Khualzin chiang in tanaute kiang a tun bang, lawm ngaih mahmahte kiang a tun bang, meltheihte kiang a tun bang, sepna kibatpihte kiang a tun bang a nuam a, huchibang omlouhna mun ah leng mi paunuam, zindou siamte kiang a tun tuh a nuam mahmah mai hi. Houlim siamte ngial a hong houlim ua, bang chichi hiam bek a kinaina omdan in hong kigen tuah ua, a moute uh ziak bang, a nuphalte uh lam bang, a inkhangte uh tanaute chih bang a insakte uh behte chi bang in hong kigen sunglut thei bang leng om hi. I khualzinna a nai leh tanau, beh-le-phung in i buai a, hong gamlat deuh leh khopihte chih bang, agamlat deuh lai leh i chi-le-nam omna state bang, omna gam leh continent bang hong hilai ding hi. Tuabang a kingaihnatna, kinaina, ki-itna leh kideihsakna hong om thei hi. Hiai tengteng tung pek a om Pathian naih leh kigamla loute hamphatna mi tamloute apan i sutkawm ding.
TIMAI TAPA BALTIMAI (Mt.20:29-34; Mk.10:46-52; Lk.18:35-43) A dinmun et in hiai mi tuh mi enhuai hetlou mitdel khomu thei lou ahi. Himahleh a bil in a za thei a, a khe zang in a paithei a, a kam apan aw suah in kikou khe thei hi. A hoih teng leh a zat theih teng zang in Jesu tanchin mi gen na za hipeuhmah ding hi. A totna ding lampi ah na pang in Jesu a hong paita chih a theih in “David tapa ka tung ah zangai in” chi in ngaihtak in na kikou hi. Mipiten kikou nawnlou ding in khou mah le uh, tawp naksang in kinak kou semsem hi. Jesu’n amah sam sak a, Jesu’n a sam chih a zak phet in kipak lua in a puante paikhe zen in a “NAIH” pah mai hi. A kiang a tun tak in Jesu’n “Bang hon hiihsak leng na ut a?” chi’n na dong pah hi. Huaitak in aman “Heutupa muhtheih ka ut” chi in dawng hi. Huaitak in Jesu’n “Paita in na ginna dampih hiteh” a chi a, huchi in a muthei pahta a, lampi ah Jesu a zuita hi. A mit mialna leh khomuh theih louhna damsak thei Tapa Pathian Jesu kiang zuan ding in a taksa hiang a hoihte manphatak a zang in, a sia a mit zong bawl hoih in hong omta hi. I taksa tung a zawngkhalna tuamtuam i neihte tutpih mailou in a zat theih, i taksa kahiang tuam tuam omlaite a phatuam thei pen a zang in Pathian naih ni.
NUMEI KUM SAWM-LE-NIH SI PAWT (Mt. 9:20-22; Mk.5:25-34; Lk. 8:43-48). Hiai numei tanchin akigen tam het kei, a nu-le-pa, a u-le-nau, a tenna khua leh a chi-le-nam genna a kitheihlouh man in sut i sawm kei a, gintak thu leng gen i tum tuan kei. Himahleh Laisiangthou a kigelh dan in - kum sawm-le-nih sipawt a chi na, a sum neih tengteng daktor-te lakah a zang khin ta a, kuamah in ahihdam theih tuanlouh uh chih ahi. Hiai numei tanchin hiai teng ahi, himahleh i gen beh nop dan tuh - a damlouhna tuh pai pih theihlouh khop natna ahi kei a, muthei lou a mit mial natna leng ahi kei, za theilou leh pau theilou, ne theilou leh dawn theilou leng ahih chi kei a, hampha pi tuh ahi. Kum sawm-le-nih sipawt ahihman in lungkham lua in a damtheih khak leh chi in a neih teng seng in daktor a na naihta chih i mu uhi. A neih teng a sennung in leng a dam tuan kei lai chih tuh a tan chin ahita. A ban omlai tuh tuni a i gen tupna mun pen uh ahita. Jesu tanchin a naza a, a nung ah mipi lak ah a hong pai a, “A puanmong kia khoih leng leng’ hihdam in ka om mai ding” a lungsim a chi in Jesu puanmong a khoih hi. Huan thakhat in a sipawt a kam ngal a, a natna hihdam ahi chih a sa ah akithei ta hi. Amah asi kam ahi chih akitheih banah Jesun leng a sung apan a thil hihtheihna pawt ahihlam a thei a amah longtu, a puanmong khoihtu a zong chih tuh i thei uhi (Mk.5:25-34). Kuapeuh natna bei om ding in a gintak huai kei, huai damsak utlou leng om din i gingta kei uhi. Numei sipawt bang a, neih teng bei nung a leng dam tuanlou chih tuh a tamzaw leng hiding in gintak huai lai hi. Ahihleh en kua i naih ua le, kua kiang i zuan ua, i gin leh muan Jesu kiang naih lou a, bum lehtheite kiang bang, maibi, maibate kiang bang, khutlam entheite kiang bang, dawi aisan siamte kiang khawng naih mai mah i hih khak ding uh lauhuai hi. Pathian mah nai ding in kisa ni.
Timai tapa Bartimai leh Numei sipawt-ten zaw Salam damna leh khalam damna a pekhawm thei, Tapa Pathian Jesu Khrist kiang a naih ziak un mitvakna leh sipawt khawlna kia hilou in, “na ginna na dampih ahi khamuang tak in om in” chi a khamuanna thupha toh vualzawlna tanglai uhi. Dam nung a leng khamuang lou a om nilouh theih ahihlai in Pathian naih a, Pathian bel mite zaw leitung thomhau huaitak leh nel huai hetlou mun na ngawn a leng khamuang a tawldam hithiat dia vualzawlna tangte ahi sek uhi. Tuabang a tang thei chiat ding in Toupa Pathian apan khamuanna deih huaitak noute a’ hong hi chiat ta hen.
