Tuailai hun ,michih mimal hinkhua ah, i hihna, i ginna leh i mizia bawl hoih na hun poimoh mah mah khat ahi. Tu khangthak hun ahi a, khovel changkan touh toh kiton in, hinkhua ah i pansan theih di, I sahkhua baan ah, lungsim on lamang thei i niteng hinkhua ah tam mah mah hi. Huaiziak a ,tu i dinmun khovel adia, Pathian limsak tuailai vang mah mah a, panlak thak poimoh mah mah hi. Pathian limsak Tuailai ,ichih bel, khangthak tuailai ten ahinkhua uah a poimoh, leh a laita a Jesu a hon koih masak ua, a hon sinsakna thu te’n ahinkhua uh,a ngaihdan, omdan, mimal leh kamal tanpha a Jesu nung a hon zuih chiang un, Khrist adia Tuailai te on hi thei pan uhi.
Pathian limsak tuailai hih theih na dia haksatna pal tuh, a omlou theilou khat ahih baan ah. Hiai haksat na te pal suah in, midang te a dia vualzawlna hih theih dan leng on sinsak hi. Pathian limsak Tuailai ichih bel, ginna kia a thil omthei ahi kei a, Pathian toh hinkhua ki zop na khat leng ahi. Hiai chu , gingtu khangnou Tuailai te a dia, a pansan leh a dinkip pih ngam suangpi uh ahih ding ahi. Khangnou Pathian toh a niteng hinkhua a masuan khom te bel , thil gilou him him; lawm hoihlou, khamtheih guihtheih ahihkeileh a ginalou mizia te’n zol theithei ngeilou a. Khrist toh aki zopna uleh a din pih ngam ginna in amau te thathak, khasiangthou tungtawn in guan zel hi.
Khovel pilna ki behlap touh dungzui in, siamsinna lam ah, theihdan,gindan chi tuam mah mah, mimal pimang thei ding atam a, himahleh huai te lak ah Pathian limsak Tuailai te a bit thei uhi. Thu hoih leh a hoihlou, zuih ding leh zuihlouh ding tan pha theikhen thei khen thei uh a, hiai in a khalam pilna uah, amau te’n deihteltheih na hun a neihchiang un, a hinkhua uah thilbangkim a hih na peuh uah, tehkhinna in- siamsinna hiam, a sepna uh hi’n, mi tuam tuam a kipolhpih na uh hitaleh. Hiai leitung ah thutak gum a dinpih ngam te suak sak uhi. Pathian limsak tuailai te,n Jesu kekhap a zuihna uah, midang te panpihna leh iitna tungtawn in, deihsakna lungtang tak tak toh hiai panpihna na te sep suah poimoh ngaih mah mah uhi. Amau te’n Pathian sapna- Levitikas 19:18 ah- “…Nang na ki-it bang in na innvengte na itding ahi” achih pen semsuah uh a, hiai in gingtu tuailaite , midangte a dia Pathian melmuhna leh midang te a dia vualzawlna suak sakzel uhi.
Hichi bang in a hinkhua uh omtouzel mahleh, a langlam ah haksatna tampi leng ana pal tou uhi. Setan in khangthak tuailaite enlah mah mah a, Pathian limsak hi ding a a hon kipiak khiat chiang un, khemna a delh zui sawm gige hi. Hiai hun ah Pathian limsak tuailai te a galvan hoihpen un kivan a, thumna, bible sim , Pathian gingtu mi te toh pangkhom in a hinkhua, salam leh khalam ah gal ana dou zel uhi. A Tuailai hun a, a pansan leh galvan teng toh hon kivat chiang un, a Tuailai hun baan ah a a tek nung tan un, khalam ah hat sem sem uhi. A mailam hinkhua uah, lawm ngaih ahih keileh koppih a zonna lam uale, Khrist a lai ta a koih mah pansan pen uh a, gingtu leh amau bang bang a Khrist toh hinkhua zangkhom te mah tel uhi. Hiai in amau kal a kizop na ding siangthou sak a, a ki kal uah, kizahtakna leh ki muan ngam na toh kipolh khopna neithei uhi.
Pathian limsak Tuailai ichih te,n, a tuhun di chouh uh a ngaihtuah kei ua, maban a ahinkhua ding uh a khual banah a tangtawn mun ding uh mitsuan gige uhi. Hiai te’n a hin khua uah a kizat na peuh uah tehkhinna in- saptuam BYF hi’n , college hi’n , a sepna mun office uh hitaleh, a tempai na te uh, Pathian min thupi na di’n ana zang khe zel ua, midang te panpihna di,n leng ana zang zel uhi.
Khangthak Tuailai hihna ah, mohpuak na lian mah mah tunung, gam leh nam vaihawm leh en kol ding te ahih na uah, Pathian limsak tuailai hih kul mah mah hi. Amau te’n mahni mimal, angma sial na mai mai di’n a hinkua te uh a zang kei ua. Sepsuah ding te, tupguh neitak, veitak leh Pathian dong kom a masuan zel uh ahihna ah, saptuam ,gam leh nam sung leng su chi dam mahmah uhi.
Pathian limsak Tuailai hih, a manpha mah mah a, a manphat toh kiton in, khovel miten tuam koih nuam mah mah uhi, hiai te’n Setan tungtawn in haksatna tuak sak zel uhi. Himahleh a ginna uh a din pih kip ngam a, tuailai te’n a hinkhua uh - “buhsi huih in a mutleng” mah bang mailou a ahon zat chiang un, Khovel miten bang mah loh theituanlou uhi. A ginna leh Pathian toh a kizopna uh kuaman hihtan theilou a, huai in amau te a su hangsan a, pil leh chiantak a' a dinmun uhle a pansan uh theichian sak mah mah hi. Huai in , amaute zaidam na a pia a ,mi dang te toh a kipolhna ah leng chidamtak in kizopna neisak thei hi. Tuailai te,n Pathian limsak a a khalamm uh ahon vak touh chiang un, Pathian mel mite mai ah tanvak thei uhi, huai ziak i tuailai hun mah , i thahat hun, pilna siamna , sin theih teng sinna hun ahih na ah , Pathian amasa pen a koih poimoh pen hi.
Khangthak tuailai te, Pathian limsak Tuailai hithei di’n Toupan, hon vualzawl chiat ta hen. Amen
