“Mihing aw, Ama’n a hoih thil hon lakta a, Tangtawn Toupa’n nang apan bang ngiat ahia? A diktat a gamtat diing, zahngaihna it diing, kingainiamtak a na Pathian toh ton diing, chih ahi.”
Mika 6:8
Biakna i chih chiang in a neuzaw khat in, a lianzaw khat kiang a toukaina ahi. Toukaina tuh kiniamkhiak/kingainiamtak a, a Tou deihdan zui diing leh a ngaihdante pompih diing a kimanna/kiminna ahi. Tuni a i thupi teel ‘Pathian Limsakna leh Biakna’ ahihlai in Laisiangthou ah Pathian limsakna tellou biakna leng na om ahi. “Tangtawn Toupa vanglianpen in a gen a: Noute’n ka maitam tung ah an niinsa na koih ve ua. Noute’n lah: Bangchi a nang hon hihniin ka hi ua? chilai hi uteh. Tangtawn Toupa dohkan simmohhuai, na chihna ua minsesak na hi ve uah!” (Malaki 1:7). Pathian biakna toh kisai i gen chiang in, a program pen biakna sakha i hi diing uah aw? Saptuam programm i telna diing a kibawl hi in, i tel diing mah ahi. Himahleh saptuam program-te a teltel hinapi a, khalam khannna nei tuanlou i hihleh bel, program tan lel biakna a ngai i hikha diing uhi. Hiai hih lauhhuai mahmah hi.
Biakna toh kikhen theilou tuh phatna leh thilpiak ahi. Himahleh Pathian limsakna nei hetlou napi in leng phatna la sak theih a, thilpiak leng tam pipi piak theih hi. ‘Pathian limsakna biakna,’ zawlnei Mika in genchiang nuam mahmah in, Mika 6: 6-7 ah dotna, dawnkik ngailou dia a dawnna omsa bangzahhiam bawl hi. Bang toh Pathian mai a kuun diing ka hiam, bang toh hong pai diing ka hiam, bang toh Pathian lungtaisak thei diing ka hiam, khelhthoihna diing a bang laan diing ka hiam? chi in dotna bawl hi. Pathian biakna a vanzatte hoih mahmah, i biakna program paidan kilawm mahmah, i thilpiak leng thupi mahmah, biakna toh kisai a seennate sang mahmah himaithei, himahleh Pathian limsak biakna chih theih tuanlouh hi. Himahleh Pathian limsak biakna taang 8 ah Mika in gen hi. Huai tuh diktat a gamtat diing, zahngaihna it diing leh kingainiamtak a Pathian toh ton diing chih ahi.
Huaiziak a Pathian limsak biakna tuh Pathian deihdan a hinkhua zat diing ahi. Diktatna neilou, hehpihna it a, ngaithupi lou, Pathian mai a kingainiam loute’n Pathian limsak biakna pe theilou diing uh chihna ahi. Diktat a gamta a, hehpihna it a, Pathian mai a kingaihniamna toh phatna leh thilpiakte hong kithuah chiang in Pathian’ kipahna/lungtaina/lungkimna hong hithei hi. “Himahleh thilhoih leh thilphal mangngilh kei un, hiai bang kithoihna tung ah Pathian a lungkim mahmah hi” (Heb. 13:16). Pathian Limsak biakna theisiam thei diing in Toupa’n pilna hon pe chiat hen! Amen.
