Pathian lim sak tuailai kua te ahi dia? Nang leh ken I teh dan chiat I nei mai thei ding; himahleh; Toupa’n kuate a limsak dia chihpen poimoh pen ahi. Haksatna leh gentheihna tellou himhim a Pathian in a mite pi ngei lou chih thukhunlui apat et theih in aom; aziak bel haksatna tawpkhok apat Pathian limsakna hinkhua zatdan theih khiak in om pahpah ahi.
Jona 2:2 ka haksatna ziak in Toupa kasam a, ama’n hon dawng a; Sheol gilsung a kipan in ka kikou a, nang ka aw na za a. Hinkhua ah i belh masakpen in kua a limsak zaw a chih theih khiak ahong poimawh zota hi. Tu chiang a Pathian in hon iitna i thei a hilele, en Pathian i iit kha hia chih, i nisim hinkhua zat dan ah akilang zel hi . Toupa’n Kanaan bawngnoi leh khuaizu luangna gam na tungchiang un le non manghilh kei ding israelte kiah acih bang in, tulai inle eikiang ah agen ahi. Huaiziak in, Tuailai Pathian limsak hinkhua ana zang tatak te Bible apat mah e en di uh. Iitna nei - Joseph hinkhua ah a sanggam te’n hazatna ziakin dangka sawmnih man a azuak nung inle bangziak ah aman phuba laak di lungsim ah neilou ahidi? Hiaidan lungsim nei mi’n Pathian a limsak keidia hia? 1 Peter - 4:8 Bangkim teng sa’ng in phatuamngai in ki-it tuah chiat unla; iitna in gilou tampi a khuhzel ngal a chihbang in thangpaihna a gamtat sangin iitna a tel zawnak hi. Kial a hongtun in a sanggam te leh a mite a ding in Pathian in a zangzaw nak thei hi.
Ngaidam thei mi - iitna toh ngaihdamna ahonkizui a, aman a sanggamte ngaidam thei hi, tuchiang in ngaihdamna neilou mi’n Pathian a limsak icitheikei ding uh, a tungah khial mahmah a sanggamte ngaihdamna kampau a muh louh lai inle ana ngaidam khin hi. Thuakzohna nei - a khelhna lou a ngoh in aomlai inle kamsia a zangkei hi, aman a khial louhdan thudik agen a huaibaan kiphasak tak ah le a gamtaang kei hi. Kingaihniamna nei - gam dang ah saltaang, mi simmoh na leh nuaisiahna tuahlai in akingainiam veve hi, kingaihniamna ziak in zahngaihna le a mu hi. Khelhna taisan thei - Potifer zi in nihvei khelhna hihdin khemna a tuahlai in aman khelhna nihvei a taisan zaw hi.
Huailai in, Israelte’n Israel gam lou a Pathian omlou chih lai unle Toupa deihdan manghilh leh zuihlouh theih dinmun in aomlai inle aman bel a Pathian munteng ah aom a chithei a, Toupa a lau a, adeihdan a hih zel hi. Pathian deihdan theihna chuh hun tengin Toupa toh kizopna tatak neih kichian chiang in I theipen ding hi. Joseph hinkhua ah hiaidan in Toupa deihdan a pomkip ki mu chiang mahmah hi. Gingtuloute lak ah Pathian hing om tatak chih theihchet sakna – Nebuchadnezzar in dangka-eng milim Babulon bial dura phaizang ah adingsak kuapeuh in adingkhiak milim mai a puk leh bia di’n thu a pia hi, abeloute meipi kuang zuazua sung ah paihlut di thu omlai in Juda tuailaite Shadrak, Meshak leh Abednego in lauhna kha neilou a, milim Pathian limsak sangin a Pathian hing a limsak zaw uhi. Pathian in lauhna kha ahon pe kei a; amah muang peuhmah a ompih hi.
Isai 41:10 ah chihbangin lau kei un, keilah na kiang uah ka om ngal a, mangbang kei un, kei lah na Pathian uh ka hi ngal a, ko’n hatsak ding a, ahi ko’n panpih ding ahi, kadiktakna khut taklam in ko’n len gige ding. Hiaidan in amau Pathian hing a limsak zaw nak ua meipi a pat in a hunkhia hi. A Sam leh a puanak mongte nengchik le a kaang kei hi. Thumna toh pang gige Pathian limsakna hinkhua - Daniel mi thuum mi ahi. Pathian toh kizopna diktak lampi chuh THUMNA ahi. Kumpi Darias hunlai in Daniel dem ud na ziakin heutu liante leh bial heutute’n khamna khauhtak a bawl ua; ni sawmthum sung kuapeuh in Pathian hiam, mihing hiam lak a ngetna a bawlleh, humpinelkai huangsung ah paihlut in aom ding achihlai unle Daniel in ni khat in thumvei thuumna a nei hi.
