“Pathian Limsak Tuailai” ichih tuailai’ Pathian naih a, amah deihdan na sem a, amah deihdan bang a hinkhua zat ahi. Pathian adinga a hinna, a sapum leh a hinkhua lankhia a kipumpiak mi ahi.
Pathian limsak tuailaite’n khovel siatna a kibual lou in Pa deihdan bang a hinkhua zang ding in tup kichian nei uhi. Pa ading a koih tuam ahihna uh ki theichian in, khemna douna galvan muhtheihlouh Pa thil thawnpiak khovel theihpih louh thupi tak amah ah muan-ngamna nei uhi.
Pak banga ilutlai, ithahaat hun lai tak in Pa a dinga tamsem septheih laitak mah in tuailai Pathian ana limsaka, atuailai lai hun amah ading a semkhate kaan a hampha omlou ding hi. Hiai hun mah in Setan in leng hon deih mahmah hi. Khovel khelhna in hon sam a, lam chiteng ah hon khem hi. Sepna neite ading in sepna mun ah sum-leh-pai nekguukna lungsim piangthei, sepna zonglelte adingin diktatlou taka sepna leikhiak mai ding utna bang, innsung a ta hihna ah unau te tung ah leh nu-leh-pate a ding a maizumna tuntu leh innkuan sunga lungkhamna tuntu a pang theih ahi. Ituailai hun in khovel nopsakna a kibual ut na haat mahmah hi. Mi silh-leh-ten, mi neih-leh-lam engna uang mahmah hi, minthan utna leh sum deihtakna ziak a dikloutak a khelhna maingal mahmah theih hi. Pathian limsakna hinkhua zat a hiaite tengteng nutsiat ding haksasa tuailai tampi om hi. Tuailai’ khanvualte phak zoh louh ziak leh innsung kituahlouhna ziak in leng lungsim kingaisia leh kingaihtuah sual tampi om a. Hiaite ziak a Pathian lam nga zo lou a, mahni hinna tung a thunei bang in a leitung hinkhua ana beisak tampi om uhi.
Himahleh tuailai hiaite nung ngatsan ding tum a Pathian ta hihna ut a amah pom a sangte ading in suahtakna thupitak Pathian in kong hon hong sak hi. Pathian limsaka hinkhua zang utte ading in hiaite a puuklou a, hiaite tung a vualzoh theihna ding in Pa’n galvan thupitak hon pia hi. Huaite thutak kawng-gak a nei a, diktatna awmphaw a zang a, lemna tanchinhoih vanzat khe a bun a, ginna lum a zang a, hotdamna lukhu leh kha namsau, Pathian thu la a thumna leh ngetna a chiklaipeuh a thum ding ahi. Pathian mitel, misiangthou leh deihtakte bangin lainatna lungtang, nunnemna, migitna, kingaihniamna, thunuailutna, thuakzohna a kivan ding ahi.
Pathian limsak tuailai hihtheihna dingin laisiangthou apan a imuh theih thupiak tengteng laka thupipen “Toupa na Pathian na lungtang tengteng in, na kha tengteng in, na lungsim tengteng in leh na hatna tengteng in na it ding ahi,” leh “nangmah naki-it bang in na vengte na it ding,” chih ahi. Itna zaw dan zuihkimna leng ahi chi hi. Paul in leng itna neilou a thugen dak ginglel hiam, dak khutbet ginglel hiam toh kibang ahi chi hi. Samari mihoih bang in hehpihna leh itna neih kiphamoh hi.
Pathian limsak tuailai hinkhua zangdia kisakna ah leitung thil ah leh ei mahni leh mahni ki etna ah, Pathian mai ah chinglou kisakna tampi om ding hi. Piangthak ma a ihinkhua lui zatsa te ziak bangin Pa ading a sam kisakna om ding hi. Himahleh, laisiangthou ah a kimu Pa’n a na semding a asapte ahoih pen, asiam pen, apil pen teellou hi. Paul leng gingtute sawi zelpa himahleh Pathian in Damaska khua paina lampi ah a na sem dingin sam hi. Abraham leng a khua, a tanaute, leh apa inn taisan in Pathian sapna zui hi. Mosi mi dangawk leh pau zekai akisak in leng Pathian in asam thouthou hi. Tuailai tampi khamtheih sal a taang a hinkhua ana zangte leng Pa’n a tate ding in hon sam gige hi. I Pastor-te leh missionary nasem tampi khamtheih sal atang a himahleh Pa sapna ana sang a amah ding a ana kipekhia leng tampi om uhi. Hiaite apat in Pathian in chitna leh hihna poimohpen salou in asapna zui ding in hon deih zaw hi. Pa’n neih-leh-lam leng poimoh ana salou hi. Matthai laibu ah tangthupha gendia ikalsuan khiak chiang un kawljal hiam, puanak nih hiam, khedap hiam, chiangkhun hiamleng tawilou ding in gen hi. Pa’n ngen un piak in na omding uh achih bang in ana septheih na ding a tasam nakisak peuh ngen in, itlou leh tailou in hon pe ding hi. Peter leh Johan in tanchinhoih genna dingin hangsanna a ngen ua Pa’n apia hi. Solomon inleng pilna angen a piak in a om hi. Amah muanga ikalsuan khiak nakleh amah hon panpih dia mansa hi gige hi. Pathian in David vaisuanglot leh suang zang in vualzohna a pia hi. Mipi sangnga vakna ding in Jesu’n naupang’ tanghou nga leh ngasa nih a zatsak hi. Hiaite banah leng Pa’n khenkhatte kiang ah Kha in pilna thu apia hi, midang kiang ah huai Kha mahin theihna thu apia a, huai Kha mah in ginna apia hi. Khenkhat saptuam lak ah ahon koih a, khenkhat kiang ah thilpiak tuamtuam, hihdam theihna, thillamdang hihtheihna, thugen theihna, khate theihkak theihna, pau chi tuamtuamte theihna leh hiai paute hilhchet theihna leng a pia hi. Pa’n a deih pen ahihleh amah min a kalsuan khia a thuak ding omte amah min a thuak zou a, a tawp tan a ginna kepbit ding ahi.
