Thupatna: Saptuam kep tuh sapna sangtak leh chouna (Challenging) thupi mahmah ahi. Tate tunga nulehpate mohpuakna tuh sapna sang zawlai leh chouna thupi zaw ahi. Pathian deihdan a tate pi a, Pathian lau ding a tate na chil pichingte tuh ngaihsanghuai in zahtak huai uhi. Tuni in tate tunga I lohsapna te khong enleng, Toupa’ deihdan a I kepnung a sia teitei hia ahihlouh leh I keplouh man a sia? Dotna poimoh tak ahi. Pathian deihdan a I kepnung a sia teitei ahihleh I ngoh ding omtuanlou, eimoh le hituanlou hi. HImaleh I panlaklouh ziak ahihleh eimoh ahi.
Tate kepna a theihsiam haksa khat tuh nulehpa hoih mahmah, Toupa lau banah Toupa deihdan a tate le kem hi a theih hinapi tate sia teitei om uhi. A langkhat ah, nulehpa’n le Pathian limsak khollou, tate bang thuhilh thei khollou hinapi, a tate un Toupa lau a, hinkhua hoihtak a zang leng om uhi. Hiai toh kisai Bible ah leng chianglua mahmah ahi. Toupa lau hetlou kumpi Amnon, Ahaz te’n Pathian lau kumpi Josiah leh Hezekiah suang uhi. A langkhat ah Pathian lau mahmah kumpi Jotham leh Hezekia te’n Pathian lau hetlou Ahaz leh Mannaseh banah Siampu hoih mahmah Samuel in tapa hoihlou Joel leh Abijahte suang uhi (I Sam. 8:2-3).
Hiai apan ngaihdan hong piangthei, Melma Satan kipahna tuh hiai ahi. Tate khong hilhhat leh kepsiam thu le hikei, a hoih dingte hong hoih mai ua, a sia dingte hilh hilh lengle hoihtuanlou chi in inkuan kikepna ngaihzamna hong lian mahmah hi in kamu hi. Hiai bang ngaihdan lenkipte ading in, nu leh pa mohpuakna omlou chih na toh kibang dinga, Lai Siangthou in tate kem dinga hon sinsakna kalh kha hizel dng hi. Satan in thudik kimkhat toh Adam leh Eve khem a, tua thudik kimkhat mah toh inkuan hon khetpaih sawm ahi. Hiai kinialtheihna (Argument) tham ching mahmah hi in ka thei hi.
Lai Siangthou ah Pathian mizat tuak, tate tunga lohsam minih apan sinlai la leng uthuai kasa hi.
1. Siampu Eli: Siampu Eli tate gamtatna hoihlou ahihman in Toupa thangpaihna sawk kha uhi. “Huchi in tangvalte khelhna Toupa mitmuh in a thupi mahmah a, mite’n lah Toupa kiang a kithoihna lat thilkihhuai in a ngaita uhi”(I Sam. 2:17). Pathian, Eli tate tung kia hilou in, Eli tung ah leng heh mah mah hi. “Bangziak in ahia ka tenna a na lat ding ua ka thupiak ka kiang a kithoihna leh kei a tuam pen lei toh sikden a, kei sang a na tate na zahtak zawk a, noumau kisukthauna dia ka mi Isrealte kithoihna a hoih pente na zat uh?” (I Sam.2:29). Huai banah Eli in a tate tungah a mohpuakna semkhia lou hi. “A tate’n Pathian a gensiatna khelhna uh theigigena pi a, a khamlouh ziak in a inkuan tangtawn adin ka hawmsak ding hi, chih ka hilh khinta ngal a” (I Sam. 3:13). Eli tate Hophni leh Phinehas te a khelhna ziak in si ua, Eli in tate tunga mawhpuakna a sepkhiaklouh ziakin si hi.
2. Siampu Samuel: Samuel leng tate toh kisai in lohching hetlou khat ahi nawn leuleu hi. “Himahleh a tate’n a omdan a lakei ua, sum leh pai a delh ua, golhna a la ua, dik a vaihawmna a kaikawi uhi” (I Sam. 8:3). Samuel tate toh kisai hiai teng kia kigelh hi. A lamdang mahmah tuh Samuel a tate gilou mah le uh leng, tate tunga a mohpuakna sem khia hi ding in ginggtak huai hi. Eli banglou in Toupa’n zang lai veve hi. Toupa thute a kianga tung banah kumpi Saul leh David thaunilh kha lai hi.
Siampu tegel I etchiang in, a tate uh leng siampu nasem tuaktuak ahi uhi. A tate uh Pathian thu theihna a tasam om ding un gingtak huailou hi. Himahleh paikhial veve uhi. A hih ziakin Toupa’n a mohpuakna uh a sepkhiak leh sepkhiak louh uah thu khen ahihdan kilang hi.
Thukhitna: Inkuan lohching ihi hiam chi hi masalou in, Toupa’n mohpuakna honpiak inkuan ah i semkhia na hiam? Chih dotna kibawl tuak kasa hi. Tate ah lohching bangin i kilang kholkei maithei, hinapi in nulehpa hihna a mohpuakna piak a I om bangbang sem peuhmah leng, Toupa’ngaih a lohching I hi thei hi. Toupa lau a thupiakte zui ihihleh inkuan mohpuak nelsiah theihlouh himhim ahi. Himahleh tate Toupa deihdan sinsak ziak a hoih teitei ding uh, ahih louh leh sia ding uh chih kigen theilou hi. Himahleh Nu leh Pa te’n I mohpuak na ngai poimoh in, I inkuan Pathian in Amah nasepna mun dia hon piak chih phawk in, naktak a pangchiat dingin I kichial hi. I Toupa’n simtute hon vualzawl chiat hen. Amen.
