Heutute deihsakna tang in EBCC Delhi newsletter (Gamchiam & DEW) a thugelh ding hamphatna piak a ka om man in kipahhuai ka sa hi. Hihtheih tan a kisa in ‘Pathian naih un’ chih thupi pansan in saulou k’on gelh hi. Simtute Hondampa Jesu Khrist min in kumthak chibai k’on buk hi.
I Laisiangthou tang tel ah Pathian naih un chih chiang ah a tawp kei a, i naih leh ama’n hon naih ding chih hon hilh hi. Hiai thuchiam thupi nihte’n thanopna honpia in hon hasuan mahmah hi. Pathian toh kichimat leh naichik a kithuah gige ding mohpuakna nei i hihdan hon thei thaksak hi. ‘Naih un’ chih tuh thil bangpeuh deih i neihte tan theihna ding in vanaih le’ng tang ding i hi. Pathian naih un chih tuh Pathian kiang a pai a Amah toh kichimat a om ding chihna ahi. Jakob in Pathian i naih leh aman honnaih ding chi’n hon hilh hi. Mihingte’n poimoh i sak leh deihte i tup nak leh sepsuah theih zel bang in langsek mah leh Pathian toh pangkhawm a sep a hihlouh chiang in kuitung thei taktak lou hi. Mi kuahiam i vanaih chiang in amau toh kinai in houlim theih hi. Huchibang in thil banghiam i deihte mah leng zong a i vanaih leh neih theih dan lampi om zel hi. Ahi a, tua i tangtel a Jakob in a gennop tuh salam a kithuah a mihingte bang a omkhawm hilou in, khalam a Pathian toh naichik a omkhawm ding gen hizaw hi.
Tapa taimang in a lungtang tawng ah thupukna bawl in a taisan sa a pa toh kituak a a kiang a omnawn ding lunggulhna nei hi. A omna mun gamlapi himahleh a inn ding zong in, apa’ inn ah hong kik hi. Huchi a thupukna la a, a pa’ inlam zuan a hongpai tak in, a pa’n ana galmuh a, inmun a ngakmai lou in taimangpa dawn ding in a pa’n vanaih a pom in kivaidawn uhi. A pa’n a lainat mahmah mai a atawp tonton hi (Luke 15:11-32). Tapa taimang pen in a lungsim bawl a apa’ kiang hong kik a naih chiang in, muhdah leh hehsan mailou in itna mit toh en a naih in kawi hi. Hiai mah Pathian’ lungput ahi mikhial eite hon itna ah. Pathian in amah kiang zuan a i naih ding deih ahi. Leitung hinkhua zang a lamsuk lamtou, anuam leh haksa tawn a i pailai in, Pathian in i zuih lampi tawp a ngaklahtak a khe tatging keuhkeuh kawm a i tun ding hon mun ngak bang in ngaihtuah kei ni. Huai sang sik in, diktak a gen in Pathian in amah naih ding a lungsim thupukna gin-om tak a bawl a akiang zuante naih a ittak a pom ding in mansa gige hi.
Khat veivei Pathian biakna nei, a thute gen in, phatna late sa a thumna neihte’ Amah naihna a hi i chi hi. A minpu lel leh kilawmna zong a mihing mitmuh a phat loh utna lel a sem i hikha maimah diam? Hehpihna mangtutphah hangsantaka naih ding in Bible in hon hilh hi. Huchi in zahngaihna i muhtheihna ding leh huh i deih chiang a huhna hehpihna i ngahtheihna ding in, hehpihna mangtutphah hangtak in i naih ding uhi (Heb.4:16). Pathian mangtutphah ngetna leh phatna toh i naih ding uhi. Huan, Pathian naih ding a thupukna i bawl khit ngal leh khelhna toh hitheilou ding, khut ninte silsiang ding, lungsim thuahnih neilou a ngaihtuahna siangthou toh naih ni. Jakob in hon hilh bang in, ‘Huchi in Pathian thuthu in om unla,Toupa mitmuh in kingaineu un, huchi in a hon hihlian ding hi” (Jakob 4:7a,10). Tapa taimang in a dinmun siatdan hong kiphawkkhia a, vokte an nek nasan duhgoh ding khop a genthei leh niamkiak ahihdan hontheihkhiak tak in dinmun hoihzaw leh hotdamngai ahih lam a theih chiang in, kisik a lungsim khek in a pa kiang hon zuan a, a lamet sang mah a angtang in a pa’n a pom hi (Luke 15:17).
Kisikna tellou in hotdamna ngahtheih louh hi (Luke 13:3; Acts 2:38). Khelhna te tawpsan loupi, diklouhna leh nitna te paikhelou a tuate hih leh khelah kawm in Pathian kiang naihtheih louh ahi. Ei hon hihnok peuhmahte paihkhiak masak kul ding hi (Heb.12:1). Aziak tuh ei a khelhna om in Pathian toh i kal hon khen ahihman in (Isai 59:2). I tup leh ngimte ah Pathian lunglutlou in koih kei ni, Amah lam naih ding a lungput i neih ding a deihdan ahi chih mangngilh kei ni. Kisikna lung sim nei a’ Amah lam zuan peuhmahte pom di’a mansa ahi. Zakai siahkhonpa’n Jesu mu ut a lungsim a neih akipan, a muhtheihna ding lampi gelsak Pathian mah ahi a, Zakai pau ma in Jesu’n houpih a, ‘Zakai, na inn a tung ding ka hi’ chi hi (Luke 19:5). Tapa taimangpa naihtu Pathian, Zakai inn a zintung a hotdamna tunpa Pathian, tuni in nang leh kei Pathian a dang ngeilou a hihman in, kisik in Amah kiang zuan a naih thei chiat ding in Toupa’ Kha Siangthou in hon vualzawl hen!
