Nipini Biakna kikhop I neih nanung pen uh March 15, 2020 ana hita, tuni chiangin Pathianni/Nipini 11(eleven Sundays) biakinn a kikhawm theilou in I omta uhi. Biakinn a gingtute’n kikhop khawmna nei theilou himah lehang, Laisiangthou in, eimah mimal hinna leh pumpi Pathian pomtaak hidi’a kilaan dingin hon sinsak hi. "Pathian lungtuak dingin na pumpi uh kilaan dingin ka hon ngen hi; huai tuh na biakna dan ding him uh ahi" (Romete 12:1-2). Hiaia 'Pathian pomtak (pleasing to God)' leh 'biakna dan ding him (spiritual act of worship)' chi-a agente pawlpi biakkhawmna (mass) hilouin, gingtu michihin niteng hinkhua zat ding dan leh tua tungtawna I latsak dingte ana hizaw hi. Huaite atomkimin Igen ding uh:
Khatna ah, Itna: Romete 12:9-10 ah unaute itna bang hihiam chih agen hi (love must be sincere, be devoted to one another in brotherly love). Gingtu khat-le-khat kala hiai bang itna nei mi'n Pathian pomtaak biakna ahinkhua ah alaan hi. Ei gingtute’n hiaibang unaute itna toh niteng hinkhua I zat gige uh kiphamoh hi. Kam kia a ki-it, kimuh chiang kia-a kiphawk gingtute himai lou a, khat-le-khat ki-ittuah leh kideihsakte hih chiat sawm ni hang.
Nihna, "never be lacking in zeal, but keep your spiritual fervour (12:11): I hihna leh mohpuaknate taima leh thanop suaha, kithalawp taka pang chiat dingin hon sinsak hi. Huai mah tuh Pathian adi’a pomtaak biakna ahi. Sepna leh pankhakna tenga phunna leh lung kimlouhna ding kia mu, kithalopna himhim neilou pi I hihleh Pathian pomtaak biakna leh nasep ahihlouh khak ding lauhuai hi. Bangpeuha kipapiak (volunteer) leh kilawp(fervor) taka seem mi, taksa thil ahleng, alohching leh gahsuahte ahi uh.
Thumna, kingaihniamna (humility): "Kingaihtuah sang lawkei unla, mi neuneu kithuahpih un"(12:16). Mahni dinmun leh hihna mi'n hon theikei kha ding uh' chi hileh kilawma, kiliansak leh kisathei mai lou dingin Laisiangthouin hon sinsak hi. Khat veivei eilakah caste system neikei mah lehang le class a ki-etna gingtute lakah leng om adiam aw' chih theihin om a, poi mahmah hi. I pi-le-pu khanga leng hanla sate, banghiam athupi deuh, samat-galmat nei bang om chia "Ka thang eii…" chi a, hanla sapah vongvongte I hihna ah kisaktheihnna leh kideihkhopna lungsim I lak ah piang baih mahmah hi.
Alina ah, "Misiangthoute taksapna ah taksap awng hu un (Share with God's people who are in need 12:13): "Na puakgikte uh kidawntuah chiat un, huchi'n Khrist dan thu na zui uh ahi ding(Gal 6:2)". Tasam leh gentheite panpihna tuh Pathian pomtaak biakna ahi. Paul in Phillipi saptuamte kiangah, '..n’on awlmoh mahmah ua, himahleh hon panpihna ding hun lemchang na mu kei ua ahi (you have been concerned about me , but you have no opportunity to show it(Phil 4:10)" ana chi hi. Gingtute khat-le-khat ki-awlmoha, awlmohna thu vuak hiloua ataka seemkhe dingte I hi uh. Tu hunhaksa I maituah laiin, awlmohhuai I sakdan athu a genthoh mailoua, genthei leh haksatna thuakte ataka panpihna ding hunhoih (opportunity) mahmah, ahimai kei di’a hia, chihin om.
Ananung pen ah, mikhual/midangte zindouna (hospitality) ahi: "Mikhualte kipahpih un/ Practice hospitality (12:13) chih I mu hi. Mel theihsa leh mahni aate kia buaipiha om tuuktuuk mai loua, midangte leng awlmoha, amaute tunga siam suah ding tuh Pathian kipahpih lam ahi. Zindouna toh kisai Laisiangthou mundangdang ah leng (Isai 58:7, I Tim 5:10, Titus 1:8, I Peter 4:8) I mu hi. Gingtu mahni kideihkhop lua midangte ngaihsaklou hih khak ding alauhuai. Abiiktakin, khopia aom gingtute, mikhual zin leh vakvelna mun ah, hiai hospitality poimohna kilang baih mahmah hi.
Unaute, Pathian pomtaak biakna hinkhua laankhe thei gige ding in Pathian Khasiangthou hihhalhna mah niteng in apoimoh gige hi. Huaiziakin, tuni Penticost day ah I thumna laa hiai hihen aw -
“Aw Khasiangthou honhalhsakin,
Ka tha uh hatsakin;
Ka ginna un hon musakin,
Tua a gam nuam mahmah....”
Simtute Toupa'n hon vualzawl chiat hen aw!
