Juda-te’n Messiah lamentak leh poimoh sakna lianpi toh a ngaklai un Messiah kisa lah hilou mi tampi hong pai uhi. Tua bang ahihlai in, Laisiangthou in Messiah’ hihna diing a gente tangtun sipsip thei mi khat Nazareth Jesu, Pathian’ sawl a hong pai ngei hi. Chiamtehna tuamtuam a chet ahih nung in a sinsaknate ngai ut in a paina lamlam ah, mipi tampi in zui huthut uhi. Tua Jesu tuh Messiah a na hi ngei ngut a, Laisiangthou genkholhte suktangtun zel a hong paina san ahi.
Tua bang a Laisiangthou’ genkholhte sutangtung a hinkhua a hong zatlai in, ei gingtute’n ‘Palm Sunday’ chi a i theih uh tuh, a hong hih tangtunte lak a poimoh mahmah khat a hong hi nawn hi. Hiai ni thupi leh poimohtak tuh Juda-te sahkhua toh kisai a ni poimoh mahmah, Nissan kha a ni 10 ni (10th Nissan) paikan belamnou diing teel ni toh hong kituak hi. Eksodus 12 sung a i muh bang in hiai Nissan kha tuh Israel-te aa diing a Egypt a pawtsan kha uh ban ah, kum khat adia kha masa hi diing chi a Pathian in Mosi leh Aaron kiang a a na gendan ahi.
Hiai ni (10 Nissan) poimoh mahmahna tuh, Pathian’ thupiak dungzui a innkuanchih in, amau adia kihun lel belamnou genbaang lou/dembei, kum 1 a upa teel in huai kha Ni 14 tan keem diing ua, Nissan kha ni 14 ni, nitaklam a, a paikan ankuangluina diing ua a goh diing uh chih ahi. Hibang chiindan, kumteng a paikaan ankuang belamnou gou a zat zel pen Mosi hunlai a kipan AD 70 tan khawng Juda-te’n Jerusalem Temple ah a na zang zel uhi. Hibang a kumteng a paikan ankuang a lopna ua tua belamnou a goh zel pen un, i Toupa Jesu Khris i paikaan belamnou, khovel khelhna lamang dia thah diingpa’ lim na chiing toutou hi. (Johan 1:29)
Nissan 10, AD 30 lak vel a pen, ei gingtute’n ‘Palm Sunday’ chi a i theih tuh, i Toupa Jesu Khris Messiah ahihna, Kumpi ahihna, leh Pathian Belamnou ahihnate khovel theih dia a hong kiphoulak ni leh, huai kum a Nissan 14 nitaklam a Pathian paikaan belamnou dia goh diing a chinlouhna a neihleh neihlouh chet a om dia Temple a Siampite mai a a va kilah ni zong a hi. Temple ah siampi leh siampiliante’n a na enchian in, a mohsak theihna diing uh, a nnasep ah, a thugen ah, a hinkho zatdan ah a na zong mahle uh mulou in, Pathian’ belamnou genbaang lou leh dembei ahi chih Juda sahkhovaitak a chet a hong hih ni ahi.
Tua Pathian’ belamnou Jesu Khris tuh Pathian hehna leh gawtna khovel tung a Pathian in a tut diing apan hon hondam (Pathian’ hehna, sihna gawtna hon paipelsak) hi. Huaiziak in, tua paikan belamnou Jesu tuh nang mahmah paikan hi dia kipia, nang’ belamnou hi dia Pathian in a hon luikhiak hi ahi. Nang adia kipia, nang ziak a thah a om, Pathian’ itna in nang mimal mahmah hong sukha hi. Tua Jesu na paikaan belamnou ahi chih na gingta in, na sang in, amah ah na kingata hia?
