Thumapi: Tulai khovel ki lam dang mah mah ta a,nidang sang mah in ki khang tou zaw ta a,khosak na leh nekzonna lam a leng ki khang tou mah mah ta hi.Pathian om hia om lou chih phok non lou hial diing in Tuailai te i om ta uhi.A bik in tuailai tu khang thak te khovel a Pathian lou adang hon thu zoh zou zaw ding technology leh khovel siam na leh pil na leh thil dang dang tam law ta ahih man in, tuailai tampi tak Khristian hi napi Pathian lim sak kha lou in buai pih ding dang ki hau kha zaw ta hi.Nidang lai i pi-leh-pu te hun lai in tulai khovel dan a khovel vanzat mipil mi siam te bawl khiak te om louh ahih man in Pathian thu ana za kha leh gingta ten gingta taktak in leh zui tak tak ua, khalam a ana hat mahmah zaw sop uh hi.Tulai khovel et in Tuailai te Setan thang ah awk in hon khem puk ding tam law mah mah hi.
Tuailaite a dia Pathian limsakna bang a hia? Khristian tuailai te a diing a Pathian limsak na ichih sahkhua a dan zuih di kia a bawl ahi kei a, I hinna leh kha mahmah hon su hat tu leh Pathian toh ki nai zawk sem na dia kalpi poimoh tak ahi hi.Pathian limsak na i chih gingtu te a ding a khuam poi moh tak ahi a,Pathian limsak ichih chiang in gen khak tam pi nei hi.Mihing i chih lungsim/lungtang leh kha nei a bawl ihi a ngaih tuah na tel lou a na sep khiak chih thil om thei lou ahi. Abiktak in, Khristian tuailai Pathian limsakna I chih chiang in Pathian deihdan a hinna ahi, Amah thuman a adeihdan zui a hing na ahi.
Pathian Limsak Tuailai: Pathian Thuzaak Masak Poimawh hi: Pathian limsak na din tuh a thuzaak masak a poi moh hi.I limsakding pen bang hihiam, amah kua hi a leh bang a deih chih pen I theih maksa poimawh mahmah hi, huai ding in a thuzaak masak leh theihchian pen poimawh mahmah suak hi. Tuchiang bel in I za ta ua, Imuh banah ua theihna chiang I neih vek uhi. Himahleh, Pathian thuza napi,sim na pi in zui lou tuailai ki tam mahmah a,sahkhua mi mai mai ki tam in, tua pen Pathian limsak na ki chi ngei lou a, Pathian zong na lungkim tuan lou hi.Pathian limsak na I chih chiang in sappau ah Godliness ki chi a, Bible a Timothy bang in thil teng teng a ding a pha tuam (I Tim 4:8) ana chi hi.Pathian limsak na i chih nekzonna ale a phatuam dia,na lomte toh na pawt na, office ah na om chiang,Gaal mun ah na om chiang leh thil dang tampi a diing in a phatuam hon tun tu ahi.Tulai tak i gam buai lai tak ahi a,tuailai ten leng I gam leh nam a diin ihih theih na lam chiat ah pan I la chiat ua,i pan lak na ah Pathian tel sak in amah limsak leng i hih khem peuh a ki lam zang ding a,tua Pathian i limsak na in phattuam na hon pe ding hi.
Pathian Limsak Tuailai: Lungkimna Poimawh hi: Pathian limsakna diing in lungkim na poi moh masa hi.Bible a Timothy in hi chi in ana gen hi,”Lungkimna toh ki thuah Pathian limsakna punna thupi tak ahi” (I Tim 6:6). Lungkim na i chih miteng zong ahi a,mihing in lungkim na i delh a i delh leh zong ahi.Pathian in zong lungkim leh ki paak ding in hon deih a,Pathian in tuailai te lungkim ding in hon deih sak gige hi. Himahleh, tulai khovel et in tuailai lam ten lungkim na tak tak ki nei thei lou a,mi hehpih huai mahmah bel ihi.Lungkim na i chih ei leh ei ki piak theih ahi a,ki sin leng a poi moh bok hi.Lungkim na i chih bang hiam khat nei beh a piang ding ahi tuan kei a,Pathian in hamphat na leh vualzawl na hon piak te en kik thak le hang lungkim na ding ki gen seng lou ding hi.Tua lungkim na ichih toupa ah a om a tua toupa pen limsak in nei le hang lungkim na ichih ki nei thei ding hi. Bible in leng Toupa lau leh zui ten nuam sa leh lungkim na nei uh (Sam 112:1) ana chi hi, tua ahih ziak in lungkim na hon pe thei Toupa limsak leng tuailai tampi tak ki ngaisia leh lungkim na ding taktak khovel a mu lou ki sa a sih mai ut phial ten i kipahna ding in Toupa pen limsak a nei leng lungkim na toh ki ton gige ahih man in i hinkhua hon khel tu khat hi ding hi.
