Itna Pathian, Amah batpih a bawl mihingte kiang ah, hun tuamtuam ah kilakdan tuamtuam in poimawh A sak bangbang in Tungnungpen ahihna kilaak sek hi. Vanglianpen ahihna ah A thilhih peuhmah bangchidan ahia chi a vadot theih hilou, A nna sepkhiakna ah mihingte’ ngaihdan poimawhlou a dot le hon donglou bok hi (Job tanchin). Pathian in A hihpeuh dik (Sam 18:30).
Bangziak hiam chih taklatlouh in Israel tung ah Pathian thangpaihna meibang in kuang hi (2 Samuel 24:1). Huaibang ahih hun Kumpi David lawhchin mahmah hun ahi. Kumpi David thupi kisa le hikha’n teh, a’ mite lak ah galdouthei mi simna (census) neih di thu pia hi (2 Samuel 24:1, 1 Chronicle 21:1). A sepaih saplian Joab leh midangte’n huai bang thilhih thildiklou hi di’a gintakna na nei in khouhsawm mah le uh, Kumpi David in mi simna paisuaksak veve hi. A thil hihkhelh Kumpi David in phawkpah in kisiik mahleh Pathian hehsak khin hita! Pathian in Gad tungtawn in gawtna chi thum lak a khat a gawt teitei di ahihdan hilh.
Kumpi David, thupi kisathou Kumpi khat ahihna ah, midang ma a vakuun di utlou leh midang kuahiam lau a tai di utlou in, a gamsung a kum 7 sung kial kiak di leh melmate delh a kha 3 sung galtai di chihte teel utlou hi. Pathian in hehsan lua, hilele, hehpihna hau ahih theilua ahih chiang in, a gamsung a hiipi ni 3 sung a tun di teel hi. Maipha zong a midang mai a kuun sa, Pathian ngaihdamna nget a lametna nei ahihna kilang hi.
Hiipi’n Israel nawk taktakta. Hiipi banah, Pathian in Van Angel khat temsau tawh koih a, tua inle mipi khoih in kilang hi. Pathian, kuamah thu a gamtalou ahihna ah, Kumpi David in (khelhna hihtu, amah ahihman in) amah leh a innkuante lel in gawtna a thuak uh kilawm a sakthu gen mahleh ngaihkhiak sak hilou. Hilele, hehpihna tawh kidim Pathian in A’ mite thuakna Amuh in hehpih lua in, Vansawltak gamtang nawnlou ding in thupia hi. Hitamahleh, A chihlouh chilou Pathian in A’ lungkim ma hiipi bel la manglou. Kumpi David in kin-le-buang in kithoihna honlan a, Pathian lungkimna a ngah in hiipi in Israel nusia hi. Tomchik sung in mi 70,000 bang in sihna tuak man uh hitel hi.
Pathian, Israel tunga banghang a thangpai mahmah hiam chih gen in omlou. Banghang a mi simna (census) Pathian in zadah hiam chih le a ziak gintak thu lel gentheih ahi. Kisimna neih chi’a zuih di paidan zuihlouh om hithei. Levi leh Benjamin telsak louh ziak le hithei. David in galdouthei mi a sim in, Pathian sa mihing tamna leh hatna a muanna koihzaw bang in kilang a, huai in Pathian thangpaisak mahmah hithei. Kumpi David in Israel leh Judah hon-gawm a, Philistiate leh Hitte khawng hon zawh khiak chi’a, ama’ hatna bang sakha hithei. Pathian in A’ miteelte bangzah pha uh a chih thei di’a Kumpi David sawllou a, mihing bangzah hi hiam chih Amah lel theih di achih, Kumpi David vakidaihlah sa a, hehsan mahmah le hithei. Pathian thangpiahna ziak gentheih tampi omlai di. Mipi leh Kumpite’n Pathian chihlouh thil hihkha nana na chu, gawtna thuak uh himai hi.
Hiai Laisiangthou a hiipi I gen tawh, tua eilak a hong tung hiipi enkhawm sin le, kibatna tampi omthei hi. Tulai tak a khovel luahtu mipite gamtat gilou nasa mahmah a theih ahi. Gam tuamtuam vaihawmte, kihatsak, thupi kisa, thuneihna tawi kisa, hihtheihlouh neilou a kikoih tam mahmah uhi. Galvan hoih taktak kaikhawm a, banglampeuh a kimuang tampi om uhi. Thilhihthei kisa a, thilteng bawltu leh huaite tung a thunei Pathian sa Pathian thilbawlte muang a, huaite mai a kun a bia tawmlou hi. Hiipi I gen kia lou, Laisiangthou ah muhtheih in, Israelte’ milimbiakna sutzop ahih sung Pathian in lam tuamtuam A thuhilhna vanzat tungsak sek hi. Milim bia a thumanglou kumpi tamtak mulkimhuai tatak sihna a sihsak om uhi.
Tua Covid19 ziak a khovel gam thupi kisate le taang theilou, galvan thupi leh hatte khawng hiai virus gu daalna leh thahna dia zatna, phattuamna neilou ngen hi uh. Thunei kisa gam makaite bang le, hiai virus ziak a inn a kikhum mai uhi. Sum-le-pai hauhna in kuamah hunkhelou chih chiangtak a lah a om. Pathian vaihawm kuamah in daal (obstruct) theilou ahih muh a, huai a pan Pathian lam ngat a, Amah muanpen a neih a, mihing pilna a kingaklouh di ahih I theihkhiak di Pathian deih a hikha mahna. Israel leh Kumpi David kiang a thil tunsak a om Pathian gawtna hilou in, Pathian in amaute Amah a kinga/ muanna nga ahih di uh lak ut a hihbang a, Covid-19 le eite’n Pathian bangkim tung a thunei a vaihawm ahi chih I muh di uh deihna a kilakna hikha mawhlou hi. Tutan in le, hiai natna a pan hon humbitthei omsun Pathian kia ahih a theichian a tawmzaw I hi uhi. Keilou kuamah / bangmah pathian dang ka ma ah na nei di uh a hikei chitu ma a pathian dangte hau lua bang le kihithei mahmah di hitah e, hon chisak hi.
Amah naih leh A’ mel vaak-a mahni dinmun kimuchiante hidi’n thugelh simtute TOUPA’N na vek un hon vualzawl hen!
*Thugelhtu, TBMC, EBCC Delhi a Committee member muanhuai khat ahi. A tung ah I lungdam hi.
