Pathian naih un, huchi in aman a hon naih ding hi
Jakob 4
Christmas chibai!
“Mang’ pianni lenmual khumsa, a hongtung nawnta” chi a la I sak bang in khovel hun haksa leh natna leh dahna tampi lak ah Toupa’n hiai hunbi poimohtak Mang’ Pianna lopna hun ‘Christmas’ hon muhsak man in Toupa’ tung ah kipahthu gen in thupina leh minletna tengteng amah I pia hi.
Christmas hun tuh gingtute a ding in khovel khangthu a hun kipahhuai penpen khat ahi. Huchih lai in, insung leh mimal a thiltuah khenkhatte ziak a kipahna lam sang a lunglenna leh thawmhauna hun a zang kha om khak theih ahi a, poisa in I kithuakpih mahmah hi. Huchi bang mite ading biik in leng Toupa’ ompihna leh khamuanna I ngetsak ahi.
Pathian naih kichi bang chihna hi a, bangchi bang a Pathian naih sem thei ding I hiam chih saulou in taklang le’ng -
Pathian naih kichi tuh, tomchik a gen in, Pathian kiang zuan chihna ahi. Pathian mel zonna, Pathian deihdan zonna tuh Pathian naihna ahipah hi. Taksa a kalsuan khiakna ahi masa kei a, lungtang tawng pen apan Pathian naihna ahi. Huai tuh Jesu Khrist ginna tungtawn a thilhih genna ahi [Jak. 2:26]. Huaiziak in, koimun peuh ah om mahle hang leng chiklaipeuh in Pathian a naih theih gige hi.
Pathian tellou in thil tengteng a thawn vek ahi [Sam 127;1]. Mihingte hinna bukimna tuh Pathian toh kithuahkhawm [fellowship] ahi. Pathian toh kigamlapi a om kawm in kuaman hinkhua manpha kizang theilou ding ahihman in chiklaipeuh a leng Pathian toh kinai gige a om ding ahi. Pathian toh kal bawldikna ding in amah I naih a poimoh hi. Pathian naih dia thupiak a om I hi. Aman a hon naih theihna ding in eite’n amah I naih a poimoh hi [Jak.4:8]. Khemna apan bit a khelhna apan i suahtak theihna ding in Pathian naih a poimoh hi.
Ginna tungtawn in Pathian I naih ding ahi. Ginna lou in amah [Pathian] pahtak lammi hihvual ahi kei [Heb.11;6]. Pathian in a hon itna nasep in hon langsakta hi- Christmas ah [Jn.3:16-17]. Huchi bang in, ginna nasep in Pathian I naih thei ding uhi. Lungtang tengteng toh kimuangngamtak in Pathian I naih ding [Heb.10:22]. Pathian deihdan nate sem in amah kiang I zuan ding uhi.
Suahlam mipilte bang a gou manphate tawi in Pathian I naih siausiau ding uhi. Gamlak a belamchingte, lungzuang leh thawmhautak a omte, bang in Khrist Jesu toh I kituah mateng amah kiang zuan in I paizel ding uh. Van Aksi zui zel in awle Pathian kiang I naih ding uh! Saptuamte lak ah Christmas tungtawn in Toupa’n Khalam halhthakna, damna bukim, kilemna leh muanna hon tunta hen, Amen.
Hiai thugelh Gamchiam - Dec 25, 2021 issue a suah di’a kingen, a kimuh zekai zek ziak a tu, DEW - Kumthak issue a hong kisuah ahi. Gelhtu: Rev V Nenglian, EBCC Delhi kemtu a na pang ngei; Director (Dev.) len di’a EBC Kumsim Khawmpi, 2021 tungtawn a teelcing thak liklek ahi. TOUPA’N thugelh, a gelhtu, huan, a simtute thupha hongpe tekta hen!
