Eklijiasti-12:1 Na tuailai nite in nang hon siampa leng theigige in, ni hoihloute a hong tun ua kumte a hong nai ua, amaute ah kipahna ka nei kei, na chih hun a hong tun nailouh lai in.
Pathian limsak tuailai I chih bang chi bang tuailai hi hiam?
Tuailai khangdawng laite, saptuam vai ah hi in, kholai ah, laizil na ah hi in, a koikoi ah hita leh suan pen leh manphat hun lai pen dan a tuat ahi. Aleh lam tak ah, siatna, khelhna leh thaan na a kibual nop hun lai tak le ahi hi. Nidang lai a I pu leh pa te un paunak/pau upa a ana zat uh, “Sial leng a bil leh a kii kikim laitak om” a leh na: khangdawng laitak, ki phat sak hun lai tak, lauh neih louh hun lai; tuailai ana chih mah bang un, hinkhua a tuailai hunlai tak ki kheng theih na bulpi ahi a, aam huai in, mihing hinkhua a din a manpha pen hunlai hong suak thei hi. Huaiziakin, tuailai ihih lai a Pathian limsak lou a, amah a ding a ki pe lou a, hunte leh hinkhua thulimlou tak a zang kom a ina manthat khak ding uh thil lau huai pi ahi hi.
Tulai in, ei lak mahmah ah leng tuailaite hinkhua zatdan en ta le hang, I gamtat khohei dan ua pan in Pathian mel muh na di vaang mahmah lai hi. Eite pian ken a ki pan, Khristian innkuan a piang leh khangkhia ihi ua, neu aki pan a thu leh laa te zatou leh sinsak in I om uh a, huai pen a hi di sa mah a la ihi uh hia chih bang dotna liantak suak thei hial khop in gamtang I bang maimah uhi. I tenna kho sung kia en ta le hang, gingtute ngen toh ki khosa hi. Himahleh, ei te, a diak in I tuailai lai un, gamdang a nekzong/laizilna a maban sunzom di a kisa in kalsuan I tam mahmah mai ua, tenna khua pai san a, gam zaa zaw zuan a I vakvial leh ei bang a gingtu kichi muh di vaang mahmah in Hindu sahkhua zui mi a tamzo ta hi. Amaute toh nekzong leh laizil a khosa a I tenna te uah bang lampial na di kong a dim a haa in om tham ding hi. Huai hun a, ei hatna kia a pang zou di hilou ihih man in, Toupa toh ton a, laisiangthou mah chi ngitnget in ki bul phuh le hang, I Toupa’n a lampi hon sial in hon taisan lou hial ding hi. Huai nak sang a, “ahi hi hi ta ve, a hun leh amun in po khia hi ve’n ka ud dandan in ka om phot dia awl in nidang chiang in kaki khek di, hun a tam lo lai na” chi a, ina limsiit leh zo I tuailai hunte’n hon ngak lou hial ding hi. Hun in kuamah ngak neilou a, a paisa hunte sapkik theihlouh ahih bang in, I tuailai hunte leng sapkik theih louh in beini hon nei tei ding hi. I om nana ah, Toupa hi in mihing mitmuh ah hi ta leh, omdan hoih leh kilawm latsak a, mite et ton tak tuailai, ging lou mi ten Toupa a muh theih na ding uh tuailai, naupang te a dia et ton tak tuailai leh, nu leh pa te a dia suan huai tuailai ihih ding uh ahi. Etsakna ding in, ginglou mi khat in, dotna hon bawl henla, bang chi bang a Khristian hinkhua hon zang na hia, ahih kei leh na pianthakna, a hon theikhe sak tu pentak bang hi hiam chih dotna hon bawl ta le uh, bang chi bang in dawnna I pe ding a le? Hiai bang dotna muh hun a dawnna kichian tak I piak theih kei leh bel Pathian limsak tuailai ihi kichih theih ding in up huai lou hi. Hiai bang dotna te dawng dia mansa a om a, amau te kiang a I ginna te koppih thei tuailai hi ding a pan I lak ding uh ahi hi.
