Tukum Palm Sunday program zatdan a tuamdeuh ziak hia, hiai ni a dotna poimoh mahmah nihte, Lai Siangthou a muhte lumgsim ah hongsuak thak hi.
Dotna khatna: “Bang ziaka sabengtungnou(colt) khih a omlai phel na hia?” Mi khua valut zok a a’ gankhoi uh aneitu in hoihtak a a kep leh khihlai vaphel mawkpen theihsiam haksa di mah hi. Ahihhangin hiai adawnna ding Jesu’n nungzui minih A sawlte kiangah hilh ngal hi. Huai tuh, “Toupa’n A deih ahi”(Luke 19:31). Amau leng Jesu’n ahilh bangin hiai dotna a tuah tak un dawng geih uhi. Bangmah thu saupi genbeh ding leh thubuai-labuai omlou in vengmai hi. Damsung khualzinna a dotna haksa phutkhak zelzelte hiai Jesu sinsak, dawnna toh ‘Toupa'n hiai bang ka tuah ding Adeih ahi, honsinsak nop nei ahi’ chi’n dawngin maituah thei chiat lehang, Pathian deihdan hizaw ding hitah e.
Dotna nihna: Jesu, Jerusalem khosung A lut takin, akhopi sung pumpi’n lamdangsa in a ling souhsouh ua, ‘Amah kua ahia?’ chi’n akidong uhi. Amah honzui mipite’n, “Jesu, Jawlnei, Galilee gam akipan ahi,” chi'n dawng uhi ( Matt. 21:10-11). Tuni tan inleng hiai dotna’ dawnna tuh khovel theihnop ahi. "Khovel in ahon thei kei" (John 16:3). Hiai dotna’ dawnna ding leng Jesu'n hon sinsakta hi. Midangte itna, khat-le-khat ki-ittuahna, ngaihdamna, hehpihna, thuakzohna leh Khagah,Lai Siangthou (Gal 5:22) a kigente leh Jesu thupiak "khat leh khat ki-ittuah chiat ding"(John 13:34) te niteng hinkhua a langsak a, Jesu kua ahia' chih dawnna khovel theihsak ding tuh ei gingtute, niteng mohpuakna ana hive.
A tung a dan ahihziak a, gingtute hinkhua 'khovel vaak' leh "chii (salt)" bang a tehkak ana hidan eive. Nang na munah vakin, kei ka ka munah. Thugelh saulou I luikhiak, TOUPA’N I tan uah hon vualzawl sakta hen!
[Palm Sunday 2020 Etkikna hon-gelh, htp Upa Ngulminthang, EBCC Delhi Chairman hihna lenlel ahi.]
