Eklijiasti 11:9 Aw tangval, na tuailai ni kipak in: na tuailai nite ah na lungtang in hon kipak sak hen, na lungtang lampite ah leh, na mitte muh in om in: himahleh hiai thilte tengteng ziak in Pathian in nang vaihawmna hon pi ding ahi chih thei in.
Khovel kikhek nasatak lak a om tuailai tamtakte ading in ‘Pathian Limsak Tuailai’ hih ding haksa hi na mai e. Bang lam peuh ah khovel kikhek dan ithei vek hi. Nidang lai in pi-le-pu ten dawi le kau bia in niteng a nasem in a hinkhua uh ana zang uh hi. Ahinkhua un a semgim in a tawl mahmah mai uhi. A gim a tawl uh dawn zangtu ding in zu-le-sa in na kibual uhi. A hinkhua uh huchiin ana zangliam mai uhi. Bangziak a hiai te suut kik ihi hiam icih leh, tuhun kum zabi sawm-nih-le-khat (21) Sap ten ‘21st Century’ achih uh, hiai bang hun ah khantouhna nasatak lak a om tuailaiten bangkim bukim bang mai a angaihtuah in hinkhua a ipoimoh leng kim bang khop a i omlai in khalam thil a i et chiang in pi-le-pu te hunlai bang khop a zu le sa khamtheih a kibual ding tuailai hunkhop muh ding a omlai pen poi petmah hi. Khalam thil a et in amau zaw tangtawn lampi leh thutak ana za manlou ua himaleh eite huci theivual kihi lou hi.
I khelna ziak ua semgim dia hamsiat a om ihih man uh tuailai tamtak te (kei tel in) niteng nasepna in i hinkhua uh i zangbei zel uhi. Huai bel ahi ding mah leng ahim aziak bel khovel a hinglai ihih man in miteng taksap leh nek-le-taak kauh khomlouh theihlouh ahih na ah. Huci kawmkawm a manghilh hetlouh ding tuh Pathian ahi. Tuailai thahat tak, fel tak leh lungsim hat tak te banglam peuh ah ipoimoh a, saptuam in leng ahon kisaktheihpih mah mah te ihi. Tuailaite saptuam khuam poimoh mahmah khat leng ihi uhi, bangziak in? Pathian in eite agam adia i tha-le-zung ihatna te zang ut ahih man in, a hucih kawm kawm in Setan inle tuailai te mah van zat hoih pen in neih tum a tamtak huai sal ah tang in suahtaak haksa sa petma ua himah leh Pathian hatna muang a pan la a huai bang sal tan na apan suah tak tum te Pathian inle panpih a suakta zel uhi.
Tuailai ihi ta a, mahni a ki tou delh thei ihi tham ta hi, himah leh apoimoh mahmah khat tuh nu le pa thumang a adeih dan ua om tuh Pathian deihlam tak leng ahi. Sepna ziak a khen khat te nu-le-pa to omlou tamtak i om tham uh hi, himah leh ahon lam et na uleh adeih dan uh theichiat ding ihih man in tua bang a nu-le-pa toh omkhop louh hun a leng adeih dan uh zuih gige tuh Pathian limsak tuailai om ding dan tak ahi.
Bangteng hileh, khovel khan touhna kinoh lak ah tuailai tamtak ten hiai khantouh na te tih ahon pial mangsan lai un nang leh ken Pathian limska tuailai hihziak a chituam ngam leh zum na te Toupa Jesu in Khros ah ana zoh sa ahih dan thei kawm in tuni in ka tuailai pih iit huai tak tak ten Pathian limsak hinkhua zangthak ding leh hiai bang hinkhua a zangsa ten leng chimtaak lou a sun zom zel ding in kahon chial hi. Toupa’n ka tuailai pih teng teng hon vualzawl ta hen!