Tuailai lai in Saptuam a kizatna ah, sepna ah, siamsinna ah, innkuan sung ah, I mohpuaknate Pathian limsak dingin kisinsiam zaw ni. A laisiangthou 1 Timothi 4:8 na ah ki mu bangin Salam kisinsiamna in phattuamna anei zek a, himahleh Pathian limsakna lam a kisinsiamna in bel, tua omlel leh tunung chia hong om ding, hinna piak chiamna aneih jiak in thil bangkim adi’n aphatuam hi chih kimu hi. Salam thilthupite delh sang in kha lam thil delh ding in leng ikihasuan zaw hi. Thugen lam ah, omdan lam ah, utna lam ah, ginna lam ah leh siangthouna lam khawng ah gingtute’ etton hizaw in. Eimah leh ithilhihte ah thanuam tak leh kipumpiak tak a hih in hileh I omdan leh ithuzate tungtawn in Pathianin midangte hondam thei ding hi.
Pathian limsak tuailai hinkhua zang a kalsuante leh kalsuan utte adingin khovel khemna haksapi tuah touh ding om mahleh Pa min ziak a thuak teitei a atawp tan thuakzoute a dingin Pa’n kipahman leng hon chiam hi. Paul in tulai a thuaknate denchiang a itung ua thupina hihlat a om ding toh tehpih tham a aseplouh dan gen hi. Pathian min ziak leh tanchinhoih ziak a thuak a hihgentheih a omte leh ze-etna thuak teitei mite Pa’n kipahman thupitak chiam hi. Hiai mah ahi Paul inleng
thupina a lamet pen, a vangam khua-leh-tui luahpih ding in. Mihing tapa ziak a mite’n a honhuat ua, a hon pampaih ua, a hontai chiang un Pa’n hampha in honseh a kipak a nuam ding in honhilh hi aziakbel van ah kipahman isang ding om kihkeih ahihziakin. Huai kipahmante, Lallukhu setheilou, khemna thuak teitei a ze-etna thuakzou te a ding hinna lallukhu leh thupina lallukhu tultheilou ahi uh hi. Hiaite banah muhtheih hilou lungnawpna leh tawldamna, khovel in hon theihpih louh kipahna thuguuk leng hon pia hi. 2 Korinthte 4 : 8-9 ah Khrist nasemte nehden a om mahleh ningkitel lou a om a, mangbang a' a om unleng a lungkiak louh dan uh leh sawi ahih unleng taihsat leh hihmang ahihlouh dan uh gen hi. Pathian ah zawn dan, hauhdan, thilchih leh thil tengteng ah gilvah leh gilkial a om theihna thuguuk Paul in amuh bang in Pathian nasemte hamphatna tan zaw bangkim ah lungkim theihna leng ahi.
Laisiangthou Eklijiasti 11:9 apan in tuailai lai hun tom mahmah hi. Tuailai lai hun zangnuam ding, kipaak ding, hih utte hih ding leh lungtang deihlamte jui dingin hon hasuan hi. Sawtpi tuailai diing hilou ihih ziakun. Himahleh, aban ah Pathian in ihih tengteng uah thukhenna bawl ding ahi chi theihgige ding hon behlap hi. Bung 12 ah Lungkham hun hong tun ma in, hin leng nuam kasa kei ichih hun hong tung ma in hon Siampa theigige ding in gen hi. Pathian limsak hinkhua zat, amah zahtak leh a thupiakte juih ding mihing tengteng siam a omna san lah ahi ngal a.(Ekj 12:13) Buhlakding atam mahmah a himahleh a semding atawm mah mah hi. Hiai buhlakna a pang ding in Pa’n nang leh kei hon deih hi. Tuailai thahatlai mah in sem mengmeng ve ni denchiang in an sute hong khawl ding ua, tawlet a dak khia mitte hong mial ding ua, su’n hong bei a khua hong mial pah ding ahih ziakin. Pathian deihdan a hinkhua zang ding leh amah min a taan ngaite taan a amah limsak hinkhua zang ding leh zang ngam dingin hiai essay ka hon gelh tungtawn in Pathian in tuailai muanhuai tampi hon pia hen.