Dan thu ziak in humpinelkai huangsung a paihlut in om inle, humpinelkai kam chihsak in aomzaw hi. Nungzuihna hinkhua - Sawltak Paul ahong pianthak tatak nungin Pathian theihchetna ahon nei a, a khelna teng kiphawk in, nisim in Pathian ziak ah thuakna le poi asa kei hi. Khovel thilte en nonlou in muhtheihloute delhin a pang hi. Galatia 5:24 huan, Kris Jesu a hi tate’n tuh sa, a lunggulhna leh a duhgawlna toh a kilhdenta uhi. I sa deihdan i kilhlup louh in Pathian deihdan hihbuching theikei hi. Mihing lungtang deihdan chuh khovel lam ahihziak in, khovel lam thil om chuh Pathian deihdan toh hon kituak lou zel hi. Tu lai i hinkhua – I tuailai hinkhua tuamchiat i nei ding ua, haksatna, buaina, kipahna leh puakgikna, ngaihdan le tuamtuam i nei uh hi. Huchibang in, Joseph, Daniel leh a lawmte leh Paul hinkhua ah a tuah uh tuamchiat hinapi in, akikhek ngeilou kibang khat aneih uh Pathian thupiakte zuihna ahi. En tulai a ei hinkhua omdan amau hinkhua dan ahikei icimaimah thei. Gam khang toutou chi mahle hang Eklisiasti ah akigelh bangin bangteng bangmah lou ahi, huihnungdelh ngen ahi, thilthak himhim a om kei ahon chi zaw hi. Amau hunlai Pathian nungzuih theih tatak ahihleh tu hun chiang inle Zuih theih tatak ahi chih hon langsak zaw uh hi. Thuakgimna te thuakmualsuah zoh theih ahi chih ahon langsak hi.
Khemnate taisan theih ahi chih ahon zir sak hi. Eile tulai in gingloumite gam ah e om uhi, i kai na mun khong a mi simmohna le i tuak ding uh, mi nuaisiah a om bangle, nam tawmchik ihihkawm ah le mi muh theihdi’n Pathian limsak hinkhua zat theih ding ahi chileng kagen sual kholkei ding hi. I lungtang ah i pi bawl i Pathian ah i neihpen ahizaw a, sum bang hithei,
khovel nopsakna te bang, zu le sa bang, thaanghuai tak ah om bang, thupi na te teng deih bang leh a dangdang, himahleh, Hiaite teng teng sang in i neihdi pen neizaw le van a om i toupa i limsak theipan ding uh hi. Timothy 1-6:6 lungkimna toh kithuah Pathian limsakna tuh punna thupi tak ahi. Amau bel gimthuakna in a Pathian tung ah a lungkim veve ua, punna thupitak a nei zaw nak uhi. Khovel a lungkim theilou mi tuh sum le pai simseng louh nei le uh le a lungkim kei ding uhi chih a chiang hi.
Pathian tung ah kipak ah lungkim phot mah le aman ahihding a thei na. Achihle, Pathian limsak tuailai tuh ei haatna, felna leh pilna ah akinga kei a, I deihdan leh ei thu inle akingakei hi. Joseph, Paul, Daniel leh a lawmte’n hiai a thei uhi. Tuailai thahaat hinapi in Pathian a muang ua, amau haatna in khemna leh haksatna te zoh sawm ahikei uh chih hon musak hi. Ei haatna in Pathian limsak theihna leng a omkei hi. Nopsak na leh lampi nuam delhzui sangin Toupa sikha a pangzaw uhi. Thumna pan san in Pathian a bel gige ua, huaidan in Toupa’n a ma uh a pi zel hi.
A tawpna in, Khelhna thupa tawi hinkhua -1 Johan-1:9, kigelh bang in, I khelhnate thupa I tawi leh, I khelhnate ngaidam ding leh, I diktatlouhnate tengteng silsiang ding in amah tuh a muanhuai in a diktat ahi ziak in. Khelhna kisiikna tatak nei tuailai tuh Toupa’n a limsak hi,huaiciang in Toupa deihdan a zongzaw nak ua. Khelh kisiikna neilou tuailai in Toupa a limsak theikei ding hi. Juda iscariot leh Peter kaal akibatlouhna uh khat hiai ahipen hi. Peter in Toupa a naih tuntun hi himahleh Juda iscariot in a taisan hi. Paul in a suang peuhma in Toupa suang hen achi a, amah sung a suangding ahihleh a hatlouhna lam thilte a suan zaw nak hi. Huaiziak in, Toupa’n a zattheih leh limsak tuailai chuh a tuailai nite in amah siampa a thei gige ding hi.