Pathian Limsak Tuailai: Taisan ding leh Delh ding om hi: Tuailai ten Pathian i Limsak theih na ding in taisan ding leh delh ding tampi a om a,khovel thil leh sum leh pai deih taak na te taisan a ngai a,delh ding Laisiangthou in Timothy ah agen Ginna, diktatna, itna, thuaktheihna na, ki niamkhiatna chih te delh a delh ding tuailai ten ki sam hi. Bible toh ki tuak in tuailai ten pathian Limsak theih na din i sual leh dou ding zong tampi om ahi. Pathian mi taktak suah theih na dia tuh sual di om mah ahi.Laisiangthou in a gen bel ginna a ki dou na hoih sual in (I Tim 6:12) chi in hon ngen hi.Ginna pen len kip tin ten ding in toupan Tuailai te hon deih leh lam et te ihi uh hi.Mikhial khat a piang thak chiang in galphual a lut I hi a, himahleh ei sung lak a adiak in tuailai te bang in Delhi a, Hindu sahkhua zui te lak a khosa hinapi in ginna ziak in dounna I tuak het kei a,khen khat nam dang ginna ziak a noh khiak tuak a om lai in hampha ihi lam zong phok kul a, tuazong phok na zong Pathian I limsak na ki lat na khat ahi hi.Tuailai te mimal chih in i khristian hinkhua zat na a gal dou chiat om aki hi hi.Gal dou dan tuam tuam a om a tua te i zoh na ding in tuailai ten pathian i naih a poi moh mah mah hi.
Tuailai lak a khen khat i piang thak chiang in bukim bang ki sa in sep ding leh zuih ding tampi om te ki manghilh kha sek /zui zou lou kha sek hi.I piang thak chiang in sep ding leh hih ding tampi om a tua te lak a khat a poi moh mah mah pathian limsak na ahi.Bible a en le hang Daniel tanchin a apat Pathian a limsak dan muh theih a,pathian dan zui in zu leh sa kham theih ah ki bual mai lou hi,banah milim pathian mai a leng kun lou in toupa limsak zou gige hi. Sual gal dou zou Pathian limsak mah mah mi ahi hi.Tua ziak in pathian in a pai na peuh ah veng in thupha pia hi. Daniel bang a tuailai ten leng i dou ding tampi om a,Pathian limsak na ipi bawl lehang toupa mai pha zong ki mu kha ding hi. Delh ding a poimawh khenkhat I gensuk zek lai ding.
Pathian limsak na ki lattheih na din Ginna a poimoh mahmah khat ahi a, Noah bang a ginna hang san nei in len kip in Pathian thuchiam te muang le hang tuailai ten mite kouna, gensiatna, simmohnate ki dou zou ding a vualzohna thupi tak ki mu ding hi.Khovel a buai pih ding tampi om mah leh tangtawn hinna mah len tin ten poi moh mah mah a,tua in sih nung chiang tang tawn in diing hon pe ding hi. Ginna tungtawng a ginom ding kisam non hi, Pathian limsak taktak ihih theih na ding in tuh ginom tak a kep ding om ahi.I Ginom na leh na lou tung tawn a pan pathian limsak leh sak louh chiang mai ahi hi. Bible ah Toupa Jesu hon ki lat non masiah huai thupiak siangthou leh gensiatbei a kem ding in tuailai ten moh puak na lianpi nei ihi.Ginom tak a Pathian thukep na I chih khah i ginom na leh muanhuaina et khiak na leng ahi a,Pathian limsakna leng hiai a ki nga ahi hi.Na Pathian dembei leh siangthou ahih man in a thu hon piak te siangthou ahih man in a thu kep a,hin pih Pathian limsak na ahi a,tuailai ten I mohphuak ahi. Pathian chilgil mahmah nei te ihi a tuaziak in tuailai ten ut teng hih kom a Pathian thu kep ki chi ihih leh bel pathian thangpaih na thuak khak theih ahi hi. Nasepte bung 10 sung a sahkhomitna toh ki sai ki gen a,tuailai khen khat sahkhomi mai mai tampi ki om a,zingkaal teng a thum zou,kikhom gige,saptuam vai a ki hel zou gige hinapi in a tak a pathian limsak lou ki om hi.Pathian limsak na kichi pen Pathian miitna, Pathian a hih na genna ahi a huaiziak in haksatna tawp khawk,gilkial dang taak na tawp khawk, I zil na leh sep na a buai na tuamtuam leh lohsapna tawp khawk hun ah leng Pathian a hih tei tei na pen Pathian limsak na genna hi zaw ahi hi. Job mah bang a thil hoih himhim zaak ding nei louh hun a leng Pathian limsak a taisan louh ding ahi hi.
