Laisiangthou pansan a suina tungtawn in, khovel a mihing om zoh kum 6000 bang na valta hi. Mihingte - a piang leh a si hun teng in kikheel ziahziah hi. Hunbi a tuam’ dungzui in, mihingte khantouhdan kibang gige khollou a, adiak in Pathian in leitungbuppi tuichimpi toh a suksiat ma nasan in zong khantouhna nasa mahmah diing ahihdan Genesis ah kimu thei hi. Tua khantouhna in masawn zel in, adiak in tu khang bang in nidang a kuama’ muhkhiat ngeilouh vanzat tuamtuam tampitak kimukhia in, kizang ziahziah hi. Pilna, siamna leh theihna ah nakpitak in kimasawn hi chih haih vuallouh in muh theih in om a, tua masawnna in Pathian tak ngial bang mi tampite’n a om diing zong um nawnlou zahdong in kikhangtou hi.
Hiai khantouhna in eimite zong nakpitak a hon sukha in khovel pumpi vanzatte mah zang in ei khom in nuam kisa chih diing himai hi. Hibang a leitung khantouhna in a hong sukkhaklai in i mangngilhkhak lauhhuai i sak mahmah zong om hi. Huai tuh: Kuan, bang diing a hon bawl hi hiam? Kua’ thumang dia hing leh dam i hia? chihte ahi. Laisiangthou enlou a mihing vaaitak a ngaihsutna i piak chiang in eima’ utdan leh deihdan chiat in hinkhua zang lel ni chih baihlam mahmah hi.
Himahleh eite Khristian i hihman in “Laisiangthou gingtute adia thuneihna sangpen leh atawp omsun” in a hon sinsakdan leh a gendan i ngaihkhiak a i zuih poimoh mahmah hi. Laisiangthou in mihingte siam a i omna ziak a gente lak a masa mahmah khat tuh, Genesis 1:26,27 a kimu ‘Pathian’ lim-le-meel suun’ chih ahi. Hiai a “Pathian’ lim-le-meel suun” a chih bang genna hi diing hiam? Hih dotna dawnna in Theology tampi tuunkha hi. Himahleh tua i gen utdan tuh, ‘A lim tuh a taktak pen theihtheihna diing a bawl ahi, chi nuam i hi. Huai tuh mihing tungtawn in Pathian a kilaakkhia chihna ahi. Mi’n nang ah Pathian diktak a mu thei diam?
Tu Thukhunthak hun a ei gingtute Eph. 4:15 a i muh bang in Jesu Khris a, amah batna a khang piching dia lamette i hi uhi. Tua bel mi’n ei a hon et chiang ua Jesu’ hihnate a muh theih diing uh chihna ahi. Gingloute khawng in a hon et chiang un ei tungtawn in kua’ mel bang a mu maimah diing ua aw? Naupang khat in Sadhu Sundar Singh en-en inchin a nu kiang a, “Nu, huai pa Jesu hia?” a chih in lungsim hon deeng mahmah hi. Eite zong mi’n Jesu a hon sak diing uh tuh i mohpuak ahi. Tua diing a sap, tua diing a hamphatna tangkha, tua diing a mohpuakna piak a om gingtu i hi.
