Missionary i chih chiang in i lungsim ah koi hiam khat a va kuankhia a ginglou mite’ kiang a hotdamna thu va gente aa diing kia in kikoih tangpi hi. A kuankhe loute missionary a koihlouhna lungsim kineikha zel hi. Jesu in Matthai 28:19 ah nungzui bawl diing in mohpuakna hon pe vek hi.
Jesu Khris hondampa a sang a, hinna thak neite’n midang a thei nailou, Jesu nei nailoute i theihsak a, i kawkmuh diing i mohpuakna uh ahi. Hiai theihpihtu nasep diing ei’ ut-le-utlouh thu hilou in, i hondampa Jesu in hon thupiak ahihman in Missions nasepna a khentuam omlou in sapna kitang vek hi.
Missionary sapna chi nih in khen theih hi.
- General Calling leh 2. Specific Calling
- GENERAL CALLING: Gingtu tengteng Pathian in a nna sem diing in hon sam vek hi.
1.1 Innsung ah - Tate’n hotdamna a tankeileh innsung a khamangthang om chihna hi pah hi. Huai sep diing tuh nu-le-pate’ mohpuakna ahi. Thuumna toh pang a Pathian thu sinsak diing pen Mission field khat hi pah hi. Huchi mah bang in tate’n leng Pathian phawk zoulou a hinkhua zang, nu-le-pa i neihkhakleh thuumna toh pang a Pathian i sap diing ahi.
1.2. Saptuam ah - Saptuam in leng a poimoh penpen Missions nasep ahi. Gingtute
kisuhaattuah a, a hatloute panpih a hotdam nailouhte tanchinhoih a zaak diing uh i mohpuakna uh ahi. Saptuam member gingtute’n i sepna mun chiat ah i kiim, i kiang a theihpihtu i hih a, nungzui i bawl diing, Pathian’ hon deihdan ahi. Huai ban ah thilpiak leh thuumna toh Pathian’ gam nna kisem thei hi.
- SPECIFIC CALLING: Hiai sapna atuam himhim a seem diing a sapna tangte ahi. A sep theihdan, a tuamtuam om a, mi khenkhatte Evangelist diing bang, Pastor diing ahihkeileh ministry tuamtuam a sep diing bang, mundang ah tangchinhoih gen diing a sapna tangte ahi. Mundang a seem diing a sapna miteng in kitang veklou hi. Miteng leng kikuankhe thei veklou mah ahi. Huaiziak in a kuan dek om sunsunte, “Inn gua hahlou a gam gua hah,” chih diing hi hetlou ahi. Innlam a omte’n i omna mun chiat a sep a, mundang a kuankhe theite’n leng kuankhia a sep diing; i mohpuakna uh ahi.
THUKHITNA: Missions nasepna koi hiam khat a hong kipan diing hiam ahihkeileh a seemkhia tuambik diing a omkei a, Jesu hondampa a sangte’n hiai Missions nasepna ei ah om khin ahi a, sepkhiat diing i mohpuakna uh ahi.