Pathian i limsakna ichih haksatna i tuah hun khawng a ki lat sak ding hi a,Setan in Job mei ma tum natna chi zau huai tak in khem mah leh pukse mai lou hi.Job in Pathian apat a hoih le I mu dia a hoih lou leng I mu ke chih toh pathian ana limsak mah mah hi.Tua bang in tualai te leng nop leh dah hun i tuak tham dia ahih zong in toupa mah bel in limsak a nei leng Job bang a gal dou mi hang san setan khem zoh louh in ki om ding hi.Pathian limsak ten bel toupa ah ki pah na ding mu gige uh hi.Khristian hinkhua a zet et na i tuah hun om dia,hunhaksa i tuah hun om dia,setan khem na haksa pipi i tuah hun om dia himah leh Sawltak Paul gen mah bang in Jesu khrist a ginna khah suah lou tei tei in delh in delh le hang ,tua pen Pathian limsak na ahi hi.I ginna a del den hun om thei a himahleh Toupa ginna hat hon pia in aw, khovel mi te hih dan a hih lou teitei din,nang ka hon ging taak haksa lele khah suah lou tei tei din hon pan pih in tuailai ten chi thei le hang ginna let kip na hi pathian limsak genna zong ahi hi.Bible a Timothy mah bang in ginna len kip pai suak ta,lamkal ah bah mai lou a ka ginna ziak in ki pah man di in hon ngak ta chi theih di khop in tuailai ten pathian limsak leng ei a ding in punna thupi tak hi ding hi.
Pathian limsak na din itna delh in bible in ana chi nawn a,I gam a itna tak tak om leh lawm leh vual ki kal,I lomnu i lompa toh ki kal lem lou om te leng ki ngai dam zou ding hi zaw hi.Itna i chih in haza kei a,a migi a,huham kei a,heh baih kei a,dik aki pah pih lai hi.Mi ngaih dam zoh louh na ichih te itna tak tak om zou lou ahih ziak ana hi lel hi.Huai itna na neih a na Jesu khrist delh tei tei le chin amah toh na ton dia mi dang it theih na leng toupan a hon pe ding hi.Mi na it zoh kei a,nang chouh ki khual leh ki it na hih a bel na pathian na limsak louh dan a chiang mah mah a na Pathian toh na ki gam la law mah mah chih na ahi hi.Tua itna tung tawn a pathian limsak na chih ana poi moh mah mah hi.Tua kia bek lou in imi isa te itna i chih a poi moh mah mah a,I buai leh haksat hun a hon kal suan masa ahi ua i it ding mah ahi.Imi i sa te it masa a poi moh a tua zoh chiang kek lian tou zel in bible in zong ana chi hi.Tuailai te moh puak na lianpi ki nei hi.
Thuaktheihna tung tawn a pathian limsak na poi moh mah mah khat ahi nawn hi.Tuailai ten I taksap mah mah thuaktheih na ahi a,ban ah nun nem na i chih delh a delh ding ahi.En tua te neih I sawm kei a leh van a hon kia a thuakthheih na leh nunemna hon om mawk ding hi lou a,tua ding Jesu khrist delh in pha leng aman tua te khempeuh nei ahih man in hon chiam sa leng hi bok ahih man in hon pia thei hi.Philippite 2:5 na tung tawn in Pathian limsak a ki ngaihniam na Jesu a delh a delh ding a poi moh dan ki mu thei hi.Tuailai khen khat hih na lam ah mi dang sa ah ana siam zaw,I nu leh pa hauh na khong muang hiam ahih kei leh mahni sepna leh din mun khawng ziak a ki muang mah mah in kisakthei khak baih lam mah mah hi.Tua ziak in toupan ki ngainiam a amah limsak diing in hon deih hi.Pathian in mi ki sa thei te dou ahi chih phawk ding ahi hi.
Bible a David khang en le hang ki ngai niam mah mah ahih man in amah khang pan in mi ki ngai niam pen pen tang tawn hondam pa Jesu, Toupa’n David suan a piang sak hi.Tui leng suk luang a,tou luang chih om ngei lou hi,tua ziak in mi ki ngainiam te suan chi dam in gah pha ua, vualzawlna dong se se uh hi.Tuailai ten leng tua mah bang in Ki ngainiam a Pathian limsak hi leng Pa din mun,Nu din mun i luah chiang in i suan leh pak ten Pathian vualzawlna tang ding a, mi loh ching leh lamzang zong hi ding uh hi.I theih ding bel tapa tai mang ki ngaih niam na in bawng sa nek loh ahi.Tuailai ten ki ngaih niam na delh ni! ,itna delh ni!,ginna delh tei tei ni phak zoh vek ahi! Tua tengteng tuh Pathian Limsak na diktak ahi hi.
Thukhitna: Tuailai te i gam a ding a maban ihi a, Pathian mah limsak in nei leng inkuan sung leh i gamsung uh nidang sang in chi dam zaw ding a, ni dang hun dang sang in Pathian deih sak na ki tang zaw ding a, I ma vang zawng ding a, I kim leh pam a te a ding in zong vualzawl na ki hi theih ta ding hi. Toupa tellou Pathian limsak na lauhuai a, tua Toupa mah mitsuan a nei in amah mah limsak ding in hanchiam thak in aw, nang tuailai thahat!
Eklijiasti:11:9 “Aw tangval, na tuailai in kipak in: na tuailai nite ah na lungtang in hon kipak sak hen, na lungtang lampite ah leh, na mitte muh in om in: himahleh hiai thilte tengteng ziak in Pathian in nang vaihawmnaa hon pi ding ahi chih thei in.”
