“Huchi ahi a, a inn a ankuang a umlai in, ngai in, siahkhonmite leh mikhial tampi a hong pai ua, Jesu leh nungzuite a umpih uhi. Pharisaite’n huai a muh un, a nungzuite kiang ah, ‘Bang dia na heutupa un siahkhonmite leh mikhialte kiang a ne ahia?’ a chi uhi” Matthai 9:10, 11
Soisel ut kuamah ki-om lou hi. Himahleh soisel bei kuamah ki-om tuanlou hi. Nasep nna khat peuhmah a, soiselna koilam hiam ah hong om nak hi. Mi inn a pawt in, a inn lamdan uh va soiselsak ngapte i hi uhi. I nasepna ah soiselna i ngah ngeikeileh a semlou hiam, i nasep poimoh lotel lou khat ahi diing hi. Soiselna chi nih bang in khen theih hi. I nasep hoihlouh ziak a soiselna leh sem hoih mahmah napi a soiseltu diing om thouthou chih ahi. A hoih bukim Jesu nasepna ah leng soiseltu diing, na kidaihlah mahmah hi.
Jesu’ nasepna i et chiang in, kuapeuh naih theih (approachable) diing in om hi. Damlouhna tuamtuam nei tampite’n Jesu kiang va zuan ua, damna ngah uhi. Damloute lak ah phaakte hehpihhuai diak uhi. Mipi lak a om theilou phetlou in, khopolam a koih ahi uhi. Mi kuamah naih diing neilou, naih ngam diing a leng dinmun neiloute’n, Jesu a naih ngam uh tuh thupi in lamdang mahmah hi.Tulai khovel ah, mite’ zahtak leh neel luat khollouh a om diing tuh mitampite’ utdan hileh kilawm ka sa hi. Mihoih leh zahtakhuaite toh kisukkhak ki-ut chiat hi. Kuahiam omdan hoihlou, genkai deuh khat toh kisukkhak diing tuh ki-ut lou vek hi. A ziak bel mite’n amau toh kibang a hon muh diing uh lauhna bang, hon soiselkhak diing uh bang kilau thei hi. Himahleh Jesu’n bel khotang in a tuam et, kithuahpih taaklou, mi dukdakloute naih theih diing ua a om ziak in soisel in om hi.
Tulai a ka lungsim a om mahmah tuh mite’ naih theih (approachable) in i om hiam? chih ahi. Mi’ hon naih theihna diing in bangchibang in kal i suankhia a? Siahkhonmite leh mikhial tampite’n a naih theihna diing un, Jesu’n siahkhon Matthai inn ah ankuang um hi. Huaiziak a, i sukkhak nop mite zil in i kalsuannadan kibang lou thei hi. Tuni in nang kuate’ hinkhua sukha leteh na ut hiam? Jesu’ kalsuandan bang a i kalsuan chiang nangawn in soiselna in hon zui thei mahmah hi. Jesu a soiselna sang ua thupizaw tuh siahkhonte leh mikhialte’n a naih ngam uh ahi. Tua banga nang leng midangte aa diing a naih theih/naih ngam na hi hiam chih i kivelna hileh uthuai ka sa hi. Simtu kuapeuh Toupa’n hon vualzawl chiat hen! Amen.
