Pentecost chih tuh Greek pau ahi a, ni sawmnga chihna ahi. Hiai kut tuh Judate’n Nipikal kut leng a chi uhi.Barley buh lak zoh a, Wheat buh lak akipat kuan tak ua, a zat zel uh, Pathian kianga haithak latna leh kipahthugenna ni ahi. Hiai ni sawmnga koi apan a sim pat hiding hiam i chih leh Paikan kut ma a Sabbath om pen apan sim touh a Nipkal sagihna ni sawmli-le-kua zing akipan hiai kut a zang sek uhi.(Lev.23:15-21;Deu.16:9-11) Tua i gennop pen bel Toupa Jesu thohnawn nung ni sawmnga a chin a Kha Siangthou piak a omni a thil tungte leh a sukkhak mite toh kisai lam ahizaw.
Nasepte 2: 1-4:-(1) A vek un mun khat ah a om khawm uhi.(2) Thakhat in van a kipan ging huihpi nung bang in a hong om guih a;(3) Huai in a tutna uh ahihdim vekta hi. (4) Leite amah-le-amah mei bang a kihawm in; (5)A’ lutung uah a tuang chiat hi. (6) A vek un kha in a hon luahdimta a;(7) Kha in hih theihna a piak a, a pausak bang zel in paudangin a pauta uhi.
Khasiangthou Tang Mite Omdan:- Kha in hihtheihna a piak a, a pausak bang zel in paudang in apau uh. Hiai a kha in a piak “paudang” kichi tuh “pau theihlouh” hilou in huai a, kut zang ding a hoh gam tuam tuam 16 vel apan hong pai khawm pau tuamtuamte’n a gen uh, a theih uh pau ahi. A paute lah Galili gam a mi ahi uh(Nas.2:7). Laisiam leh mipil leng hilou, mimawl leh namniam hinapi in paudangte’n amau pau a thugen bangmai-a a theihsiam uh, lamdang sa in a kidong tuah uhi.
Peter Thugen:- Judate, launa toh dai sipsip leh ngaklah tak a Toupa Jesu thukhah, “Pa thilchiam na-ngak un” a chih ngak a om, Khasiangthou a thopna a hongtan chiang un, Peter in sawm-le-khatte toh dingkhawm in thugen a honpan a – “Nou Judia gam a mite aw, nou Jerusalem a om tengteng aw, ka thugen ngaikhia un. Hiaite na gin bang un akham kei (zu a kham kei) uh, Zawlnei Joel in a gen ahi zaw… nou Israel mite aw, hiai thu za un, Nazareth Jesu, migiloute khut in kros a kilhden in na hihlum uhi. Amah Pathian in sihna thuaknatna phelsak in, a kaithouta a, Amah sihna letden vual ahihlouh ziak in. Tu in na khelhnate uh ngaihdamna ding in lungsim khek unla, Jesu Khrist min in baptisma tang chiat un, huchiin Kha Siangthou thawnpiak na tang ding uh. A’ chiam, nou aa ding,na tate uh aa ding, gamlapi a mi tengteng aa ding leh Toupa Pathian in a kiang a asap peuhmahte aa ding ahi” a chi hi. Huan a thuzui peuh in baptisma a tang ua, huai ni’n mi sangthum vel behlap in a om uhi.
Mat a om nitak a thum vei kitheih mohbawl pan, Pentecost ni in Juda vaihawmte leh mipite mai ah Jesu tanchin hangsan tak leh lau nei hetlou in a gen phekphek ngamta hi. Launa kha hinawnlou in hangsanna kha a tangta. Huai Kha Siangthou mah ahi tuni a nang leh kei tunga seem zelpa, akiang ah I kipe ding uh.
Tukum Pentecost Ni In:- Koi ah na om in bang na seem a? Gam tuamtuam a nekzonna ziak leh siamsinna ziak khawng a om, mahni tenna state leh innlum naih a kivial leh vingvengte’n tukum Pentecost ni koikoi ah i zang ua? Inlam zotna lampaina azang bang, Quarantine Centre a chimtak leh bang ka chi di’a aw… chi a lungngai kawma zang bang leng in omngei ding. Tua kia hilou natna thuak a, beidong kisa ‘khamuanna’ ngai a om leng i om ding uh. Summuhna teng lah kitanta, neihsa lah om nawnlou, nek ding tak ngial leng omlou zaw-mah lai bang leng i om ding,buaina akibang kei ding, poimoh leng akibang kei ding. I muante’n hon taisanta, i lamette’n hon kitheihmohbawl, I kinepna pente na-ngawn i gintak hong bat nawn louh lai in PENTECOST ni a vehtu Khasiangthou na tung ah hong tuang henla, Khalam halhthakna thupitak leh lametna thak toh hong veh mahmah hen!
Nungzuite hangsanna, thillamdang hihtheihna toh vehtu Kha Siangthou in hongseem nawn hen! Buai lua bangmah ngaihtuah thei nawn lou a i om ma in, “NA PIANGTHAK TA HIA?” chih ka hondong ahi. Piangthak nailou na hih zenzenleh kingaihtuah in, akikhel ma in, Toupa Jesu min in k’on ngen hi.
