Kumteng a June kha a Nipi thumna PATE’ NI, i Saptuam in zong nipoimohte laka khat a i neih uh tukum 2021 ah zong Pathian in hon pitung nawn ta a iki pak mah mah uhi. Covid 19 hipi ziak a it leh ngaih tampiten sihna hanmual hon liamsanta himahleh a damlai omsunte, i omna mun chiat uah Toupa Jesu min manpha toh na vek un chibai. Toupan michihte Pate’ ni tungtawn in Khalam leh salam vualzawlna bukim in hon vuk chiat hen. Pa chih ding a neilai leh nu toh a dam khawmlaite hampha mah mah hang, tuamah bang in i tate ziak a nu suak a pa hithei lel ihih man in zong tate tung tawn a inkuan bukim hon guan Toupa van Pathian thupina pia a kipah thugen kawm in a min thupi i phat uhi.
Khua khat ah Pate’ni a lopna uah pate laka a lianpen pen leh pate lak a, a neupen teng khia in, pulpit lam apan mipilam nga in ding sak uhi. A din khawm chiang ua kikhai lua ahihman ua mi nuihza law khin ahih lai in; A mau theihlouh in a nung uah “PA CHIAT CHIAT” chih kigelhna lai belh sak uhi. A belh khit chiang un mipilam nungngat in ding sak leu leu uhi. Tua laigelh mipin a muh chiang un khutbeng zen in nuizak uhi. A neu mah mah pa pen, amah zaw neu lua in pa hikei, a kichih theih louh mahbang in a lian mah mah pa zong amah zaw lian mah mah ahihtoh pa hipha diak chihna ding zong om tuan lou veve hi. Huaiziakin letman a pa hilou, neu man a zong hilou tuan lou ahihna ah “PA CHIAT CHIAT” dinmun leh hihna kibang, mohpuakna leh thuneihdan kibang, kuamah a kisimmoh ding om lou ahi chih i theih kul hi. Neuta leh na pianna pa kan a na zahtak ding dang om tuan lou hi. Pathian na zahtakna leh na itna gen het kei lechin zong na pa tung a na gamtat na apan hong kilang ding hi. Tuamah bang in na pa tung a na omdan leh gamtat a pan Pathian na zahtak zia min thei mai ding uhi.
Pate itna khup a hon it zaw Pathian ahi a, mihingte lak ah pa hon itna zah a hon it ding om lou hi. Japan gam a Panasonic Company neipa Matshusitha tuh a pan a hong let chiang a mihausa hong hih ding deihsak law mah mah ahihman in naupang kum kua a hong phak apan kiloh ding in sawl khia hi.Kum sawm leh thum a phak in a pan sih san hi. A pan a sihma a, a thuhilhna “Ka tapa aw leitung a mihausa leh mi minthang a kiloh chiang a nang min zong a kilohna ding in hanchiam in”a chih thu mangngilh mai lou in hong pang hi. A pan sihsan mah leh a thuhilhna a tapa lungsim a si lou ahihman in Japan gam a Company min thang mah mah Panasonic Company neipa hong suak pet mah in, nu leh pa zahtakna toh thumang mite a ding a Toupa thuchiam a tung ah a tak in hong tang tung takpi hi.
Nidang lai hun in khatvei Japan gam ah kial nasa tak hong tung in mi muan huai pi pi leh thahat tak takte nangawn guta in vak uhi. A gam kumpin guta sukbei ding dan lampi hon zong ua hichi bang in thusuah hon bawl uhi.Guta khat peuh peuh a man zou a om leh Dollar 1000 kipahman a mantu kiang a piak ding, a guta pen bel thah hiding chih ahi.Huchih laiin unau thum a nu leh pa toh haksa tak a khosa om uhi. A nautum pen in a ute kiang ah “I nu leh pa a ding in nou nna tampi na sep sakta na hihlai un ken sem kha nai lou, tua bang a i om touh zel leh i vekpi ua hiai kial a sikhin ding i hih man un, kumpi thupuan bang in kei pen guta hi chi in police ah report bawl in hon mansak unla,huai kipahman dia hong kipia Dollar 1000 toh inu leh pa hon vak le uchin, huai sung in kial zong hong theng dia i nu leh pa dam, nou zong dam in i om thei ding uhi” chih ngaihdan hon polut hi. A nu leh pa leh a u ten awi lou uhi. Himah leh aman “Khatveitei a si ding veve ka hihman in tua dan in sileng manpha pen ding hi, hon mang mai un” chi a a nget ngut ngut man in mang mai uhi.
Guta thahna ding leh amantu kiang a kipahman piakna ding ah police in thudotna hoihtak a neih zel mah bang ua hon dot chiang un im ngam lou a thil om dan diktak a hon gen uh kul hi. Kumpipan huai a zak chiang in “Hichibang lawm lawm a nu leh pa leh sanggamte itna nei ka gamsung a om man in ka kipak petmah ahi. Ka tapa aw na si kei ding hi. Na nu leh na pa toh na inkuan un Japan kumpi in hon vak ding a, nang bel nu leh pa zahtak ding leh it ding ahih dan gam sung ah mi teng kiang ah na gen kawi kawi ding hi” a chi hi. Japan ten nu leh pa itna a neih kia uh hilou in sang a upa zaw leh lianzawte zahna leh thuman na a neih uh tuh Pathian a pan vualzawlna a tanna uh leng ahi a ki chi hi.
Tuni PATE’NI ah pate tung a kipahthu genna, thuphatawina, ngaihdam ngetna leh pate pahtawina hun a zang thei chiat dingin Toupan inkuan chih hon ompih in, a Khasiangthou pawlna toh hon uap henla kumnawn pate’ni inkuan kim a zang thei nawn ding in zong damtheihna in mi chihte hon vualzawl hen.
