthou thu i theihna ding deihna in Pathian niteng a Laisiangthou kisinsakna Naupang lam leh Piching lam in leng i neihna uh sawttak hita hi. Hiai hun tuh saptuam milip a ding a Laisiangthou thu sinna hun lemtang tak hi in mi tampiten theih beh tampi i neih uh gintak huai ka sa hi. Huchih lai in tampite mah in lusuk san in phattuam pih khollou chih bang leng om ve ve hi. Tukum nih sung 2020 leh 2021 in bel ginatak a zil kha lou, a biakin nangawn i hon louh hun tam zaw ahihman in theih behding zah theih beh lou i suak vek uhi. Sawltak Paul in Timothi dinmun a theihdan leh hasotna a neih Laisiangthou a kigelhte en khawm leng
1. ZILKHIAK THUTE LEH GINNA A THUTAK A OMNA DING IN. Timothi in Laisiangthou bang chik a koisan a zil a bang tan zou ahi ding hiam chih tuh dot tham ching thu himai thei hi. Himahleh a zilna mun leh a zil hun kigenna i mu khol kei, Paul in a laikhak a, agelh i muh tuh hiai ahi:- “Ginna tak tak nangmah a om ka thei gige a, huai ginna a tung in na pi Loisi ah a om a, na nu Iunisi ah leng a om a, huan nangmah ah leng a om chih diktak in ka thei hi”(2Tim 1:5) Hiaite insung tuh Bible School, Bible College leh Hotdamna camp, a theimasate teacher/Lecturer leh speaker a pang thei ngal a bat man un inkuan enhuai leh ettontak mah mah hi ding uhi. Paul in zong a suan mah mah hi ding uhi.
2. LAISIANGTHOU AH PILNA OM HI.”Huan Khrist Jesu ginna ziak a Hotdamna mu ding a nang hon hilh pilthei LAISIANGTHOUTE” chi in Paul in Laisiangthou hihna leh nasep theihdan Timothi kiang ah pulak hi. Hichituk a laibu manpha, pilna leh bitna lampi a hon pi thei,lam haihte a ding a lampidik muh theihna dia meivak, tek leh vuaite ading a chiang khun, lau leh lingte ading a khamuanna, lunglel lung kete ading a tung dingtu,Pathian thangpaihna mulkimhuai apan suahtakna thu kigelhna laibu ahi.
3. NAUPANG NOU AKIPAN THEIKHIN:- Naupang Nipi Skul zillai Beginner ‘A’ apan ‘Senior’ tan hoih tak a zilkha naupang tuh Hotdamna thu, nungzuihna leh Khristian niteng hinkhua ah leng amah leh mah kikem thei, midang hilhsawn thei loute leng salam leh khalam ah hamhaih lou leh lam haih a gam mang tawm deuh a dia aw ka chi hi. Huaite mah in Piching Pawl Nipi Skul leng ngaihnat huai ahih dan a theisiam ua, a ngaina leh lung lutte mah in hinpih ding, zuih ding, leh khosak pih ding thu leh sinsakna tampi mu in a phattuampih zel uhi. Timothi zong naupang nou ahih akipan api leh anute sinsakna ziak a muantham ching, kemtu, makaihtu, leh sinsaktu hiding a Sawltak Paul in sithuai sa het lou hiding hi.
4. PATHIAN HATKHUM:- Khovel ah laibu hoih leh a gelhtu minthang tampi om mah leh a thute Pathian hatkhum chih om nai lou hi. Laisiangthou bel Pathian hatkhum a piak ahihman in thuhing(living word) kichi a, thilhih thei, hinna leh kha (soul and spirit) a tuam a khen thei ahihman in ziltham sut tham pen mah himok hi. Ahihhang in khovel mipilten theisiam lou ua, Khamiten bel Pathian thugukte tan in thei thei uhi. Hiai Pathian hatkhum thuhing zatna ding a Laisiangthou mah in hon hilhte tuh:- thuhilhna ding, taihilhna ding, bawlhoihna ding, diktatna lam a kichilna ding in a phatuam hi, chih ahi.
5. PATHIAN’ MI NA HOIH CHITENG SEMDIA KIVATNA:- Nasem ding peuhmah in kivatna(dress) ki nei chiat hi.School kai ding naupang ten zong amau uniform chiat zang in school kai zel uhi. Doctor, Nurse, Sepaih, Police chihte khawng in zong uniform nei uh ahihman in a hon silh chiang un etmai in leng hiai tuh Doctor ahi a damlou en ding ahi chih theih theih in om hi. Huchi bang zel in a dangte leng a silh leh ten, a kivatnate ua kipan ahihna uh leh sep ding mohpuaknate uh theihtheih hi. Pathian’ mi nna hoih chiteng sem ding te kivatna ding tuh Pathian hatkhum Laisiangthou thu ahih ding ahi. Nna hoih chiteng semtu hiding leh a hoihloute leng sem hoihtu hithei ding in NIPI SKUL tungtawna i sinkhiak Laisiangthou a kigelh Pathian hatkhum thuhingte zang a thop a om ding in Toupan hon vualzawl hen.
