1Jn.3:18 Naute aw, thu kia in it kei ni, lei kia in leng it sam kei ni thilhih leh chihtak tak in hi zaw hen.
Tulai i thiltuah leh i dinmunte uh et in lungzin huai, mangbat huai, i huangvulh ganta, vok leh ak, belam leh kel, bawng leh sialte tung a leng tung dia i deih louh uh mihingte tung ah hong tungin niteng in thom lungzinhuai takte in hon dengdeng ta mai hi. Kumpiten leng panlak dingdan thei tuanlou, khat leh khat kingoh tuah lel. Saptuam lamte leng tuabang thou, lei belamputen lah pi theilou bang chi hita ding hiam Toupa chih mah hong dik ding a bang ta hi. Niteng a hanmual lam a vui ding om, a kihalte leng hal’ ding kivualdim, hantoute leh haltute zong gimthei mahmah uh, nisa kholumpi lak a nna ut huai het lou, seplouh theihlouh hong tungte kitheihmoh bawl theih lah hilou, bang ziak ahi ding? a ziak bang ahi ding? bang tan a sawt daih ding? chik chiang a theng ding ahi diam? chih tuh lungsim ah dotna ngaihtuah khak nak sek, a dawng thei kuamah omlou dotna tuh ahi mai hi. Hiai bang hun haksa leh mangbat hun a inkuan kikhen ziak bang, nupa kikhen ziak bang, natna i thuakte ziak bang a lungsim liam gawp, kha-leh-sa bah leh chau a omte a ding in ei a dam lel laiten i sep theih uh om ding hi. Hehnemtu ding, lawm hoih lawmpha i chihte toh zong kikawm theilou, insak-inkhangte toh, saptuam heutu Pastor leh upate nangawn toh leng tukhawm, khawl khawm theilou a om i hihman in poi mahmah hi. Himahleh a hithei om sunsunte ah kuhkal tak leh taima tak in panla chiat ni.
THUMNA A KIPANPIHNA:- Kipanpih theihna om tengteng lak a manpha pen, hoih pen, baihlam pen, mi tengteng in bang chiklai peuh aleng i hihtheih chiat uh ahi. I thumna ding Pathian uh zong thil bangkim thei, bangkim hihthei, munteng a om, hon muhlouh lai leh zaklouh lai neilou a hihman in a muanhuai mahmah hi. Thumtu lam pang ah leng a hangsan huai mahmah tuh kamsiam hon phut kei a, sappau, vaipau leng a chi tuan kei a, Bible Degree leng a poimoh sak tuanlouh man in ei pianpih pau toh thum theih a hih hamphat huai lua hi. I damlouh chiang in thum nasan leng kithum zoulou, kithum peihlou ahihman in, a dam lelte panlak hun, kithumsak hun ahi zaw hi. Thumsaktu a pangte tuh thumsak ngaite sang a chidam zaw, thahat zaw ta dih i hihman in hiai hamphatna pen a manpha thei pen a lak sawm chiat ni. Tulai vanzat hoihtak mobile phone zang bang a leng gamla pi a omte nangawn leng thumsak theih hita hi. I chi a hong nat a i dam kei leh khalam mah leng hong bah in lunglelhna, lungkiakna guam sung ah kitum baih mahmah hi. Huaiziakin ahi salam natna in khalam bahna, lungsim a kiakniamna hon tun thei ahihman in kithumpih tuah in kitung ding tuah chiat ni.
THILPIAK A KIPANPIHNA:- Tulel a i tuah uh natna pen kilohsawn baihlam lua dan a i theihman un inkuan khat a damlou khat omleh kim leh kiang a vak khiaklouh ding, midangte toh kipawl louh ding chih bang hong hipah ahihman in niteng poimohte midang in i va piak ding i mohpuakna hong hipah hi. Damlouten bang a sam ua, chini, bongnawi, singpite, meh ding dal, allu, sathau, chi, masola leh a dangdang. Huaibanah, mi kibang hetlou i hihman un khenkhatte niteng a nektawm ding zong, tuni a muh tuni a zang, khawl ding, koihching ding khop om zoulou, muhtawm netawm chih bang zong ki-om ahi. A sum zongtu pen a kuan theihlouh chiang a sumzat ding kisam, a sum omlou chia nek ding kilei theilou hong hipah pawl tampi ki-om hi. Hiai bang hun haksa lak a chimoh tasam, lunglel-lungkia-te a ding a kinepna leh lamet khong i hih khak leh mihampha i hi. Sum-leh-pai, nek-leh-dawn piak ding lung duai kei ni, tanghou phelnga leh ngasa nih neipan zong a piak khiak ngam man in mipite vahtak leh taitak in inlam zuanthei uhi. A pengamten piak ding nei gige ua, a pengam louten piak ding nei ngei lou uhi.
Phal lehang piak ding om a pal kei leng piak ding om lou chihla zong adikna tam hi. Leitung mit toh i et chiang in piak khiak, hawm khiak chih khawng supna leh manna toh kibang a muh theih hi. Himahleh, Laisiangthou ah “Give, and it will be given to you: good measure, press down, shaken together, and running over will be put into your bosom. For with the same measure that you use, it will be measured back to you”(Lk.6:38). I Toupa Jesu mahmah in a kam a na gen khia ahihman in muanhuai i sa uhi. Tuabang ahihman in, thilpiak i piakte pen amang leh bei hilou in hong kileh kik nawn, ei angsung mah hong tung nawn, i piak lai a itehna mah toh kiteh ding chi sese hi. Alung muanhuai lailai tuh hoihtak a teh, hen gak, sin gak a let noinoi a piak ding chi nawn lai hi. Hiai bang hun lungzin huai, mangbat huai laitak a inkuan a chidam, nek leh dawn tasam lou, lohzah ngei mah la, a pung bang hong om zaw mahte : Kim-leh-kiang a thumpih ngaite, khamuan ngaite, sum-leh-pai, nek-leh-dawn a panpihngaite panpihtu muanhuai hi chiat ding in Toupan hon vualzawl hen aw.
