Kum paita 2019 in Pathian’ Pomtak Biakna chih thupi a nei in Saptuam in kum khat mawngmawng kisinsakna leh thugenna i neita uhi. Tutung in leng Pathian Limsak Biakna chih thupi nei in saulou gelh le’ng i chi hi. Thubul a i theih masak ngeingei diing a poimoh ahihleh, ‘Biakna’ kichi English a ‘worship’ apan i laksawn uh ahi a, Lai Siangthou ah ‘Biakna’ a kigen chiang in ‘khukdin’ hiam ‘khupbok’ ( to bow the knee or to prostrate oneself ) chihna ahi hi. Hiai thumal omzia Daniel L. Block in hiai bang in hilhchetna a na bawl hi: “Biakna dik i chih chiang in mihingte’n Pathian hehpihna leh a thilhihte thei leh ngaihtuah kawm a Pathian’ mai a kipiaklutna leh zahtakna piakna ahi” chi in a gen hi (Block, 2014: 13). Hiai bang ahihman in Biakna i gen chiang in amasapen a pomoh ahihleh Pathian thupina leh a thilhihte theihna leh phawkna apan a kipat ngeingei diing ahi. Pathian theihna i chih nawn chiang in, i gengensa bang in, khuak theihna mai hilou in mimal a Pathian toh kithuahna tungtawn a Amah theihna a hizaw hi (experiential knowledge). Pathian theihna tungtawn in biakna i pe thei pan diing uhi.
Kolosate kiang a Paul in a laikhakna ah ‘Biakna’ chih thumal chet zangkei mahleh, a laikhak apan in biakna dik bang hi hiam chih muh theih diing tampi om hi. Kolosate 1:10-14na sung i simleh eite’n Pathian i biak diing ziak uh ahihleh Jesu Khrist tungtawn a Pathian in a thilhihte ziak ahihdan muh theih in om hi. Khelhna apan suahtakna hon piak kia hilou in i tanzoh vuallouh ding A’ thupina hon koppih hi tel hi. Nang aa diing in Pathian kua ahia? chih kingaituah chiat le’ng uthuai i sa hi. Lai Siangthou in “Tu damsung kia a Khrist tung a lametna i neih in zaw mi tengteng lak a mi hehpihhuaipen i hi diing hi” (1 Kor. 15:19) chi hial hi. I buai hun chiang lel a Pathian phawk pan lelte i hi uhia? Ahihkeileh, niteng-hunteng a Pathian’ thupidan ngaihtuah leh phawkna hinkhua zang a nungta i hi uhiam? I leibat i piak zoh ngeilouh ding (huai bel khelhna) Pathian in a Tapa Kross a hong sihna ah hon piaksakta hi. Pathian’ thilhihte ngaihtuah a kipahna hinkhua toh amah zahtakna hinkhua zang a, A’ thupiakte zuihna hinkhua i zat chiang in Biakna dik pia hi diing i hi (Kol. 2:2-7).
Pathian’ mai a kipelut a biakna hinkhua a zang mite Kha Siangthou’ thilhihtheihna a khek a om in a hinna un Pathian pahtawina pia hi. Kolosate 3:4-5 sung ah Khrist in hinna hon peta ahihman in Biakna hinkhua zang di’n hilh in i om uhi: “Khrist i hinna uh a hong kilaak chiang in nou leng amah kiang ah thupi in na kilak sam diing uhi. Huchi in noumau a leilam thildeihna omte that un, kingaihna, nitna, hukna, utna gilou, huaihamna; huaihamna milim biakna ahi.” Biakna hinkhua in a betu hinkhua ah kikhekna muh theih diing a om diing ahi. Biakna in Pathian toh hon kinaihsak seem ahihman in, Pathian limsakna hon tun hi. Mi Pathian toh kinainehtak a a khosak chiang un, Pathian deihte deih in Pathian deihlouhte nusia in taisan thei uhi (Kol. 3:12-14). Pathian na biakna in nang ah bang hon khek a? Biakna hinkhua na zatna tungtawn in Pathian toh hon kinaisak seem in na thei hia?
Hundang a i gentaaksa bang in, biakna i chih mun khat a hun khat sehtuam a lasak toh zoh hilou hi. A lompi a paikhawm a Biakinn a biakkhawmna i neih pen mimalmal biakna hinkhua tungtawn a sepkhiak diing ahi. Mimal’ biakna hinkhua neilou a, Nipini a Biakinn a biakna a kinga hi mailou a, mimalchih in hun teng a Pathian phawkna hinkhua toh Amah biakna pe thei chiat diing in Pathian in simtu teng hon vualzawl chiat hen