Pathian limsak tuailai leh a limsak lou tuailai tehkakna: Tuailai Pathian nei leh lau mi ngei zaw tawndan kia hilou in a ngaihtuahna tanpha leng ki danglam in zaa hi. Etsakna ding in, tuailai nih a om ua, a mai uah puanak sekkhum rong a mu uh a, Pathian ana thei himah leh ana limsak lou leh ana nei mi lou in soisel na di zong in “hiai puanak rong kha dedulh mai, a san lah hi khin lou, a eng lah hi sam tuan lou nak lakloh hina maizen e” a chi leh a kiang a Pathian thei mahmah leh ana limsak tuailai pen in hi chi in a dawng a, “Ehe lawm, ken lah hoih kasa lotel a. Hiai rong maw a ud aleh a san le hi thei, a eng le hi thei thou zel” chi hi. Hiai etsakna kipia thil hou chik leh neu chik hi mah leh gen nei mahmah hi. Hiai a a gen ud tak pen ahih leh a puanak rong kia sese ahi kei a, Pathian phok a itna mit toh thil himhim I hon et chiang in, a kilawm louhna sang in, a ki lawmna, a hoihna te muh baihlam zaw hi. Tua mah bang in, ngaihtuahna kia ale mi dang te’n I biak Pathian mel mu a, lunggulhna nei thei di tanpha a kamdam tak leh ngaihtuahna siangthou tak toh I tuailaipihte lungsim tanpha khek thei hial khop a om poimoh leh kul mahmah hi.
Thukhitna: Mihing hinkhua tomchik hun sung bangchik chiang a bei ding chih a thei Pa lou ngal kuamah ki omlou ahi a, pilna sang taktak neite’n leng a tuat thei sam kei uh hi. I hinkhua te uh a dandan in ki khen tou in, kuamah in sihna a pel thei kei ding uh hi. Tua bang ahih na ah, leitung tom chik I dam sung a Pathian a ding a ki zang lou ihih khak di lau huai petmah hi. A diak in, I khangdawng lai nite bang a ei hon siampa mel musak thei a, amah deih lam te hih leh a thu tangkou pih kan a manpha zaw leh ki pahtak huai zaw om ding in le up huai lou hi. Eite’n ina theih khelh mahmah uh khat ahih leh, Pathian nasep pen Pastor ahih kei leh Missionary te kia in hih theih sakna lungsim ki nei pian hi. Huaipen hi khinlou a, a kuakua, a neu a lian, khen tuam om hetlou a ei mah omna chiat apan a leng Pathian limsak a a naa sep theih luat ahi. A diak in tuailaite bang in a sepna mun ua ging lou mite lak a bang omdan hoih lak in, kuan na munte tun teng bang in ki lankhia in thumna te bang nei gige le hang, ging lou mite’n et mai ale I Pathian I limsak leh lauh dan hon thei ua, a lungtang ua Pathian thu deih theihna tan pha bang piang saktu ihih theih na ding ua pan I lak ding uh ahi. Ahi a, I na chih taak mah bang in tuailaite a kuakua in khotang a hon mai et leh hon et lah bang un, Toupa’n leng I tuailai hunlaitak hon enlah in hon zang nuam mahmah mai hi. Huaiziakin, amah limsak in, amah a ding in hun leh nite zang in, a thu tang kou pih in pang ni. Pathian limsak tuailaite lungsim na tawm zaa in a danglam mah bang in eite leng mi teng toh ki bang mai lou a chihtakna toh heina peuh ah tuam bilbel ni. Khrist a iki bul phuh chiang in zaw I thil et dan tele a hong tuam ding a, I et te leng a hong ki kheng ding hi. Pathian limsak tuailai hi thei chiat ding in I biak pa Pathian in hon vualzawl chiat ta hen aw.
