Pathian limsak diing chih i sawmlai in, Pathian i muhdan/koihdan bang chi ahi hiam chih kiveltuak mahmah hi. “Birds of a feather flock together,” chih bang deuh in, banghiam lam a kibatna neilou a zaw kinaih leh kingaih chih mawk hithei lou hi.
Mial leh vak omkhawm theilou hi. Vak a hat peuhleh mial kiam a, vak a hatkei peuhleh mial a uang zel hi. Pathian’ batpih a siam a om a, Amah toh kithuah diing a bawl mihingte himah lehang, deihtelna zatkhelh ziak in mihing leh Pathian tuh mial leh vak bang a kituak thei hetlou i hita uhi.
Sam 104:2 ah Pathian in puan bang in vak a silh kichi hi. Tua ziak in muh theihlouh neilou hi. Sam 139 ah David in, “Ngenteltak in n’on ensuak a, n’on theita hi,” a na chi hi. I zahtak luat kuahiam khawng in hon etkhak thilnuam ahi hetkei. David in bel, ‘Pathian in hon en’ chih kia in a genkei a, ‘ensuak’ a chi a, i pumpi leh sunglam ngaihtuahna leh lunggelte tanpha Pathian in ensuak ahi hi. Huai kia hilou in, ‘ngenteltak in’ a chi nalai hi. Potham a en zual a, mitsik a et a muh zual bang lel a hon ensuak hilou in, hon velchian a, hon mutaai dimdem a, nguntak in hon ensuak hi, chih i mu thei hi. Tua ziak in ‘n’on theita hi’ chih pen a polawng a theihna a hikei a, theihsiang sipsipna ahi hi. Tua zahta in Pathian in hon theichiang sisip mahleh hon it veve lai ahihman in kipahhuai lua hi.
Pathian in hon it a, i hoihna diing hon deihsak hi chih thu kipahhuai lua ahi hi. Tua mah Amah lam naih dia hon sawl a, Amah toh kinaitak a omkhawm diing a hon utsaktu ahih diing ahi hi. Himahleh a taktak in, Pathian’ hoihna leh hoih hon deihsakna khawng i gingta lotel kei uhi. Hoih hon deihsak chih bang leng kingakna dia zanglou in, Amah sang a en theizaw dan a kikoih in ei’ theihna bukim loutak i zuizo nakkhem uhi.
Bangchi lawmlawm kihi a tel a chi a ka ngaihtuahlai in ka lungsim a hong lang mahmah khat hiai ahi: A suklam kia in tui a luang thei a, a toulam in a luang thei himhim kei a, luan utna leng a neikei himhim hi. Pathian’ zahngaihna tellou in mihing dinmun leng tua bang geih ahi - Pathian a naih thei vualkei a, naih utna nasan leng a nei theikei.
Hinapi in kawlphe mei (electric power) khawng a tui pump ahih chiang in, amah hihtheihna leh utna pel ah kikhohtou thei a, touluan theita hi. Hiai hihtheihna thak in kawlphemei toh a kizopsung teng daih a, a kizopna uh a beileh bel, a ngeingei hi zel mai hi.
“Ka taksa ah a hoih bangmah a teengkei chih ka thei” (Rome 7:18) chih mihingte’ dinmun diktak genkha Laisiangthou ahi. Hinapi in a tawpna hilou hi. Aban omlai tuh hiai ahi: “Amah lungtuak dia noumau a hon utsak leh hon semsak dia hihpa tuh Pathian ahi ngal a.” (Phil 2:13)
Lungsim a thilhoih hih utna hong suak khawng Pathian apan ahi chih pom kichian a delhzui diing ahi hi. Pathian in delhzui diing a hon deihlou hileh hiai idea hon koihsak kei diing hi. Bangzahta a neulat leh thupisuak lou bang mahleh Pathian’ khut ah neu lua chih omlou hi.
“It is enough for me to pick up but a straw from the ground for the love of God,” Brother Lawrence in chi hi. Min huzahta a thilneulat khawng ah leng Pathian phawkkawm a seem uhi.
“Na lampi zousiah ah Amah theipha in,” (Pau 3:6) chi in Solomon in na gen hi. Hiai in thil neu deuh a i koihte leh a lian deuh a i koihte a khentuam kei a, a tuunkha vek zaw hi.
I tung a thiltungte, adiak in i kipahpih louh leh hoih i saklouhte khawng, Pathian in lem a saklouh hileh tunglousak thei mahmah hi. Huchi lak a, khaamlou a, a tunsakleh lah amah theihpih leh lemsak ahi a, a mawkna a hon tunsak hilou in banghiam ziak (purpose) nei a hon tunsak ahi chih phawk mahmah kisam hi.
Thiltuah himhim Pathian’ hoihna pansan a et diing ahi, thiltuahte pansan a Pathian en zolou a. Mihing in nuam leh hoih i sak i tuak a, haksa leh deihhuai lou i sak leng i tuak. Ei’ thiltuahte pansan a i et chiang in Pathian leng bang chi tel ahia chih maimah theih a, a hoihna, muanhuaina leh itna khawng bang leng muh batlouh theih ahi hi.
Hilele Pathian pansan in thiltuahte en lehang bel “Pathian in a itte, ama’n a seh bang a a sapte aa di’n, a hoihna diing un bangkim in a sepsak chiat chih i thei hi,” (Rome 8:28) chi in lungmuangtak in ki-om thei diing a, tua in Amah toh naksem a kinaina hon tun diing hi.
Tua bang diing in Toupa’n hon vualzawl hen aw!
