Natna tamzawte a kilohsawn theih ua, tampite baihlam tak in kiloh theih uhi. Kilohsawn theihna tuh huih, tui, nek-le-dawn hiam, kihetkhakna tungtawn in ahi. Hichibang natna khenkhat a vei louhna ding un naungekte damdawi piak ahi zel uh. Natna tamzaw tham dal theih louh ahi lai uh. Huai kia hilou in tuni tan khovel ah natna akibehlap lailai. A nanung pen, tulel a khovel pumpi sawiling natna Covid 19 chih minvuah ahita. Natnahik khenkhat gamsa a omte, khatveivei mihingte’n a honvei thei ua, Covid 19 leng huchibang natna (zoonosis) ahi.
Natna, amah a hong kipankhe thei mawk ahikei. A piang saktu thil thum a om ua; huaite tuh a veitu (mihing), ahik (agent) leh a mun-le-mual/kiim-le-kiang ahi. Hiai teng thum kisukhawm lou in natna a omthei kei. Natna dalna tuh hiai theisiam a panlakna a kinga ahi chih epidemiologist te gendan ahi.
Natnahik khenkhat thahna damdawi a om. Adang khenkhat, malaria bang, a pawluttu thoukang thah theih leh ven theih ahi. Covid 19 bel ganhing akipan natna himahleh mihing in a vei chiang in mi dangte baihlam tak in a lohsawn thei. Tulel dinmun ah natna vei mi akin thei pen a theihkhiak leh a tuam a omsak tuh kivenna hoihpen ahiphot.
Virus tuh muhtham louh (natna) hikte lak a leng a neu penpente ahi. Virus khat neudan tuh mihing khat leitung pumpi chia a lian hitaleh, virus khat mihing khat chia a lian ahi ding. A chitam mahmah ua, 30,000 khawng muhkhiak ahita (species 3,600 val, 164 genera, 71 families). Virus in hinna nei tengteng, mihing leh ganhing, sing-le-lou leh natnahikte, bacteria tan in a infect thei uhi.
Covid 19 hik tuh 2003 kum a hii leng, China a hong kipan khia SARS leh 2012 a middle east a hii leng mah, MERS omsaktu virus te toh ki nai mahmah ahi. Tampite’n hiai hun a hiilengte i thei lai ding uh. Covid 19 tuh 2009 kum a hii leng, Swine flu (H1N1) sang in kiloh a baihlam zaw zek a, himahleh nakpi in a hatzaw.
Biologist Jean leh Peter Medawar in virus a genchetna un “a piece of bad news wrapped up in protein” ana chi uh. Covid 19 omsaktu virus, SAR-CoV 2 tuh protein molecule ahi. Taksa pawlam ah a pung thei kei, himah leh mihing taksa a hong tun a, cell sung a honglut chiang in, a sung a vanzat (machinery) teng “hijack” in a zatsak a, amah a ding protein chi tuamtuam, 29 bang a bawlkhia hi.
SAR-CoV2 in mihing tuap a sual masa, cell sung a tun chiang in a lutna mun protein chikhat ACE2 ahi. ACE2 tuh blood pressure bawlhoihtu (regulator) ahih ziak in hiai natna BP hoihlou neite’n a lah deuh uhi. Interferon bawl ding dal ahi pah; huai tuh natna honglut mah leh pataudak khen a “police” sam khe theilou ding a henchip in a om chihna ahi.
A lang lam ah immune cell te a hong tun chiang un virus kia khentuam chih om lou in, a virus toh a omna cell toh, dawmlou a gamtang in suksiak a hi uh. Huchiin grape gah tang khat a pan bom khat kikal chia a lian khawng tuap hihsiat a hong hi. Huai hun chiang in tuap in nasem theilou a hih man in hihtheih sun tuh, tuap siatna amah le amah a ki repair sung, damlou a dia poimoh oxygen piak dan ding ngaihtuah a hi mai.
Hichi’n natnahik neuchik, light microscope a leng muh thamlouh, amah kia a bangmah hih thei lou khat in, taksa sung a hihtheihna thupi mahmah nei cell te vanzat teng mantang a zatsak in leitung pumpi ah hinna tampi a lata hi.
Covid 19 natna leh virus toh kisai theihtuak tampi theihlouh a omlai. Hat mahmah leh kilohsawn baihlam ahi chih a kithei. A damna ding damdawi om lou ahi. A kitheih khiak ma a a veitu in midang ana lohsawn man zel ahi. Hiipi tampi ana omta mahleh hiai hiipi hun dang teng sang a lauhuai zaw a chih theih. Hihdamna ding damdawi omlou, kivenna ding vaccine lah om (nai)lou ahihziak in Social Distancing & Quarantine tulel a poimoh pente ahi uh.
Epidemic kipatdan stage tuamtuam a om:
Mailam bang hongchi ding, kuama’n a theikei. Pilvanhuai mahmah ahi. Tutan kisakkhawlna hun i neih kipahhuai ahi. Mundang a mite thil tuahte hamphatpih sawm ni. Tutan panlate, district administration, police, health worker te, NGO te leh adangte michih in nungthuap sawm ni. Stage 1 ah i omden theilai, lohching lai hihang.
BUCK UP BRAVE-HEARTS, COVID 19 WARRIORS! OUR LIVES ARE AT STAKE! (Sutzop di).
Note: Covid-19 hiipi tungtang, eimi doctor te’ thugelh kimu tamlou hi. Bungmual khua a om, heutupa (Upa) Dr Paul Ginthang, hun khat lai a Medical Suptd., District Hospital, Lamka lenkha in a gelh Bungmual Weekly News a kisuah a kimuh ciang in manpha kisa hi. A gelhtu, doctorpu lemsakpihna tawh tu in DEW ah suahkik ahi (beu nihna). Thugelhpa leh simtute TOUPA’N navakna hongpe tekta hen!
